އީރާނުގައި ކާބޯތަކެއްޗާއި ޚިދުމަތްތަކުގެ އަގު ބޮޑުވަމުންދާ މައްސަލައިގައި ރައްޔިތުން ކުރަމުންގެންދާ މުޒާހަރާތަކުގެ ތެރެއަށް ބޭރުގެ އޭޖެންޓުން ވަދެ، ޤައުމު ހަމަނުޖެހުންތަކެއްގެ ތެރެއަށް ވައްޓާލަން މަސައްކަތްކުރާކަމަށް އެ ޤައުމުގެ ސަރުކާރުން ބުނެފިއެވެ. އީރާނުގެ ރިވޮލޫޝަނަރީ ގާޑުންގެ އިދާރާއިން ބުނީ ބޭރުގެ ފަރާތްތަކާ ގުޅިފައިވާ އީރާނުގެ އޭޖެންޓުން ހަމަނުޖެހުން އުފެއްދުމުގެ ބޭނުމުގައި މުޒާހަރާތަކުގެ ތެރެއަށްވަދެ މީހުންގެ ގަޔަށް ބަޑިޖަހައި އެކަމުގެ ބަދުނާމު ސަރުކާރުގެ ބޮލުގައި އަޅުވަން މަސައްކަތް ކުރަމުންގެންދާކަމަށެވެ.
އީރާންގެ ބައެއް ސިޓީތަކުގައި މިދިޔަ ބުރާސްފަތިދުވަހު ސަރުކާރާ ދެކޮޅަށް އާންމުން ފެށި މުޒާހަރާތައް ބޮޑުވެ ފުޅާވަމުންދާއިރު އެ ޤައުމުގެ ސަލާމަތީ ބާރުތަކުން ބުނަނީ ސުލްޙަވެރި މުޒާހަރާތަކަށް ފުރުޞަތު ދޭނެކަމަށެވެ. އެހެން ނަމަވެސް ހަމަނުޖެހުން އުފައްދަން މަސައްކަތްކުރާ ފަރާތްތައް ހައްޔަރު ކުރާނެކަމުގެ އިންޒާރު ސަލާމަތީ ބާރުތަކުން ވަނީ ދީފައެވެ.
އަދި މުޒާހަރާކުރާ މީހުންގެ ގަޔަށް ބަޑިޖަހާފައި ނުވާނެކަމަށްވެސް އީރާނުގެ މަސްއޫލުވެރިން ވިދާޅުވިއެވެ. އީރާނުން މިހެން ބުނީ މުޒާހަރާކުރި މީހުންގެ ތެރެއިން ދެ މީހެއްގެ ގަޔަށް ބަޑިޖެހުމުގެ ސަބަބުން މަރުވުމާ ގުޅިގެންނެވެ. އެ ދެ މީހުން މަރުވީ ބޭރުގެ ފަރާތްތަކާ ގުޅިފައިވާ އޭޖެންޓުން، ޖަނަވާރު ޝިކާރަ ކުރަން ގެންގުޅޭ ބާވަތުގެ ބަޑި ހިފައިގެން މުޒާހަރާތަކުގެ ތެރެއަށް ވަދެ، އެމީހުންނަށް ހަމަލާދިނުމުންކަމަށް އީރާނުން ބުނެއެވެ.
އީރާނަކީ ސުލްވެރި މުޒާހަރާތަކަށް ފުރުސަތު ދޭ ގައުމެއް ކަމުގައިވާ ނަމަވެސް މުޒާހަރާތައް ހަމައިން ނައްޓައިގެން ހިނގައްޖެނަމަ ބާރުގެ ބޭނުންކުރާނެކަމުގެ އިންޒާރު އެ ޤައުމުގެ ސަރުކާރުންވަނީ ދީފައެވެ. އީރާނުގެ ދާޚިލީ ވަޒީރު ރަހްޟާން ފަޟްލީ ވިދާޅުވީ މުޒާހަރާތަކުގައި ޤާނޫނުތަކަށް އިހުތިރާމް ނުކޮށް ތަންތަނަށް ގެއްލުންދޭނަމަ ބާރުގެ ބޭނުންކޮށްގެން މުޒާހަރާތައް ރޫޅާލާނެކަމަށެވެ. ނަމަވެސް ރައްޔިތުންގެ އަޑުއަހާނެ ކަމަށާއި، އެމީހުންގެ ދަތިތަކާއި މައްސަލަތައް ހައްލުކުރަން ސަރުކާރުން މަސައްކަތް ކުރާނެކަމަށް އޭނާ ވިދާޅުވިއެވެ.