މިސަރުކާރުގެ އަމާޒަކީ ޤައުމުން ބޭރަށް ނުގޮސް ރާއްޖޭގައި ތިބެގެން އެކަށީގެންވާ އަގެއްގައި ސިއްޙީ ޚިދުމަތް ލިބޭނެ ގޮތް ހޯދައިދިނުންކަމަށް އިންތިޚާބީ ނާއިބު ރައީސް ފައިސަލް ނަސީމް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ އޭޑީކޭއިން ބާއްވާ "ބްރެއިން އެންޑް ސްޕައިން ކޮންފަރެންސް" ޝަރަފުވެރިކޮށްދެއްވައި ވާހަކަދައްކަވަމުންނެވެ. އިންތިޚާބީ ނާއިބު ރައީސް ފައިސަލް ނަސީމް ވިދާޅުވީ ރާއްޖޭގައި އަދިވެސް ސިއްޙީ ޚިދުމަތް ފުޅާ ކުރަންޖެހޭ ދާއިރާތައް ވަރަށް ގިނަކަމަށާ އޭ.ޑީ.ކޭއިން އިސްނަގައިގެން ނިއުރޯސަރޖަރީގެ ދާއިރާއިން އިތުރު ކުރިއެރުން ހޯދުމަށް މަސައްކަތް ކުރަމުންގެންދާކަމަށްޓަކާ އުފާކުރައްވާކަމަށެވެ.
ފައިސަލް ވިދާޅުވީ ރާއްޖޭގައި ސްޕެޝަލިސްޓު ޑޮކްޓަރުންގެ ޢަދަދު މަދުކަމަށާއި އެކަމަށް ޚާއްސަ ސަމާލުކަމެއް މިސަރުކާރުގައި ދެއްވާނެކަމަށެވެ. އަދި ސިއްޙީ ޚިދުމަތުގެ ފެންވަރު ރަނގަޅުކުރުމަށް އިންސާނީ ވަޞީލަތް އިތުރަށް ހަރުދަނާކުރުމަށް މަސައްކަތްކުރައްވާނެކަމަށްވެސް ފައިސަލް ވިދާޅުވިއެވެ.
"ބްރެއިން އެންޑް ސްޕައިން ކޮންފަރެންސް 2018" ގައި ރާއްޖޭގެ ސިއްޙީ ދާއިރާގައި މަސައްކަތްކުރާ ގިނަ ޑޮކްޓަރުންތަކެއް ބައިވެރިވެފައިވާއިރު މި ކޮންފަރެންސްގައި ބައިވެރިވުމަށް ރާއްޖެއިން ބޭރުންވެސް ތަޖުރިބާކާރު ޑޮކްޓަރުންވަނީ ރާއްޖެއަށް އައިސްފައެވެ.