އީރާނުގެ ސަރުކާރަށް ތާއިދުކޮށް އެ ޤައުމުގެ އެކި ސަރަހައްދުތަކުގައި ހުކުރު ދުވަހު ވަރުގަދަ މުޒާހަރާތަކެއް ބާއްވައިފިއެވެ. މި މުޒާހަރާތަކުގައި އެތައްހާސް ބަޔަކު ބައިވެރިވެފައިވާކަމަށް އީރާނުގެ ޤައުމީ ޓީވީން ރިޕޯޓްކޮށްފައިވެއެވެ.
މި މުޒާހަރާގެ ބައިވެރިން ވަނީ އީރާނުގެ ސަރުކާރާއި އެ ޤައުމުގެ ދީނީ ލީޑަރުންނަށް ތާއީދުކޮށް އަޑުއުފުލާފައެވެ. މީގެ އިތުރުން، މުޒާހަރާގެ ބައިވެރިން ވަނީ އެމެރިކާއާ ދެކޮޅަށްވެސް އަޑު އުފުލާފައެވެ.
އީރާނުގައި އެ ޤައުމުގެ ސަރުކާރަށް ތާއީދުކޮށް މުޒާހަރާ ކޮށްފައި މިވަނީ، އެގައުމުގެ އެކި ސަރަހައްދުތަކުގައި އެ ޤައުމުގެ ސަރުކާރާ ދެކޮޅަށް ވަރުގަދަ މުޒާހަރާތަކެއް ކުރަމުންދާ ދަނޑިވަޅެއްގައެވެ. ވޭތުވެދިޔަ ހަފުތާގައި ކުރި މުޒާހަރާތަކުގައި ހިންގި ހަމަނުޖެހުންތަކުގައި މިހާތަނަށް 22 މީހުން ވަނީ މަރުވެފައެވެ. އަދި އެ މުޒާހަރާތަކާ ގުޅިގެން އެއްހާހަށްވުރެ ގިނަ މީހުން ހައްޔަރުކޮށްފައިވާކަމަށް އީރާނުގެ އޮފިޝަލުން ބުނެއެވެ.
މުޒާހަރާތައް ފަށާފައިވަނީ މިދިޔަ ޑިސެމްބަރު މަހުގެ 28 ވަނަ ދުވަހު، އީރާނުގެ ދެވަނައަށް އެންމެ ބޮޑު ސިޓީ ކަމަށްވާ މަޝްހަދުގައެވެ. އެއަށް ފަހު މި މުޒާހަރާތައް އެ ގައުމުގެ 80 ސިޓީއަކަށް ފެތުރިގެން ދިޔައެވެ.