ތަފާތު އެތައް ސަބަބުތަކާހުރެ ސާފް ޗެމްޕިއަންޝިޕަށް އެކުލަވާލި ޤައުމީ ސްކޮޑުގައި އަލީ އަޝްފާގް (ދަގަނޑޭ) ނުހިމަނައި ވަނީ ދޫކޮށްލާފައެވެ. ފަހަރުގައި މިއީ ކުޅުންތެރިޔާގެ ޑިސިޝަނެކެވެ. ނުވަތަ އެފްއޭމުގެ ޑިސިޝަނެކެވެ.
ދަގަނޑޭ އަކީ 2005ގެ ސާފް ޗެމްޕިއަންޝިޕުން ފެށިގެން ކޮންމެ މުބާރާތެއްގައި ކުޅެމުން އައި ކުޅުންތެރިއެކެވެ. ހާއްސަކޮށް 2008ގެ ތަށި ހޯދި ޓީމުގައި ކުޅެ އެ މުބާރާތުގެ މޮޅު ކުޅުންތެރިޔާ އަކީ ދަގަނޑޭއެވެ. އޭނާ އަކީ ރާއްޖޭގެ އިތުރުން މި ސަރަހައްދުގެ ވެސް އެންމެ އަލިގަދަ އެއް ތަރިއެވެ. މިވަރުގެ ކުޅުންތެރިއަކު ނުލައި ސާކުގެ އެންމެ ބޮޑު މުބާރާތަށް ދިއުމަކީ ރާއްޖޭގެ ފުޓްބޯޅައިގެ މުޅިން އާސޮފުހާއެއްގެ ފެށުމެވެ. އެއް ގޮތަކަށް ބަލާއިރު މިއީ ރަނގަޅު ބަދަލެކެވެ. އަނެއް ގޮތަކުން ގޯސް ބަދަލެކެވެ.
ރަނގަޅު ބަދަލަކަށް ވަނީ ކީއްވެ؟
ދަގަނޑޭގެ އުމުރުން މިހާރު 33 އަހަރެވެ. އޭނާ އަކީ މިހާރު އަރާ ތަރިއެއްނޫނެވެ. މިހެންވެ ކުރިމަގު އޮތް ޒުވާން ކުޅުންތެރިންނަށް ފުރުސަތު ދިނުމަކީ މައްސަލައެއްނޫނެވެ. ރާއްޖޭގެ ފުޓްބޯޅައިގައި އެންމެ ބޮޑަށް ދިމާވާ މައްސަލައަކީ މޫނަށް ބަލާފައި ޓީމު ނެގުމާއި މަސްފަލަ ކުޅުންތެރިންތަކެއްގެ ކިބައިން ސަލާމަތް ނުވެވިގެން އުޅުމެވެ.
ފުޓްބޯޅައިގައި ލަންކާ ފަހަނައަޅައި ރާއްޖެ ގޮސްފިއެވެ. މިހާރު ވާދަކުރަން ޖެހެނީ ސަރަހައްދީ ޗެމްޕިއަން އިންޑިޔާއާއެވެ. މި މުބާރާތް މިހާތަނަށް ހަ ފަހަރު ކާމިޔާބުކޮށްފައިވުމާވެސްއެކު އިންޑިޔާއަށް ސާފް ޗެމްޕިއަންޝިޕަކީ މިހާރު "ދެވަނަ ފަންތީގެ" މުބާރާތެކެވެ. މިހެންވެ މީގެ ކުރިންވެސް އެއް ފަހަރަކު އަމަލުކުރި ގޮތަށް މިފަހަރުގެ މުބާރާތަށް ފޮނުވަން ނިންމާފައިވަނީ ސީނިއާ ޓީމުގެ ބަދަލުގައި 23 އަހަރުން ދަށުގެ ޒުވާން ޓީމެކެވެ. ގިނަ ފުރުސަތުތަކެއްދޭން ނިންމާފައިވަނީ އިންޑިޔާގައި މިދިޔަ އަހަރު ބޭއްވި 17 އަހަރުން ދަށުގެ ވަރލްޑް ކަޕް ކުޅުނު ޓީމަށެވެ. މިހެންވެ ކެޕްޓަން ސުނިލް ޗެތްރީ އާއި އެހެން ބައެއް ސީނިއާ ކުޅުންތެރިން ވަނީ ޓީމުން އުނިކޮށްފަ އެވެ. ޗެތްރީ ގެންދާނަމަ ގެންދާނީ އޭޝިއަން ކަޕް ފަދަ ބޮޑު މުބާރާތަކަށެވެ. ސާފް ޗެމްޕިއަންޝިޕުގެ މޮޅު ކުޅުންތެރިޔާގެ މަޤާމް ދެ ފަހަރު އަދި މުބާރާތުގެ އެންމެ ގިނަ ގޯލު ޖެހި ކުޅުންތެރިޔާ ޗެތްރީ އަކީވެސް ދަގަނޑޭއާ އެއް އުމުރެއްގެ ކުޅުންތެރިއެކެވެ. ސާފް ޗެމްޕިއަންޝިޕުގެ ޓީމަށް އޭނާ ނުނަގަން ނިންމިއިރު މިދިޔަ ހަފުތާގައި ހޮވި އިންޑިޔާގެ އެންމެ މޮޅު ފުޓްބޯޅަ ކުޅުންތެރިއަކީ ވެސް އޭނާއެވެ.
