ކުއްލި ގޮތަކަށް މަޤާމުން އިސްތިޢުފާދެއްވި ލުބުނާނުގެ ބޮޑުވަޒީރު ސަޢުދުލްހަރީރީ ހުންނެވީ ސަޢުދީ ޢަރަބިއާގައި ހައްޔަރުކޮށްފައި ނޫންކަމަށާއި، ދާދި އަވަހަށް ޤައުމަށް އެނބުރި ވަޑައިގަންނަވާނެކަމަށް އެމަނިކުފާނު ވިދާޅުވެއްޖެއެވެ.
އިސްތިޢުފާ ދެއްވުމަށްފަހު ދެއްވި ފުރަތަމަ ބަސްދީގަތުމުގައި، ލުބުނާނުގެ ފިއުޗަރ ޓީވީގެ ޕްރޮގްރާމެއްގައި، ސަޢުދީ ޢަރަބިއާގައި އޭނާ ހުންނެވީ ފުރިހަމަ މިނިވަންކަމާއެކުގައި ކަމަށާއި ކުރިއަށް އޮތް ދެތިން ދުވަހުގެ ތެރޭގައި އެނބުރި ލުބުނާނުގެ ވެރިރަށް ބެއިރޫތަށް ވަޑައިގަންނަވާނެކަމަށް، ސަޢުދުލްހަރީރީ ވިދާޅުވިއެވެ.
އަދި ލުބުނާނުގެ ޤާނޫނުއަސާސީގައި އޮންނަ އުޞޫލުން، ރަސްމީގޮތުން މަޤާމުން އިސްތިޢުފާދެއްވުމުގެ މަސައްކަތް ކުރައްވާނެކަމަށްވެސް ހަރީރީ ވިދާޅުވިއެވެ. ހަރީރީ ވިދާޅުވިގޮތުގައި އޭނާ އެންމެ ބޮޑު އަޙައްމިއްޔަތުކަމެއް ދެއްވާނީ ލުބުނާނާއި އެ ޤައުމުގެ ރައްޔިތުންނަށް ކަމަށާއި އެ ޤައުމަށް، އެ ސަރަޙައްދުގެ އެހެނިހެން ޤައުމުތަކުގެ ފަރާތުން ކުރިމަތިވާ ނުރައްކާ ބޮޑުކަމަށެވެ. ލުބުނާނުގެ ކުރީގެ ބޮޑުވަޒީރު ވިދާޅުވީ ލުބުނާނުގެ ހަނގުރާމަވެރި ޖަމާޢަތެއް ކަމަށްވާ ހިޒްބުﷲގެ ޢަމަލުތަކުގެ ސަބަބުން ޢަރަބި ޤައުމުތަކުން ލުބުނާނާ ދެކޮޅަށް ދަތިކުރުމުގެ ފިޔަވަޅުއެޅުމަކީ އެކަށިގެންވާ ކަމެއްކަމަށެވެ.
ޙަރީރީ މިމޭރުމުން ވާހަކަދައްކަވާފައިވަނީ އޭނާ ހުންނެވީ ސަޢުދީ ޢަރަބިއާގެ ފުލުހުންގެ ހައްޔަރުގައިކަމަށް ބައެއް ނޫސް އިދާރާތަކުން ޚަބަރު ފަތުރަމުންދާ ދަނޑިވަޅެއްގައެވެ. މި ތުހުމަތުތައް ދޮގުކުރުމަށް ސަޢުދީ ޢަރަބިއާގެ ރަސްމީ ޓީވީން ވަނީ ޙަރީރީ އާއި އެ ޤައުމުގެ ރަސްގެފާނު ބައްދަލުކުރައްވާ ވީޑިއޯއެއްވެސް ޢާއްމުކޮށްފައެވެ.