ވަރލްޑް ކަޕް ފުޓްބޯޅަ މުބާރާތުގައި ކުޅުނު އެންމެ ދުވަސްވީ ކުޅުންތެރިޔާ މިސުރުގެ ކީޕަރު އީސަމް އަލް ހަދަރީ ކުޅުން ހުއްޓާލައިފިއެވެ.
އުމުރުން 45 އަހަރުގެ ކީޕަރު ވަރލްޑް ކަޕުގައި ކުޅުނު އެންމެ ދުވަސްވީ ކުޅުންތެރިޔާގެ ރެކޯޑް މުގުރާލީ ރަޝިޔާގައި މިދިޔަ މަހު ނިމުނު މުބާރާތުގައެވެ. ގްރޫޕް ސްޓޭޖުގެ ފަހު މެޗުގައި ސައުދީ އަރަބިއާ އަތުން ބަލިވި މެޗުގައި އޭނާވަނީ ޕެނަލްޓީ އެއްވެސް މަތަކޮށްފައެވެ.
"22 އަހަރުގެ ކެރިއަރު ނިންމާލަން އެންމެ ރަނގަޅު ވަގުތަކީ މިއީ ކަމަށް ދެކެން. އަހަރެން މިހުރީ ވަރަށް އުފަލުން އަދި ވަރަށް ފަހުރުވެރިވެފައި އަހަރެންގެ ކެރިއަރާމެދު،" ހަދަރީ ބުންޏެވެ.
އޭނާ ބުނީ މިސުރުގެ ޤައުމީ ޓީމަށް 1996 ވަނަ އަހަރުން ފެށިގެން މިހާތަނަށް 159 މެޗު ކުޅެދެވުމުން ވަރަށް ބޮޑަށް ފަހުރުވެރިވާ ކަމަށެވެ.
އަލް ހަދަރީ މިސުރުގެ ޤައުމީ ޓީމަށް ދެ ވަނަ ފަހަރަށް ކުޅެން ފެށީ ރިޓަޔާކޮށްގެން ހުއްޓައި މިހާރުގެ ކޯޗު އެދުމުގެ މަތީން ނިމިދިޔަ ވަރލްޑް ކަޕް ކޮލިފައިންގައި ކުޅުމަށެވެ. އެގޮތުން ކޮލިފައިންގައި އޭނާ މޮޅަށް ކުޅުނެވެ. އޭނާ ވަނީ މިސުރުގެ މޮޅު ކުޅުންތެރިޔާގެ މަޤާމު ވެސް ހޯދައިފަ އެވެ.