އިންޑިޔާގެ މި މިސާލަށް ބަލާއިރު ރާއްޖެއިން މި މުބާރާތަށް ދަގަނޑޭ ނުނަގައި ޒުވާން ޓީމެއް ބިނާކުރުމަކީ މައްސަލައެއްނޫނެވެ. އެއީ ކުރިމަގަށް އެޅޭ ރަނގަޅު ބިންގަލަށްވެދާނެ އެވެ.
ދެ ވަނަ ކަމަކީ ދަގަނޑޭ ހުރެފިނަމަ އޭނާއަށް މުޅި ޓީމު ބިނާވުމުގެ މައްސަލައެކެވެ. ޓީމް ގޭމަކަށްވުރެ ބޮޑަށް މިހާތަނަށް ފެނިފައިވަނީ ދަގަނޑޭ އެކަނި މުޅި ޓީމު ކޮނޑު އަޅަންޖެހިފައިވާތަނެވެ. މިކަން ރާއްޖޭގެ ކުރީގެ ކޯޗު އިސްޓަވާން އުރުބާނީ ވެސް ފާހަގަކޮށްފައިވެއެވެ.
ރަނގަޅު ބަދަލަކަށް ނުވާނީ ކީއްވެ؟
އެންމެ މުހިންމު ސަބަބަކީ ސަޕޯޓަރުން ދަގަނޑޭ ކުޅޭތަން ބަލަން ބޭނުންވުމެވެ. އަޅުގަނޑު ފަދަ އޭނާގެ ސަޕޯޓަރުން ނުހަނު ގިނައެވެ. މިހެންވެ ދަގަނޑޭ ނެތުމަކީ ފަހަރުގައި ދިވެހިންގެ މެދުގައި މުބާރާތުގެ ފޯރި ކުޑަވެދާނެ ސަބަބެކެވެ. އަނެއް ކަމަކީ ދިވެހި ޓީމު ވަރަށް ބޮޑަށް ޒުވާންވުމެވެ. މި ޓީމުގައި ދަގަނޑޭ ހުރެފިނަމަ އޭނާގެ ތަޖުރިބާ ބޭނުން ވަރަށް ބޮޑަށް ކުރެވޭނެ އެވެ. މޮޅުވާނެ ކަމުގެ ޔަޤީންކަން އިތުރުވެގެންދާނެއެވެ. އިތުބާރު ކުޅުންތެރިއަކު ހުރުމުގެ ހިތްހަމަޖެހުން އެންމެނަށް ލިއްބައިދޭނެއެވެ. އެންމެ ފަހު ސަބަބަކީ ދިވެހި ފުޓްބޯޅަ ލެޖެންޑަކު އަމިއްލަ އިހްތިޔާރުގައި ޤައުމީ ޓީމާ ދުރަށް ދިއުމުގެ ބަދަލުގައި ކޮންމެވެސް ވަރެއްގެ ހިތްހަމަނުޖެހުމެއްގެ ތެރެއިން ޤައުމީ ޓީމަށް ދުރަށްދާ މައްސަލަ އެވެ. އެކަމަކު މައްސަލައެއްއޮތްނަމަ އެކަން ހައްލު ކުރެވޭނީ ދެ ފަރާތުން އީޖާބީގޮތެއްގައި އިހްލާސްތެރި ހިތަކާއެކު ވާހަކަ ދައްކައިގެންނެވެ. އެކަން ކުރެވުނީ ކިހާވަރަކަށްތޯ އެނގޭނީ އެފްއޭއެމާއި ކުޅުންތެރިޔާއަށެވެ.