މި އަހަރުގެ ސީޒަން ތަށްޓަކާއެކު ފެށުމަކީ ވަރަށް މުހިންމު ކަމެއް ކަމަށް ޗެލްސީގެ ކޯޗު މައުރީސިއޯ ސަރީ ބުނެފިއެވެ.
މި ސީޒަނަށް ޗެލްސީއާ ހަވާލުވި އިޓަލީގެ ނަޕޯލީގެ ކުރީގެ ކޯޗު މިހެން ބުނީ އިނގިރޭސި ލީގު ފެށުމުގެ ކުރިން ކުޅޭ ކޮމިއުނިޓީ ޝީލްޑް މެޗުގައި މިރޭ ޗެމްޕިއަން މެންޗެސްޓާ ސިޓީއާ ދެކޮޅަށް ނުކުތުމުގެ ކުރިންނެވެ.
މި މެޗުގައި ޕްރެމިއާ ލީގުގެ ޗެމްޕިއަނުންގެ ގޮތުގައި ސިޓީ ވާދަކުރާއިރު ޗެލްސީ ވާދަކުރަނީ އެފްއޭކަޕް ޗެމްޕިއަނުންގެ ގޮތުގައެވެ.
"އަހަރެން ބޭނުންވަނީ ކާމިޔާބު ހޯދަން. މި ގޮތުން ތަށްޓަކާއެކު ފެށުމަކީ ވަރަށް މުހިންމު ކަމެއް. އެ ގޮތުން މި މެޗަކީ ވަރަށް މުހިންމު އަދި ވަރަށް ބޮޑަށް މަސައްކަތް ކުރަންޖެހޭ މެޗެއް،" ސަރީ ބުންޏެވެ.
އޭނާ ބުނީ ސިޓީއަކީ ގާޑިއޯލާގެ އިރުޝާދުގެ ދަށުން ދެ އަހަރު މަސައްކަތްކޮށްފައިވާ ޓީމެއް ކަމަށާއި، މިއާ ހިލާފަށް އޭނާގެ ކޯޗުކަމުގެ ދަށުން ޗެލްސީ ފަރިތަކޮށްފައިވަނީ އެންމެ ދެ ހަފުތާ ކަމަށެވެ. މިހެންވެ މެޗު ވަރަށް އުނދަގޫ ވާނެ ކަމަށެވެ.
"އަހަރެން ގާތުގައި ގާޑިއޯލާ ބުނި މިއީ ވަރަށް އުނދަގޫ ލީގެކޭ. އޭނާގެ ފުރަތަމަ ސީޒަނުގައިވެސް އޭނާއަށް ވެސް ދަތިތަކެއް ދިމާވި. އެކަމަކު އަހަރެން ބުނާނީ ޕްރެމިއާ ލީގުގައި ކޯޗުކޮށްދިނުމަކީވެސް ވަރަށް ބޮޑު ކާމިޔާބީއެކޭ. ކޮންމެ ކޯޗަކު ވެސް މި ލީގަށް އަންނަން ބޭނުން. އެ ގޮތުން ބަލާއިރު އަހަރެން ވަރަށް ނަސީބު ރަނގަޅު،" ސަރީ ބުންޏެވެ.
ކޮމިއުނިޓީ ޝީލްޑް މެޗު ފަށާނީ މިރޭ 7 ޖަހާއިރު އެވެ.