އިރުމަތީ އަފްޣާނިސްތާނުގެ ކްރިކެޓް ކުޅޭ ސްޓޭޑިއަމެއްގައި ހުކުރު ދުވަހު ދިން ނުރައްކާތެރި ބޮމުގެ ހަމަލާ އދން ކުށްވެރިކޮށްފިއެވެ. މި ހަމަލާގައި އަށް މީހުން މަރުވެ 55 މީހަކު ޒަޚަމްވިއެވެ.
އދގެ ސެކްރެޓަރީ ޖެނެރަލްގެ ތަރުޖަމާނުގެ ނާއިބު ފަރްޙާން ހަޤް ނެރުއްވި ބަޔާނެއްގައި ވިދާޅުވެފައިވަނީ، އދގެ ސެކްރެޓަރީ ޖެނެރަލް އެންތޯނިއޯ ގުޓެރޭޝް މި ހަމަލާ ހަރުކަށި އިބާރާތުން ކުށްވެރިކުރައްވާކަމަށެވެ. ޢާއްމުންނަށް އަމާޒުކޮށްގެން ދޭ މިފަދަ ހަމަލާތަކަކީ އިންސާނީ ޙައްޤުތައް ހިމާޔަތް ކުރުމަށް ޤާއިމުކޮށްފައިވާ ބައިނަލްއަޤްވާމީ ޤާނޫނުތަކާ ޚިލާފަށް ދޭ ހަމަލާތަކެއް ކަމަށާއި، މިފަދަ ހަމަލާތަކަކަށް މަޤްބޫލު އެއްވެސް އުޒުރެއް ނުދެއްކޭނެކަމަށް މިބަޔާނުގައި ބުނެފައިވެއެވެ. ހަޤްގެ ބަޔާނުގައި އިތުރަށް ބުނެފައިވަނީ، އަފްޣާނިސްތާނުގައި ހަނގުރާމަ ކުރަމުންދާ ހުރިހާ ފަރާތްތަކުން ވެސް ޢާއްމުންނަށް ގެއްލުން ނުވާނެހެން ޢަމަލުކުރާނެކަމަށް އދން އުއްމީދުކުރާ ކަމަށެވެ.
އަފްޣާނިސްތާނުގެ ޖަލާލްއާބާދުގައި ހުންނަ ސްޓޭޑިއަމަށް އަމާޒުކޮށްގެން ދިން މި ހަމަލާގައި ހަތަރު ބޮމެއް ބޭނުންކޮށްފައިވާކަމަށާއި، މީގެ ތެރެއިން ދެ ބޮމެއް ގޮއްވާލާފައިވަނީ ސްޓޭޑިއަމްގެ ތެރޭގައިކަމަށް އަފްޣާނިސްތާނުގައި ހުންނަ އދގެ މިޝަނުން ވަނީ ބުނެފައެވެ. މި ހަމަލާގެ ޒިންމާ، އެއްވެސް ފަރާތަކުން އަދި އުފުލާފައެއް ނުވެއެވެ.
މި އަހަރުގެ މިހާތަނަށް އަފްޣާނިސްތާނުގައި ދީފައިވާ ހަމަލާތަކުގައި ހަތް ސަތޭކަ ފަސްދޮޅަސް ތިން މީހުން މަރުވެ 1495 މީހުން ވަނީ ޒަޚަމްވެފައެވެ.