މަޤާމުން އިސްތިއުފާ ދެއްވާފައިވާ ލުބްނާނުގެ ބޮޑުވަޒީރު ސަޢުދުލްހަރީރީ އެނބުރި ލުބްނާނަށް ވަޑައިގަންނަވާނެކަމަށް ވިދާޅުވެފައިވާ މުއްދަތު ފާއިތުވެގެން ދިޔުމަށްފަހުވެސް އޭނާ އެނބުރި ޤައުމަށް ވަޑައިގެންފައިނުވާތީ އުފެދިފައިވާ މައްސަލަ ސާފުކޮށްދިނުމަށް، ލުބްނާނުގެ ރައީސް މިޝެލް އައުން ސައޫދީ ސަރުކާރަށް އިލްތިމާސް ކުރައްވައިފިއެވެ. ރައީސް އައުން ސޮއިކުރައްވައި ލުބްނާނުގެ "ބަޢަބްދާ" ރިޔާސީ ގަނޑުވަރުން ނެރުނު ބަޔާނެއްގައި ސައޫދީ އަކީ ލުބްނާނަށް ބޮޑެތި އެހީތަކެއް ފޯރުކޮށްދޭ އުޚުއްވަތްތެރި ޤައުމެއް ކަމަށާ ހަރީރީގެ މައްސަލައިގައި އަރާފައިވާ އޮޅުން ބޮޅުންތައް ސައޫދީ ސަރުކާރުން ސާފުކޮށްދޭނެ ކަމަށް ލުބްނާން އުންމީދު ކުރާކަމަށް، ބުނެފައިވެއެވެ.
ލުބްނާނުގެ ބޮޑުވަޒީރު ސަޢުދުލްހަރީރީ މިމަހުގެ ކުރީކޮޅު މަޤާމުން އިސްތިއުފާ ދެއްވީ ސައޫދީއަށް ކުރެއްވި ރަސްމީ ދަތުރުފުޅެއްގައި ސައޫދީގައި ހުންނަވައިގެންނެވެ. ހަރީރީ މަޤާމުން އިސްތިއުފާ ދެއްވިކަން އިޢުލާންކުރެއްވީވެސް ސައޫދީ މީޑިޔާ މެދުވެރިކޮށް ދެއްވި ބަޔާނެއްގައެވެ.
މަޤާމުން އިސްތިއުފާ ދެއްވި ސަބަބެއް ކަމަށް ހަރީރީ ވިދާޅުވެފައިވަނީ ލުބްނާނުގައި އީރާނުގެ ބާރާއި ނުފޫޒު މާބޮޑަށް ގަދަވުމާއި ހަރީރީގެ ފުރާނައަށް ނުރައްކާވާފަދަ ހާލަތެއްގައި ލުބްނާނުގެ އަމަނާބެހޭ ކަންތައްތައް ހުރުމެވެ. އެހެންނަމަވެސް ފަހުން ދެއްވި ބަޔާނެއްގައި، ފަސްވަރަކަށް ދުވަހުގެ ތެރޭގައި އެނބުރި ލުބްނާނަށް ވަޑައިގަންނަވާނެ ކަމަށް ހަރީރީ ވިދާޅުވެފައިވެއެވެ.
މި މުއްދަތަށްފަހުވެސް ހަރީރީ އެނބުރި ޤައުމަށް ވަޑައިގެންފައި ނުވާތީ، ލުބްނާނުގެ ރައީސް ވަނީ ކަންބޮޑުވާކަން ފާޅުކުރައްވާފައެެވެ. އަދި ލުބްނާނުގެ ހިޒްބުﷲ ޖަމާއަތުންވަނީ ސައޫދީ ސަރުކާރުން ހަރީރީގެ މިނިވަންކަމަށް ހުރަސްއަޅައި އޭނާ ޙިސާރުކޮށްފައިވާ ކަމަށް ތުހުމަތުކޮށްފައެވެ. ހަރީރީ އެނބުރި ގައުމަށް ވަޑައިގަތުން ލަސްވަމުންދާތީ އާއި ހަރީރީ އޭނާގެ ޕާޓީގެ އިސް ފަރާތްތަކަށްވެސް ފޯނުން މުވާސަލާތުކުރައްވަފައި ނުވާތީ، އޭނާގެ ޕާޓީންނާއި އޭނާއަށް ތާއީދުކުރާ ލުބްނާނުގެ ސިޔާސީ ފަރާތްތަކުންވެސް ވަނީ މިމައްސަލައިގައި ކަންބޮޑުވުން ފާޅުކޮށްފައެވެ.
ސައޫދީ ޓީވީން ވަނީ މިދިޔަ ހަފުތާގައި ހަރީރީ، ސައޫދީ ރަސްގެފާނު ސަލްމާން ބިން ޢަބްދުލް ޢަޒީޒާ ބައްދަލުކުރެއްވި މަންޒަރު ދުރަށް ދައްކާފައެވެ. އަދި ސައޫދީ ޖެޓެއްގައި ހަރީރީ އަބޫދާބީއަށް ވަޑައިގެން، ޔޫއޭއީގެ ވަލީއުލްއަހްދު މުހައްމަދު ބިން ޒައިދާ ބައްދަލުކުރެއްވުމަށްފަހު އެނބުރި ސައޫދީއަށް ވަޑައިގެންނެވި ޚަބަރުވެސް ސައޫދީ މީޑީޔާއިންވަނީ ހާމަކޮށްފައެވެ. ނަމަވެސް ހަރީރީގެ ހާލަތާބެހޭގޮތުން ސައޫދީ ސަރުކާރުން އެއްވެސް އެއްޗެއް ބުނެފައެއް ނުވެއެވެ.
ދާދިފަހުން ސައޫދީއަށް ޒިޔާރަތްކުރެއްވި ފަރަންސޭސި ރައީސް އެމެނުއެލް މެކްރޯންވެސް ވަނީ ރިޔާޒްގައި ހަރީރީއާ ބައްދަލުކުރައްވާފައެވެ. މި ބައްދަލުކުރެއްވުމުގެ ފޮޓޯތައް ސައޫދީ މީޑިޔާއިން ހާމަކޮށްފައިވާއިރު، އެމެރިކާގެ ޚާރިޖީ ވުޒާރާގެ މަސްއޫލުވެރިއަކުވެސް މިދިޔަ ބުރާސްފަތި ދުވަހު ވަނީ ސައޫދީގައި ހަރީރީއާ ބައްދަލުކުރައްވާފައެވެ. އަދި މިއިން އެއްވެސް ބޭފުޅަކު، ސައޫދީން ހަރީރީގެ ހަރަކާތްތަކަށް ހުރަސް އެޅިކަން ހާމަކުރައްވާފައެއް ނުވެއެވެ.