ފްރާންސްގެ މުއްސަނދި ކުލަބު ޕީއެސްޖީއަށް ޗެލްސީގެ މިޑްފީލްޑަރު އެންގޯލޯ ކާންޓޭ ގެނައުމަށް ވާހަކަ ދެއްކި ކަމަށް ޕީއެސްޖީގެ ފްރާންސް ފޯވަޑް ކޭލިއަން އެމްބާޕޭ ބުނެފިއެވެ.
އޭނާ ބުނީ ކާންޓޭއާ ވާހަކަ ދައްކާފައިވަނީ ރަޝިޔާގައި މި މަހުގެ 15 ވަނަ ދުވަހު ނިމުނު ވޯލްޑް ކަޕުގެ ތެރޭގައި ކަމަށެވެ.
"އަހަރެންގެ މަސައްކަތަށްވީ ކުލަބުގެ ވެރިންގެ އެދުމުގެ މަތީން އޭނާއާ ވާހަކަ ދައްކައި ހިލާޔު ބަދަލުކޮށްލުން. އެކަން ކުރިން. އެކަމަކު އެހާ ބޮޑަކަށްނޫން. ސަބަބަކީ ޓްރާންސްފާގެ ސަބަބުން އޭނާގެ ވިސްނުން (ވޯލްޑް ކަޕް ކާމިޔާބުކުރުން ނޫން) އެހެން ކަމަކަށް ބަދަލުވެދާނެތީވެ،" ވޯލްޑް ކަޕް ކާމިޔާބުކުރި ފްރާންސްގެ ޓީމުގެ މިޑްފީލްޑަރާ ބެހޭ ގޮތުން އެމްބާޕޭ ބުންޏެވެ.
ކާންޓޭ އަކީ ޔޫރަޕުގައި މިހާރު ހުރި އެންމެ އިތުބާރު ޑިފެންސިވް މިޑްފީލްޑަރެވެ. އޭނާ ގަތުމަށް ސްޕޭނުގެ ބާސެލޯނާ ވެސް ޝައުގުވެރިވެއެވެ. ނަމަވެސް އަރަބި މަހުޖަނުން ހިންގާ ޕީއެސްޖީން ކުޅުންތެރިޔާ ގަތުމަށް ކިތަންމެ ބޮޑު އަގެއް ހުށަހަޅަން ވެސް ތިބީ ތައްޔާރަށެވެ. ނަމަވެސް މިކަމަށް އޮތް ހުރަހަކީ ކާންޓޭ ޗެލްސީއާއެކު ހަދާފައިވާ ކޮންޓްރެކްޓްގައި ބާކީ އެއް އަހަރު އޮތުމާއި، ކުޅުންތެރިއަކު ގެނައުމުގެ ކުރިން ބައެއް ކުޅުންތެރިން ވިއްކާލުމަށް ޕީއެސްޖީ އަށް ޖެހިފައިވުމެވެ. އެއީ ފައިނޭންޝަނަލް ފެއާޕްލޭއާ ހިލާފުވުމަށް ޗެކްފޮތްތައް ބެލެންސްކުރަންޖެހޭތީ އެވެ.