ކްލަބް އީގަލްސްގެ ކެޕްޓަން އިމްރާން ނަޝީދު ނިއުރޭޑިއަންޓަށް ބަދަލުވެއްޖެއެވެ.
އޭއެފްސީކަޕަށް ވަރުގަަކުރަމުންދާ ނިއުރޭޑިއަންޓުން އިމްރާން ނަޝީދު ގެނައި ކޯޗު އޮސްކާ ބުރޫޒަން ޝައުޤުވެރިވާ ކުޅުންތެރިއަކަށް ވުމުންނާއި، މަސައްކަތުގެ ރޭޓް ރަނގަޅު މޮޅު ކުޅުންތެރިއަކަށްވުމުންކަމަށް އެކުލަބުން ބުނެއެވެ. 2016 ވަނަ އަހަރު އީގަލްސްއިން ޕްރެޒިޑެންޓްކަޕް ކާމިޔާބުކުރިއިރު އެންމެ މުޙިއްމު ދައުރެއް އަދާކުރި އެއް ކުޅުންތެރިއަކީވެސް އޭނާއެވެ. ވަރުބަލިކަމެއް ނެތި މެދުތެރޭގައި މަސައްކަތްކުރާ އިންމަ އަންނަނީ މިފަހުން ޤަވާއިދުން ޤައުމީ ޓީމުން ޖާގަ ހޯދަމުންނެވެ. މިދިޔަ ސީޒަންގައި މާލޭ ލީގުގެ ގަދަ ހަތަރަކުން އީގަލްސްއަށް ޖާގަ ނުލިބުމުން ދިވެހި ޕްރިމިއަރ ލީގުގައި އޭނާ ކުޅުނީ ގދ.ތިނަދޫ ޓީމަށެވެ.
އިންމަގެ އިތުރުން ނިއުއިން ވަނީ މިޑްފީލްޑަރ މުޙައްމަދު އުމެއިރުވެސް ގެނެސްފައެވެ. އަދި ޒުވާން ޑިފެންޑަރ ހިޝާން ސަލީމްވެސް ވަނީ ނިއުއަށް ސޮއިކޮށްފައެވެ. ނިއުރޭޑިއަންޓުން ވަނީ ޓީމްގެ މުޙިއްމު ކުޅުންތެރިންގެ އެއްބަސްވުންވެސް އާކޮށްފައެވެ. އޭގެ ތެރޭގައި ސީޒަންގެ މެދުތެރެއިން ނިއުއާ ގުޅުނު ރިލްވާން ވަހީދާއި، ހަސަން އަދުހަމްއާއި، ކީޕަރު ފައިސަލްވެސް ހިމެނެއެވެ.
ނިއުރޭޑިއަންޓުން އަންނަނީ ބިދޭސީ އިތުރު ތިން ކުޅުންތެރިން ގެނައުމަށްވެސް މަސައްކަތް ކުރަމުންނެވެ. ސެންޓަރ ފޯވާޑެއްގެ އިތުރުން ނިއުއިން ގެންނަނީ ދެ ޑިފެންޑަރުންނެވެ. މައުލޫމާތު ލިބިފައިވާގޮތުގައި ތިން ކުޅުންތެރިންވެސް ކްލަބުން ވަނީ ފައިނަލްކޮށްފައެވެ. މިދިޔަ ސީޒަންގައި ކުޅުނު ކުޅުންތެރިންގެ ތެރެއިން ކަންޑޭލާގެ އެއްބަސްވުން ސީޒަން ނިމުމުގެ ކުރިން ނިއުއިން ވަނީ އާކޮށްފައެވެ.