ޗެލްސީން އޭނާއަށް އޮޅުވާލާފައިކަމަށް ބުނެ، ކުރީގެ ކޯޗު އެންޓޯނިއޯ ކޮންޓޭ އެކުލަބާ ދެކޮޅަށް މައްސަލަ ހުށަހަޅަން ތައްޔާރުވާން ފަށައިފިއެވެ.
އޭނާގެ އެޖެންޓް މި މައްސަލައިގެ ފައިލްތައް ތައްޔާރުކުރާ މައިގަނޑު ސަބަބަކީ ޗެލްސީން ކޮންޓޭ މަޤާމުން ވަކިކުރުން ފަސް ކުރުމުގެ ސަބަބުން އެހެން ވަޒީފާއަކަށް ދިއުމަށް ހުރަސް އެޅުމެވެ. ޗެލްސީން ކޮންޓޭ މަޤާމުން ވަކިކުރީ ކުރިއަށް އޮތް ސީޒަނަށް ޕްރެކްޓިސްވެސް ފަށާފައިވަނިކޮށެވެ. ނަމަވެސް އޭނާ މަޤާމުން ވަކިކުރާނެ ކަމަށް މިދިޔަ ސީޒަން ނިމުނުއިރު ވެސް އޮތީ ބެލެވިފައެވެ. އެއީ ދިފާއީ ޗެމްޕިއަނުންގެ ގޮތުގައި ނުކުމެ މިދިޔަ ސީޒަނުގައި ލީގުގެ ނަތީޖާތައްދަށްވެ، ޗެމްޕިއަންސް ލީގުން ވެސް ފުރުސަތު ގެއްލިފައިވުމެވެ.
ކޮންޓޭ މަޤާމުން ވަކިނުކުރާތީވެ، އޭނާ ހުރީ މި ސީޒަނުގައި ޗެލްސީއާއެކު ކުރިއަށް ދިއުމަށް ނިންމައިގެންނެވެ. މިހެންވެ ރެއާލް މެޑްރިޑުގެ ކޯޗުކަމާއި އިޓަލީގެ ޤައުމީ ޓީމުން ވެސް ލިބުނު އޮފާތައް އޭނާ ވަނީ ދޫކޮށްލައިފައެވެ.