އީރާނުގައި ކުރިޔަށްދަނީ ރައްޔިތުން ސަރުކާރާމެދު ހިތްހަމަނުޖެހޭކަން ހާމަކޮށް އެކަންކަން އިސްލާޙުކުރުމަށް ސަރުކާރަށް ގޮވާލައި ކުރަމުންގެންދާ މުޒާހަރާތަކެއް ކަމަށާއި، ނަމަވެސް އީރާނުގެ ދުޝްމަނުންގެ އޭޖެންޓުންތަކެއް މުޒާހަރާގެ ތެރެއަށްވަދެ ހަމަނުޖެހުންތައް ހިންގަމުން ގެންދާކަމަށް އެ ޤައުމުން ބުނެފިއެވެ.
އީރާނުގެ ޖާސޫސީ ކަންކަމާބެހޭ ވުޒާރާއިން ބުނީ ސުލްހަވެރިކަމާއެކު ޝުޢޫރުފާޅުކުރުމުގެ މަޤްޞަދުގައި ރައްޔިތުން ފެށި މުޒާހަރާތައް ޚަރާބުކޮށް ހަމަނުޖެހުން ހިންގުމަށް ހަރަކާތްތެރިވާ ފަރާތްތަކަކީ ބޭރުގެ އޭޖެންޓުންތަކެއް ކަމަށާއި، އޭގެތެރެއިން ބަޔަކު މިހާރު ހައްޔަރުކޮށްފައިވާ ކަމަށެވެ.
އީރާނުގެ ދީނީ ލީޑަރު އާޔަތުﷲ އަލީ ޚާމެނާއި ވެސްވަނީ އީރާނުގައި ހަމަނުޖެހުންތައް ހިންގަން މަސައްކަތްކުރާ ފަރާތްތަކުގެ ފަހަތުގައިވަނީ އީރާނުގެ ދުޝްމަނުންކަމަށް ސިފަކުރައްވާފައެވެ.
މުޒާހަރާތަކުގައި ހަމަނުޖެހުން އުފެއްދުމަށް މަސައްކަތްކުރާކަމަށް ތުހުމަތުކޮށް، ތިން ދުވަސް މަތިން، ހަތަރު ސަތޭކައަށްވުރެ ގިނަމީހުން އީރާނުން ހައްޔަރުކޮށްފައިވެއެވެ.
އީރާނުގެ ރައްޔިތުން ސަރުކާރާ ދެކޮޅަށް މުޒާހަރާތައް ފަށާފައިވަނީ ތަކެތީގެ އަގުބޮޑުވުމާއި ވަޒީފާ މަދުވުމާއި އެނޫންވެސް އިޤްތިޞާދީ މައްސަލަތަކާ ގުޅިގެންކަމަށް މުޒާހަރާތަކުގައި އިސްކޮށް ހަރަކާތްތެރިވާ ފަރާތްތަކުން ހާމަކޮށްފައިވެއެވެ.