މިޔަންމާއިން ބަންގްދަލޭޝަށް ހިޖުރަކޮށްފައިވާ އެތައް ހާސް ބަޔަކު އަނބުރާ ޤައުމަށް ގެންދިއުމަށް މިޔަންމާ އަދި ތައްޔާރު ނުވާކަމަށް އދން ބުނެފިއެވެ. އދގެ އިންސާނީ އެހީއާ ބެހޭ އިދާރާގެ އެސިސްޓަންޓް އަންޑަރ ސެކްރެޓަރީ އަރސެލާ މުލަރ އެ ސަރަޙައްދަށް ކުރެއްވި ދަތުރުފުޅަކަށް ފަހު ވިދާޅުވެފައިވަނީ، މިދިޔަ އަހަރު ބަންގްލަދޭޝާއި މިޔަންމާއާ ދެމެދު އެއްބަސްވުމެއް ޤާއިމުކުރި ނަމަވެސް، މިޔަންމާއިން އެ އެއްބަސްވުން ތަންފީޒުކޮށްފައިނުވާކަމަށެވެ.
މިޔަންމާގެ ރަކާން ސްޓޭޓްގައި އެ ޤައުމުގެ އަސްކަރިއްޔާއިން މިދިޔަ އަހަރު ހިންގި އޮޕަރޭޝަންތަކުގެ ސަބަބުން އެކަނިވެސް މިޔަންމާގެ ބައިމަދު ރޮހިންޔާ ނަސްލުގެ މީހުންގެ ހަތް ސަތޭކަ ހާސް މީހުން ހުސްވި އަހަރު ބަންގްލަދޭޝަށް ހިޖުރަކޮށްފައިވެއެވެ. މި ރެފިއުޖީން އެމީހުންގެ ވަޒަނަށް އަނބުރާ ފޮނުވާލުމާ ބެހޭގޮތުން މިޔަންމާ އާއި ބަންގްލަދޭޝްގެ ސަރުކާރާ ދެމެދު ހުސްވި އަހަރު އެއްބަސްވުމެއް ޤާއިމުކުރި ނަމަވެސް މި އެއްބަސްވުމުގެ ދަށުން އަދި އެއްވެސް ފިޔަވަޅެއް އަޅާފައެއް ނުވެއެވެ. މި ކަމަށް ތައްޔާރުވުމުގެ ގޮތުން މިޔަންމާއިން ބައެއް ފިޔަވަޅުތައް އަޅަމުންދާއިރު މީގެ ތެރޭގައި އަނބުރާ ޤައުމަށް ފުރަތަމަ ގެންދާނެ ރެފިއުޖީންގެ މަޢުލޫމާތު ސާފުކޮށް ސައްހަތޯ ބެލުމުގެ މަސައްކަތްތައް މިޔަންމާއިން ކޮށްފައިވާކަމަށް އެ ޤައުމުން މަޢުލޫމާތުދެއެވެ. އެހެންނަމަވެސް، އދން މިވަނީ، މިޔަންމާގެ އެތައް ހާސް ރެފިއުޖީން އަނބުރާ ޤައުމަށް ގެންދިއުމަށް މިޔަންމާ އަދި ތައްޔާރުނުވާކަމަށް ބުނެފައެވެ. އދން މިހެން ބުނެފައިވަނީ މިޔަންމާގެ ހާލަތު ވިލަރެސްކުރެއްވުމަށް އެ ޖަމާޢަތުގެ އިސް އޮފިޝަލެއް އެ ޤައުމަށް ކުރެއްވި 6 ދުވަހުގެ ދަތުރަށް ފަހުގައެވެ.
ރޮއިޓަރސަށް ދެއްވި ބަސްދީގަތުމެއްގައި އދގެ އިންސާނީ އެހީއާބެހޭ އިދާރާގެ އެސިސްޓަންޓް އަންޑަރ ސެކްރެޓަރީ އަރސެލާ މުލަރ ވިދާޅުވީ، ދަތުރުގައި ފެނުނު ކަންކަމާއި އިވުނު ބަޔާންތަކަށް ބަލާއިރު ރެފިއުޖީންނަށް އެކަށީގެންވާ ގޮތަކަށް ސިއްޙީ ޚިދުމަތްތައް ނުލިބުމާއި އެ ފަދަ ފަރާތްތަކަށް އެކަށީގެންވާ ރައްކާތެރިކަން ނުލިބުމުގެ އިތުރުން ގިނަ ފަރާތްތައް ހާލުގައި ޖެހިގެން އުޅުން ފަދަ ކަންކަން ފާހަގަވެފައިވާކަމަށެވެ.
އެހެންކަމުން، ރެފިއުޖީންނަސް މިޔަންމާއަށް އެނބުރި ދިއުމަކީ މިވަގުތު ކުރެވެން އޮތްކަމެއް ނޫންކަމަށް މުލަރ ވިދާޅުވި.
މުލަރ ވިދާޅުވީ، މިޔަންމާގައި ރޮހިންޔާ މުސްލިމުންނާ ދެކޮޅަށް ހިންގަމުންދާ އަނިޔާވެރި ޢަމަލުތައް ހުއްޓާލާ، ބަންގްލަދޭޝްގައި ތިބި ރެފިއުޖީންނަށް މިޔަންމާގައި ކުރިމަތލާންޖެހުނު މައްސަލައަށް ދާއީމީ ހައްލެއް ހޯދުން މުހިއްމުކަން މިޔަންމާގެ އޮފިޝަލުންނަށް، އެ ދަތުރުގައި ބަޔާކޮށްދެއްވާފައިވާނެކަމަށެވެ.
މުލަރ ވަނީ، ރެފިއުޖީން އަނބުރާ ގައުމަށް ގެންނަން ޖެހޭނީ މިޔަންމާއިން ބޭނުންވެގެން ކަމަށާއި، ރޮހިންޔާ ދަރިކޮޅުގެ މީހުންނަށްވެސް އެމީހުންނަށް ޙައްޤު ޢިއްޒަތާއި ޤަދަރު ދޭންޖެހޭނެކަން ފާހަގަކުރައްވާފައެވެ.