ރެއިން ފެށިގެން މާލެއަށް ކުރަމުންދާ ވިއްސާރައިގައި މާލޭގެ މަގުތަކުގައި އާދަޔާ ޚިލާފަށް ފެންބޮޑުވުމާ ގުޅިގެން މާލޭ މަގުތަކުން ފެން ހިއްކުމުގެ މަސައްކަތް ސިފައިން ފަށައިފިއެވެ.
މަގުތަކުގައި ފެން ހިއްކުމަށް ޤާއިމްކޮށްފައިވާ ސިސްޓަމްތަކުގައި މައްސަލަތަކެއް ދިމާވެ މާލޭގެ ބޮޑު ބައެއްގައި ފެންބޮޑުވުމާ ގުޅިގެން، ބޮޑުވެފައިވާ ފެންގަނޑު ހިއްކުމުގެ މަސައްކަތް ސިފައިން ފަށާފައިވާކަމަށް ދިވެހި އަސްކަރިއްޔާގެ ތަރުޖަމާނު ކެޕްޓަން އިބްރާހީމް އާޒިމް ވިދާޅުވިއެވެ.
އެމްއެންޑީއެފުން ބުނީ ފެން ހިއްކުމުގެ މަސައްކަތް ކުރަމުންދަނީ ވެސްޓް ޕާރކް ސަރަޙައްދާއި ދަރުބާރުގެ ހިމެނޭ ސަރަޙައްދުގައިކަމަށެވެ. މި ވިއްސާރައިގައި ވައިގަދަވެ މާލޭގެ ބައެއް ސަރަޙައްދުތަކުގައި ހުރި ގަސްތައްވެސް ވަނީ ވެއްޓިފައެވެ. ރެއިން ފެށިގެން ވެހެމުންދާ ވާރޭގެ ސަބަބުން ބައެއް އޮފީސްތަކަށާއި، ޢާއްމުންގެ ގެދޮރާއި ފިހާރަތަކަށް ފެންވަދެފައި ވެއެވެ. އެގޮތުން ރައްޔިތުންގެ މަޖިލީހުގެ ޗެންބަރަށްވެސް ފެން ވަދެފައިވާކަމަށް ރައްޔިތުންގެ މަޖިލީހުގެ ނާއިބުރައީސް މޫސާ މަނިކު ވިދާޅުވިއެވެ.
މާލޭގެ ބޮޑު ބައެއްގައި ފެންބޮޑުވެ ޢާއްމުނަށް ބޮޑެތި ދަތިތަކާއި ކުރިމަތިވެފައިވާ އިރު ބައެއް ސްކޫލްތަކުގައި މިއަދު ކިޔެވުންވެސް ވަނީ ބަންދުކޮށްފައެވެ. މާލެ ސަރަޙައްދަށް 60 މިލިމީޓަރުގެ ވާރޭ ވެހިފައިވާކަމަށް މޫސުމާ ބެހޭ ޤައުމީ އިދާރާއިން މައުލޫމާތުދެއެވެ.
ހައުސިންގ މިނިސްޓަރ ވިދާޅުވީ މާލޭގައި ފެންބޮޑުވެފައިވަނީ މާލޭގައި ފެންހިންދުމަށް ބަހައްޓާފައިވާ ސްޓޯމްވޯޓަރ ސިސްޓަމްގެ ޕަމްޕް ސްޓޭޝަންތަކުގެ ޕެނަލް ބޯޑަށް ބަޔަކު ގެއްލުންދީފައި ވާތީކަމަށެވެ. ނަމަވެސް މިކަމުގެ އިތުރު ތަފްސީލު މިނިސްޓަރ ދެއްވާފައެއް ނުވެއެވެ.