މޮރިޝަސް އިންޓަރނޭޝަނަލްގައި ސީރީޒްގެ ދެ އިވެންޓަކުން ރާއްޖޭގެ ކުޅުންތެރިން ފައިނަލަށް ދަތުރުކޮށްފިއެވެ.
ރާއްޖޭގެ ކުޅުންތެރިން ފައިނަލުން ޖާގަ ހޯދީ އަންހެން ޑަބަލްސް އިވެންޓާއި، މިކްސް ޑަބަލްސް އިވެންޓުންނެވެ. އަންހެން ޑަބަލްސް އިވެންޓްގެ ފައިނަލުން ޖާގަ ހޯދީ ދެބެން ކަމަށްވާ އައިމިނަތު ނަބީހާ އަބުދުއްރައްޒާޤާއި، ފާޠިމަތު ނަބާހާ އަބުދުއްރައްޒާޤެވެ. ޒުވާން ދެ ކުޅުންތެރިން ފައިނަލުން ޖާގަ ހޯދީ މޮރިޝަސްގެ ދެ ކުޅުންތެރިން ކަމަށްވާ ޖެމީމާއާއި ގަނޭޝާގެ ޕެއަރއާ ވާދަކޮށް ތިން ސެޓް ދެ ސެޓުން ކުރި ހޯދައިގެންނެވެ. އެއީ 21-18، 14-21 އަދި 21-8 ނެވެ.
މިކްސް ޑަބަލްސް ފައިނަލުން ޖާގަ ހޯދީ މުޙައްމަދު ޝާރިމްއާއި ޝަހުރުނާޒް މޫސާގެ ޕެއަރއެވެ. އެދެކުޅުންތެރިން ފައިނަލަށް ދަތުރުކުރީ ސެމީފައިނަލްގައި މޮރިޝަސްގެ ޓީލަކްއާއި ގަނޭޝާގެ ޕެއަރ ސީދާ ދެ ސެޓުން ބަލިކޮށްގެންނެވެ. ސެޓްތައް ގެންދިޔައީ 21-10، 21-15 ނެވެ. މިކްސް ޑަބަލްސް ސެމީފައިނަލްގައި ރާއްޖޭގެ ތޯއިފްއާއި ނަބީހާގެ ޕެއަރވެސް ވާދަކުރިއެވެ. ނަމަވެސް މޮރިޝަސްގެ ދެ ކުޅުންތެރިންނާ ވާދަކޮށް ވަނީ ދެ ސެޓުން ބަލިވެފައެވެ. އެ ދެ ކުޅުންތެރިންނަށް ވަނީ ލޯ މެޑަލް ލިބިފައެވެ.