ވިކްޓަރީއާ އެކު ހަދާފައިވާ އެއްބަސްވުން މި މަހުގެ މެދުތެރޭގައި ހަމަވުމުން އެނބުރި ޤައުމަށް ދާން ތައްޔާރުވަމުން ދާކަމަށް ހަންގޭރީގެ ކޯޗު ލާސްލޯ ކިސް ބުނެފިއެވެ.
ކިސްގެ ކޯޗުކަމުގެ ދަށުން ވިކްޓަރީ މިވަގުތު އޮތީ 10 ޓީމު ވާދަކުރާ ދިވެހި ޕްރެމިއާ ލީގުގެ ފަސް ވަނާގައެވެ. ކޮންމެ ޓީމަކުން ހަތަރު މެޗު ކުޅެފައިވާއިރު އެއްވަނާގައިވާ ޓީސީ އާއި ވިކްޓަރީއާ ދެމެދު ހަތް ޕޮއިންޓްގެ ފަރަޤެއް އެބައޮތެވެ. ނަމަވެސް ކިސް ވަނީ ވިކްޓަރީއާއެކު މާލޭ ލީގުގައި ރަނގަޅު ވާދައެއްކޮށްފައެވެ.
އޭނާ މިއަދު ބުނީ "މި މަހުގެ 20ގައި ކޮންޓްރެކްޓް ހަމަވުމުން ޤައުމަށްދާން ތައްޔާރު،" ކަމަށެވެ.
ކިސް ވަނީ 2016 ވަނަ އަހަރު ވެސް ވިކްޓަރީއަށް ކޯޗުކޮށްދީ ރެލިގޭޝަނުން އެ ޓީމު ސަލާމަތްކޮށްދީފައެވެ.
ރާއްޖޭގައި މަސައްކަތް ކުރި އެންމެ ކާމިޔާބު ކޯޗު ކިސް ބުނީ އޭނާ އަށް "ވިކްޓަރީ އަށް ރަނގަޅު ހިދުމަތްތަކެއް ކޮށްދެވުނު،" ކަމަށެވެ.
"އެކަމަކު ފުޓްބޯޅަ ބަދަލުވާން އެބަޖެހޭ. ރާއްޖޭގެ ފުޓްބޯޅަ ސީޒަން މިއޮންނަނީ ވަރަށް ގޯސްކޮށް ރާވާލާފައި. ބްރޭކްތައް މާގިނަ،" ލީގުގެ ބޮޑު ބަޔަކާއި އެފްއޭކަޕާއި ޤައުމީ މުބާރާތް ކުރިއަށް އޮއްވައި ރަށަށްދާން ތައްޔާރުވާ ކިސް ބުންޏެވެ.
ވެލެންސިއާގެ އެންމެ ކާމިޔާބު ދުވަސްވަރު ތިން ފަހަރެއްގެ އެ ޓީމަށް ކޯޗުކޮށްދީ ފަހުން ވީބީއަށް ވެސް ކިސް ވަނީ ކާމިޔާބުތަކެ ހޯދައިދީފައެވެ.