ޗައިނާއިން އިޢުލާންކޮށްފައިވާ "ވަން ބެލްޓް ވަން ރޯޑް" އިނީޝިއޭޓިވަށް ވިލާތުން އެއްބާރުލުން ދިނުމަށް ފަރަންސޭސި ރައީސް އެމެނުއެލް މެކްރޯން ވިލާތުގެ ޤައުމުތަކަށް ގޮވާލައްވައިފިއެވެ. ޗައިނާއަށް ކުރައްވަމުންގެންދަވާ ރަސްމީ ދަތުރުފުޅެއްގައި މެކްރޯން ވިދާޅުވީ "ވަން ބެލްޓް ވަން ރޯޑް" އިނިޝިއޭޓިވަކީ ވިލާތަށްވެސް އޮތް ވިޔަފާރީގެ ފުރުޞަތެއް ކަމަށާއި، ޗައިނާއިން ބިނާކުރަމުން ގެންދާ އައު ސިލްކް ރޫޓްގައި ބައިވެރިވުމަކީ ވިލާތުގެ އިޤްތިޞާދަށް އިތުރު ކުރިއެރުމެއް ލިބިގެންދާނެ ކަމެއްކަމަށެވެ.
މި މޭރުމުން ވާހަކަފުޅުދައްކަވަމުން ޗައިނާގެ އެ އިސްނެގުމަށް ފަރަންސޭސިވިލާތް ތާއީދުކުރާ ކަމަށާއި، އައު ސިލްކް ރޫޓްގައި މުހިއްމު ދައުރެއް އަދާކުރަން ފަރަންސޭސިވިލާތް ތައްޔާރަށް އޮތްކަމަށް މެކްރޯން ވިދާޅުވިއެވެ. މެކްރޯން ފަރަންސޭސިވިލާތަށް ކުރައްވާ ދަތުރުފުޅުގެ ބޭނުމަކީ ޗައިނާގެ ބާޒާރުން ފަރަންސޭސި ކުންފުނިތަކަށާއި ފަރަންސޭސި އުފެއްދުންތަކަށް މިހާރަށްވުރެ ބޮޑު ޖާގައެއް ލިބޭނެގޮތް ހޯދުމެވެ.
މެކްރޯންގެ ދަތުރުފުޅުގައި ފަރަންސޭސި ބޮޑެތި ކުންފުނިތަކުގެ އިސްވެރިންނާއި ފަރަންސޭސި ވިޔަފާރިވެރިންގެ ތެރެއިން ފަންސާހަށްވުރެ ގިނަ ބޭފުޅުން ބައިވެރިވެ ވަޑައިގަންނަވައެވެ. މި ދަތުރުފުޅުގައި މެކްރޯން ވަނީ ޗައިނާގެ ރައީސް ޝީ ޖިންޕިން އާ ބައްދަލުކުރައްވާފައެވެ.