ފީފާއިން ހޮވާ ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާގެ މަޤާމަށް ވާދަކުރަން މިފަހަރު ވެސް ލަޔޮނަލް މެސީ އާއި ކްރިސްޓިއާނޯ ރޮނާލްޑޯ ހޮވުނުއިރު ގަދަ 10އިން ބްރެޒިލްގެ ތަރި ނޭމާ ކަޓައިފިއެވެ.
ބާސެލޯނާގެ އާޖެންޓީނާ ކެޕްޓަން މެސީ އާއި ޔުވެންޓަސްގެ ޕޯޗުގަލް ކެޕްޓަން ރޮނާލްޑޯ އަކީ ދުނިޔޭގެ މޮޅު ކުޅުންތެރިޔާގެ މަޤާމު މިދިޔަ 10 އަހަރު ތެރޭގައި ފަސް ފަހަރު ހޯދާފައިވާ ދެ ކުޅުންތެރިންނެވެ. މިފަހަރު އެވޯޑް ލިބޭ ކުޅުންތެރިއަކަށް ކުރި ލިބޭނެއެވެ.
ލަންޑަނުގައި ސެޕްޓެމްބަރު އޮންނަ ހަފުތާގައިދޭ މޮޅު ކުޅުންތެރިޔާގެ މަޤާމަށް ދެން ވާދަކުރަނީ ރެއާލް މެޑްރިޑުގެ ކްރޮއޭޝިޔާ ކެޕްޓަން ލޫކާ މޮޑްރިޗާއި ރެއާލްގެ ފްރާންސް ޑިފެންޑަރު ރަފޭލް ވަރާން އާއި އެތްލެޓިކޯ މެޑްރިޑުގެ ފްރާންސް ފޯވަޑް އެންޓޮއިން ގެރިއެޒްމަން އާއި މެންޗެސްޓާ ސިޓީގެ ބެލްޖިއަމް މިޑްފީލްޑަރު ކެވިން ޑެބްރޫނޭ އާއި ބެލްޖިއަމްގެ ކެޕްޓަން އެޑެން ހަޒާޑާއި އިނގިރޭސި ކެޕްޓަން ހެރީކޭންއެވެ. މީގެ އިތުރުން ދެން ވާދަކުރަނީ ލިވަޕޫލްގެ މިސުރު ފޯވަޑް މުހައްމަދު ސަލާހާއި ޕީއެސްޖީގެ ފްރާންސް ފޯވަޑް ކޭލިއަން އެމްބާޕޭ އެވެ. ގަދަ 10ގައި ނުހިމެނުނު އެންމެ މަޝްހޫރު ކުޅުންތެރިއަކީ ދުނިޔޭގެ އެންމެ އަގުބޮޑު ކުޅުންތެރިޔާ ޕީއެސްޖީގެ ބްރެޒިލް ފޯވަޑް ނޭމާއެވެ.
މީގެ ތެރެއިން އެމްބާޕޭ އަކީ ނިމިދިޔަ ވޯލްޑް ކަޕުގެ އެންމެ މޮޅު ޒުވާން ކުޅުންތެރިޔާއެވެ. ގްރިއެޒްމަން އަކީ ފްރާންސަށް ވޯލްޑް ކަޕް ތަށި ހޯދައިދިނުމުގެ އިތުރަށް މުބާރާތުގެ ތިން ވަނައަށް އެންމެ މޮޅު ކުޅުންތެރިޔާގެ އެވޯޑާއި ތިން ވަނައަށް އެންމެ ގިނަ ގޯލު ޖަހި ކުޅުންތެރިޔާއެވެ. ވަރލްޑް ކަޕުގެ އެންމެ ގިނަ ގޯލު ޖަހައިގެން ރަންބޫޓު ހޯދީ ކޭންއެވެ. ލޫކާ މޮޑްރިޗަކީ ފައިނަލްގައި ކުޅުނު ކްރޮއޭޝިޔާގެ ކެޕްޓަނުގެ އިތުރަށް ވޯލްޑް ކަޕުގެ މޮޅު ކުޅުންތެރިޔާއެވެ.
މޮޅު ކުޅުންތެރިޔާގެ މަޤާމު ހޮވަނީ ކެޕްޓަނުންނާއި ކޯޗުން އަދި ހޮވާލެވޭ 200 ނޫސްވެރިއަކާއި އާއްމުންގެ ވޯޓާއެކުގައެވެ.