ދަފުތަރުގައި ޖެހުމަށް ހައުސިންގ މިނިސްޓްރީއަށް ދާ ފަރާތްތަކުގެ އައިޑީކާޑުތައް ހިފަހައްޓާކަމަށް ބުނެ ސޯޝަލް މީޑިއާގައި ފަތުރަނީ ހަޤީޤަތާ ޚިލާފު ދޮގުވާހަކައެއްކަމަށް ހައުސިންގ މިނިސްޓްރީން ބުނެފިއެވެ.
ދަފުތަރުގައި ޖެހުމަށާއި ހައުސިންގ ސްކީމްތަކަށް ކުރިމަތިލާ ފަރާތްތަކުގެ އައިޑީކާޑު މިނިސްޓްރީން ހިފަހައްޓާކަމަށް ބުނެ ބައެއް ފަރާތްތަކުން ސޯޝަލް މީޑިއާގައި ފަތުރަމުންދާ ވާހަކަތަކާއިގުޅޭ ގޮތުން މަޢުލޫމާތު ދިނުމަށް، މިއަދު ހައުސިންގ މިނިސްޓްރީން ބޭއްވި ނޫސްވެރިންގެ ބައްދަލުވުމުގައި އެމިނިސްޓްރީގެ ސީނިއަރ ޕޮލިސީ އެގްޒެކެޓިވް ހަސަން ޒަރީރު ވިދާޅުވީ، ދަފުތަރުގައިޖެހުމުގެ މަސައްކަތް ކުރިއަށްދަނީ އިލެކްޝަންސް ކޮމިޝަނާއި ޑިޕާޓްމަންޓް އޮފް ނޭޝަނަލް ރެޖިސްޓްރޭޝަނާ ގުޅިގެންކަމަށާއި، މިމަސައްކަތުގެ ސަބަބުން އެއްވެސް ފަރާތެއްގެ ވޯޓުލުމުގެ ހައްޤަށް އުނިކަމެއް ނައަންނާނެކަމަށެވެ. އަދި މިމަސައްކަތުގެ ތެރެއިން އެއްވެސް މީހެއްގެ އެވެސް މަޢުލޫމާތެއް ބޭރުނުވާނެކަމުގެ ޔަގީންކަން އޭނާ ދެއްވިއެވެ. މީގެ އިތުރުން މިހާރު ކުރިއަށް ދާގޮތުން އަތޮޅުތެރެއިން ދަފްތަރުގައި ރަޖިސްޓްރީވާ ފަރާތްތަކަށް ވަގުތީ ސްލިޕެއްދޭއިރު، މިސްލިޕަކީ ފްލެޓަށް ކުރިމަތިލުމަށް ފަސޭހަކޮށް ދިނުމުގެ ގޮތުން ހައުސިން މިނިސްޓްރީން އިންތިޒާމް ކޮށްފައިވާ ގޮތެއްކަން ޒަރީރު ފާހަގަކުރެއްވިއެވެ.
ހައުސިންގ މިނިސްޓްރީގެ ނަމުގައި ހަދައި ދައުރުކުރަމުންދާ ރަސީދުތަކަކީ ފޭކު ރަސީދުތަކެއްކަމަށް ހައުސިންގ މިނިސްޓްރީގެ ސީނިއަރ ޕޮލިސީ އެގްޒެކެޓިވް ހަސަން ޒަރީރު ވިދާޅުވިއެވެ.
މާލޭގެ ދަފްތަރުގައި ޖެހުމަށް ހުޅުވާލި ފުރުޞަތުގައި ފާއިތުވި ހަފްތާއެއްހައި ދުވަހުގެ ތެރޭގައި ދެހާސް ފައްސަތޭކަ ހަތްދިހަ ފަރާތުން ފޯމް ހުށަހަޅާފައިވާ ކަމަށް ހައުސިންގ މިނިސްޓްރީން ބުނެއެވެ. އެމިނިސްޓްރީން ބުނީ މިކަމަށް އެދި ހިޔާގެ ކަންކަންކުރިއަށްގެންދާ ޓެންޓުން ދުވާލެއްގެ މައްޗަށް ދުއިސައްތަ ހަތްދިހަ ފަރާތަށް ޚިދުމަތް ދެމުންގެންދާކަމަށެވެ. އަދި ފޯމު ހުށަހަޅާތާ ދެދުވަސްތެރޭގައި ދަފްތަރުގެ ވަގުތީ ސްލިޕް ލިބޭނެކަމަށާއި މިވަގުތުގެ ތެރޭގައިވެސް އައިޑީކާޑު އަތުނުލާނެކަމަށާއި އެކަމާއި ރައްޔިތުން ކަންބޮޑުނުވުމަށް ވެސް ވަނީ އިސްތިމާސްކޮށްފައެވެ.