އިންޑޮނޭޝިއާގެ ރިސޯޓް ރަށެއް ކަމަށްވާ ބާލީގެ އަލިފާންފަރުބަދައެއް ކަމަށްވާ މައުންޓް އަގުންގް މަތިން އެއްވެސް މަތިންދާބޯޓެއް ދަތުރުނުކުރުމަށް އެ ޤައުމުން އަންގައިފިއެވެ. އިންޑޮނޭޝިއާއިން ވަނީ ބާލީގެ އަލިފާންފަރުބަދަ މަތިން ދަތުރުނުކުރުމަށް އަންގައި ރެޑް އެލަރޓެއް ނެރެފައެވެ.
އިންޑޮނޭޝީއާއިން ރެޑް އެލަރޓެއް ނެރެފައިވަނީ އެ ފަރުބަދައިން ގިނަ ޢަދަދެއްގެ ދުމާ އަޅި ބުރަމުންދާ ދަނޑިވަޅެއްގައެވެ. އަލިފާންފަރުބަފައިން ދުމާއި އަޅި ބުރަމުން ދިއުމުގެ ސަބަބުން ބާލީއަށް ދަތުރުކުރާ ގިނަ ޢަދަދެއްގެ މަތިންދާބޯޓުތައް ވަނީ އެރަށަށް ދަތުރުކުރުން ހުއްޓާލާފައެވެ.
މީގެ އިތުރުން، އެ ރަށުގައި ދިރިއުޅޭ މީހުންގެ ސިއްޙަތަށް ގެއްލުން ލިބިދާނެތީ ރައްކާތެރި ފިޔަވަޅު އެޅުމަށްވެސް އިންޑޮނޭޝީއާގެ ސަރުކާރުން ވަނީ އަންގާފައެވެ.
އެގޮތުން، އިންޑޮނޭޝީއާގެ ސަރުކާރުން ވަނީ އެރަށުގައި ދިރިއުޅޭ މީހުން ރައްކާތެރި ސަރަޙައްދުތަކަށް ގެންދިއުމާ ދުމާ އަޅިން ރައްކާތެރިވުމަށް މާސްކް ބަހާފައެވެ. ތަފާސްހިސާބުތަކުން ދައްކާ ގޮތުގައި މިހާތަނަށް 40،000 މީހުން ރައްކާތެރި ހިސާބުތަކަށް ގެންގޮސްފައިވާއިރު، އޭގެ ތެރެއިން ފަންސަވީސް ހާސް މީހުން ދިރިއުޅެމުންދަނީ ރައްކާތެރި ހިޔާތަކުގައެވެ.
މައުންޓް އަގުންގް އެންމެ ފަހުން ގޮވާފައިވަނީ 1963 ވަނަ އަހަރުގައެވެ. އެ ފަހަރުގެ ގޮވުމުގައި 1000 އަށްވުރެ ގިނަ މީހުން ވަނީ މަރުވެފައެވެ.