"ޣައްޒާ ފަންޑް މޯލްޑިވްސް" އަށް މިހާތަނަށް އެއްމިލިޔަން ބާރަ ހާހައްވުރެ ގިނަ ރުފިޔާ ލިބިފައިވާކަމަށާއި، އަތޮޅުތެރޭގެ ގިނަރަށްތަކުން ޣައްޒާ ފަންޑަށް އެހީތެރިވުމަށް ފަންޑް ފޮށި ބެހެއްޓުމަށް އެދެމުންދާތީ އެފުރުސަތު ހުޅުވާލާފައިވާ ކަމަށް އެކަން އިންތިޒާމްކުރާ އަދާލަތު ޕާޓީން ބުނެފިއެވެ.
އަދާލަތު ޕާޓީން އިސްނަގައިގެން ފަލަސްތީނުގެ ރައްޔިތުންނަށް އެހީތެރިކަން ފޯރުވައިދިނުމުގެ ގޮތުން އުފައްދާފައިވާ "ޣައްޒާ ފަންޑް މޯލްޑިވްސް"ގެ އެންމެފަހުގެ މައުލޫމާތު ނޫސްވެރިންނާ ހިއްސާ ކުރުމަށް ރޭ ބޭއްވި ބައްދަލުވުމެއްގައި ވާހަކަފުޅު ދައްކަވަމުން އެޕާޓީގެ ތަރުޖަމާން އަލީ ޒާހިރު ވިދާޅުވީ، މިހާތަނަށް ފަންޑުގައި ބައިވެރިވުމަށް އަތޮޅުތެރޭގެ 23 ރަށަކުން އެދިފައިވާކަމަށާއި، އެގޮތުން އަންނަ ހުކުރުދުވަހު 16 ރަށެއްގައި ފަންޑް ފޮށި ބަހައްޓާނެކަމަށެވެ.
އަދާލަތު ޕާޓީއަށް ކޮންމެރަށެއްގައި ފޮށްޓެއް ނުބެހެއްޓުނުނަމަވެސް ރަށު ކައުންސިލްތަކާއި ޖަމިއްޔާ ޖަމާއަތްތަކަށް ގުޅިގެން ޣައްޒާ ފަންޑްގައި ބައިވެރިވެވޭނެ ކަމަށް އަލީ ޒާހިރު ވިދާޅުވިއެވެ. ޚާއްސަކޮށް ރަށްރަށުގައި ފަންޑަށް ފައިސާ ހޯދުމުގެ ގޮތުން ތަފާތު ހަރަކާތްތައް ހިންގިދާނެކަން އަލީ ޒާހިރު ފާހަގަކުރެއްވިއެވެ.
ފަންޑުގައި ބައިވެރިވާން ބޭނުންވާ ފަރާތްތަކުން އެޕާޓީގެ ޚާއްސަ ހޮޓްލައިން 9713913 ނަންބަރާއި 7422424 ނަންބަރަށް ގުޅުއްވައި ބައިވެރިވަމުން ގެންދިޔުމަށް އެޕާޓީން އެދިފައިވެއެވެ.
ފަންޑަށް މިހާތަނަށް އެހީ ލިބިފައިވަނީ މާލެ ސަރަހައްދުން ކަމަށްވާއިރު، މާލޭގެ ފިހާރަތަކާއި މާލެވިލިނގިލީގައި މާދަމާއިން ފެށިގެން ފަންޑުފޮށި ބަހައްޓާނެކަމަށް އަދާލަތު ޕާޓީން މައުލޫމާތުދެއެވެ.