ދެ މެޗެއްގައި އޭއެފްސީ ކަޕުގެ ގަވާއިދާ ހިލާފުވެފައިވާތީވެ އޭޝިޔާގެ ފުޓްބޯޅަ ޖަމިއްޔާއިން ނިއުރޭޑިއަންޓް ސްޕޯޓްސް ކުލަބު 4500 ޑޮލަރު (69390ރުފިޔާ) އިން ޖޫރިމަނާކޮށްފި އެވެ.
އޭއެފްސީން މުބާރާތުގެ ގްރޫޕް ސްޓޭޖުގެ މެޗުތަކުގައި ހިނގާފައިވާ ކަންތައްތަ ބެލުމަށްފަހު މި މަހުގެ އެއްވަނަ ދުވަހު ނިއު ޖޫރިމަނާކުރީ މާލޭގައި އިންޑިޔާގެ ބެންގަލޫރު އެފްސީ އާއި ބަނގްލަދޭޝްގެ ޑާކާ އަބަހާނީ މެޗުގައި، ކޮންމެހެން ފުރިހަމަ ކުރަންޖެހޭ ކަންކަން ކޮށްފައި ނެތުމުންނެވެ.
އެއީ ދަނޑުގެ ސޭފްޓީ ރެގިއުލޭޝަން ގަވާއިދުގެ ދަށުން ހުރިހާ ގޮނޑިއެއްގައި ނަންބަރު ޖަހާފައި ނެތުމާއި އިންފޮމޭޝަން އެންޑް ޓިކެޓް ގަވާއިދުގެ ދަށުން ޓިކެޓްގައި ހުންނަންޖެހޭ މައުލޫމާތު ފުރިހަމަކޮށްފައި ނެތުމުންނެވެ.
މި ގޮތުން ގޮނޑީގައި ނަންބަރު ޖަހާފައި ނެތުމުން ނިއު ޖޫރިމަނާކޮށްފައިވަނީ ކޮން މެޗަކަށް 1500 ޑޮލަރުންނެވެ. އަދި ޓިކެޓުގައި މައުލޫމާތު ފުރިހަމަކޮށްފައި ނުވާތީވެ ޖޫރިމަނާކޮށްފައިވަނީ ކޮންމެ މެޗަކަށް 750 ޑޮލަރުންނެވެ. މި ފައިސާ 30 ދުވަހުގެ ތެރޭގައި އޭއެފްސީ އަށް ދައްކަންޖެހޭނެ އެވެ.
މިއީ ފަހަކަށް އައިސް އޭއެފްސީގެ ގަވާއިދާ ހިލާފުވެގެން ރާއްޖޭގެ ކުލަބެއް ޖޫރިމަނާކުރި ދެ ފަހަރެވެ. ނިއު އެންމެ ފަހުން ޖޫރިމަނާކުރީ މީގެ ދެ އަހަރު ކުރިން އޭއެފްސީގެ ހުއްދަނެތި ދަނޑަށް މޯލްޑިވިއަން އައިޑޮލްގެ ފަންނާނުން އެރުމުގެ ކުށުގަ އެވެ.