އާޖެންޓީނާގެ ކުޅުންތެރިންނާއި ކޯޗާ ދެމެދު މައްސަލަ ޖެހިފައިވާ ވާހަކަ މިޑްފީލްޑަރު ހާވިއާ މަޝެރާނޯ ދޮގުކޮށްފިއެވެ.
ކުޅުނު ދެ މެޗުން އެންމެ ޕޮއިންޓެއް ލިބި، އާޖެންޓީނާ ވަރލްޑް ކަޕުން ކެޓުމުގެ ބިރާ ކުރިމަތިލާއިރު އާޖެންޓީނާގެ ފުޓްބޯޅަ ފެރަޑޭޝަނުގެ ރައީސް އިއްޔެ ވަނީ ނޫސްވެރިންނާ ބައްދަލުކޮށްފައެވެ. މި ބައްދަލުވުމުގައި މަޝެރާނޯ ބުނީ ބަލިވި ދެ މެޗަށް ފަހު ކުޅުންތެރިންނާއި ކޯޗާއެކު މަޝްވަރާ ކުރެވިފައިވާ ކަމަށެވެ.
"އެއީ ދަނޑުމަތީގައި އަހަރެމެންނަށް ދަތިވާ ކަންކަން ދެނެގަތުމެއް ބޭއްވި ބައްދަލުވުމެއް. އެއީ އާއްމު އުސޫލުން ފުޓްބޯޅައިގެ ވާހަކަ ދައްކަން ބޭއްވި ބައްދަލުވުމެއް. ކޯޗާއި ކުޅުންތެރިންގެ އޮތީ އާއްމުކޮށް އޮންނަ ފަދަ އާދައިގެ ގުޅުމެއް. ބާސެލޯނާގައި ވެސް މިކަން އޮންނަނީ މިހެން. ކަމެއް ގޯސްވެއްޖެނަމަ އަހަރުމެން އެކަމަކާއިގެން ތެދުވާނަން،" މަޝެރާނޯ ބުންޏެވެ.
އޭނާ ބުނީ އެންމެވެސް މަޝްވަރާކުރީ މާދަމާ ނައިޖީރިއާ މެޗު ކާމިޔާބު ކުރެވޭނެ ގޮތަކީ ކޮބައިތޯ ބަލަން ކަމަށާއި، މެޗުގައި ރަނގަޅު ކަންތައްތަކެއް ފެނިގެންދާނެ ކަމަށް އުއްމީދު ކުރާ ކަމަށެވެ.
ނަމަވެސް ބައެއް މީޑިޔާ ރިޕޯޓްތައް ބުނާގޮތުން ކުޅުންތެރިން ވަނީ ނައިޖީރިއާ މެޗުގެ ކުރިން ކޯޗުކަމުން ސަމްޕޯލީ ދުރުކުރަން މަސައްކަތްކޮށްފައެވެ.