މުސްލިމުންގެ ފުރަތަމަ ޤިބުލަ އަދި ތިންވަނަ ހަރަމްފުޅު ކަމަށްވާ މާތްވެގެންވާ މަސްޖިދުލް އަޤްޞާ ހުންނަ އަލް ޤުދުސް ހިމާޔަތްކުރުމަށް ގުޅިގެން މަސައްކަތްކުރުމަށް ތުރުކީވިލާތާއި އުރުދުން އިން އެއްބަސްވެއްޖެއެވެ.
ތުރުކީވިލާތުގެ ރައީސް ތައްޔިބު އުރުދުޣާނާއި އުރުދުންގެ ރަސްގެފާނު އަބްދުﷲ ދެވަނަ ފޯނުން ގުޅުއްވައި މަޝްވަރާ ކުރެއްވީ، އިސްރާއީލުގެ އަޅުވެތިކަމާއި އިސްތިޢުމާރުގެ ވަކިތަކުން މާތްވެގެންވާ މަސްޖިދުލް އަޤްޞާ އާއި ޤުދުސް ސަލާމަތްކުރުމާ ބެހޭގޮތުންނެވެ.
އެ ގޮތުން ޤުދުސާ ދެކޮޅަށް އިސްރާއީލުން ހިންގާ ޢުދުވާނީ ހަރަކާތްތަކާ ކުރިމަތިލުމަށާއި ޤުދުސަކީ އިސްރާއީލުގެ ވެރިރަށްކަމުގައި ބަލައިގަތުމަށް އެމެރިކާ ނިންމި ބާތިލް ނިންމުމާ ދެކޮޅަށް ބައިނަލްއަޤުވާމީ ފެންވަރުގައި ޚާއްސަ މަސައްކަތްތަކެއް ކުރުމަށް ތުރުކީވިލާތާއި އުރުދުންގެ ވެރިން އެއްބަސްވެވަޑައިގެންނެވިއެވެ.
އިސްރާއީލުގެ އަޅުވެތިކަމާއި އިސްތިޢުމާރުގެ ދަށުގައި މާތްވެގެންވާ މަސްޖިދުލް އަޤްޞާ ހުރި ނަމަވެސް އެ މިސްކިތް މަރާމާތުކުރުމާއި އެ މިސްކިތަށް އިމާމުން ލެއްވުމާއި މިސްކިތުގެ އިދާރީކަންކަން ބެލެހެއްޓުންފަދަ ކަންކަމުގައި އުރުދުން އިން މުހިއްމު ދައުރެއް އަދާކުރަމުން ގެންދެއެވެ.
ކުރިޔަށް އޮތް ތަނުގައިވެސް އުރުދުން އިން މި ދައުރު އަދާކުރުމުގައި އެ ޤައުމަށް އެހީތެރިވާނެކަމުގެ ޔަޤީންކަން އުރުދުޣާން ވަނީ އުރުދުންގެ ރަސްގެފާނަށް ދެއްވާފައެވެ.