ދުނިޔޭގެ އެންމެ މުއްސަނދި ކުޅުންތެރިންގެ ލިސްޓުގައި ވާދަވެރި ކްރިސްޓިއާނޯ ރޮނާލްޑޯ އަށްވުރެ ކުރިއަށް ބާސެލޯނާ އާއި އާޖެންޓީނާގެ ފޯވަޑް ލަޔޮނަލް މެސީ ޖެހިލައިފިއެވެ.
ފޯބްސްއިން ނެރުނު ލިސްޓުގައި މެސީ ހިމެނެނީ ދެ ވަނާގަ އެވެ. އެއްވަނާގައިވަނީ 285 މިލިއަން ޑޮލަރު ލިބޭ މަޝްހޫރު ބޮކްސިން ތެޅުންތެރިޔާ ފްލޮއިޑް މޭވެދާއެވެ. ކުރިން މި ލިސްޓުގެ ދެ ވަނާގައިހުރި ރޮނާލްޑޯ އަށް މި ފަހަރު ލިބުނީ ތިން ވަނައެވެ.
ރޮނާލްޑޯގެ އާމްދަނީ އަކީ 80 މިލިއަން ޕައުންޑެވެ. މެސީގެ އާމްދަނީ އަކީ 82 މިލިއަން ޕައުންޑެވެ.
ރޮނާލްޑޯ އަށްވުރެ ކުރި މެސީ އަށް ލިބުނު އެއް ސަބަބަކީ ބާސެލޯނާއިން މި އަހަރު އޭނާގެ ކޮންޓްރެކްޓް އާކޮށް، ދުނިޔޭގެ އެންމެ މުސާރަބޮޑު ފުޓްބޯޅަ ކުޅުންތެރިޔާ އަށް މެސީ ހަދާފައިވުމެވެ. މިހެންވެ ރޮނާލްޑޯ ވަނީ ރެއާލް މެޑްރިޑުން އޭނާގެ މުސާރަ ބޮޑުނުކުރާނަމަ އެކުލަބު ދޫކޮށްލާނެ ކަމުގެ އިޝާރާތެއްދީފައެވެ.
ފޯބްސްއިން ބުނީ ދުނިޔޭގެ އެންމެ މޮޅު ކުޅުންތެރިޔާގެ މަޤާމު ފަސް ފަހަރު ހޯދާފައިވާ ދެ ކުޅުންތެރިންގެ ތެރެއިން މެސީއަށް މުސާރަ އާއި ބޯނަސްގެ ގޮތުގައި ލިބެނީ އަހަރަކު 59 މިލިއަން ޕައުންޑް ކަމަށެވެ. މީގެ އިތުރުން ޕެޕްސީ އާއި އެޑިޑާސް ފަދަ ކުންފުނިތަކުން ލިބިފައިވާ ފުރުސަތުތަކާއެކު މެސީގެ އާމްދަނީ އިތުރުވާ ކަމަށެވެ.
ދުނިޔޭގެ އެންމެ އަގުބޮޑު ކުޅުންތެރިޔާގެ ގޮތުގައި ބާސެލޯނާ ދޫކޮށް ފްރާންސްގެ ޕީއެސްޖީ އަށް ބަދަލުވި ބްރެޒިލްގެ ނޭމާ ހިމެނެނީ ފަސް ވަނައަށް އެންމެ މުއްސަނދި ކުޅުންތެރިޔާ އަށެވެ. އޭނާ އަށް އަހަރަކު ލިބެނީ 67 މިލިއަން ޕައުންޑެވެ.