ޒުވާނުންގެ އެކި ފަންނުތައް ތަރައްޤީކުރުމަށާއި ކުޅިވަރުގެ ދާއިރާއިންނާއި ފިލްމީ ދާއިރާއިން އެހީތެރިކަން ހޯދާ ގުޅުން ބަދަހިކުރުމަށް އިންޑިޔާއާއެކު މަސައްކަތްތަކެއް ކުރެވެމުންދާ ކަމަށް މިނިސްޓަރ އޮފް ޔޫތު އެންޑް ސްޕޯޓްސް މަލީހް ޖަމާލް ވިދާޅުވެއްޖެއެވެ.މިނިސްޓަރ މިހެން ވިދާޅުވީ އިންޑިޔާ އާއި ދިވެހިރާއްޖޭގެ ޚާރިޖީ ގުޅުމަށް ފަންސާސް އަހަރު ފުރުމުގެ މުނާސަބަތުގައި ރޭ އޮލިމްޕަހުގައި ފެށި ފިލްމް ފެސްޓިވަލް ފައްޓަވާ ދެއްވުމަށްފަހު ދެއްކެވި ވާހަކަފުޅުގައެވެ.މިނިސްޓަރ މުހައްމަދު މަލީހް ޖަމާލް ވިދާޅުވީ އިންޑިޔާއަކީ އަބަދުވެސް ރާއްޖެއާއި ވަރަށް ގާތްގުޅުމެއް ބާއްވަމުން އަންނަ ގައުމެއްކަށާއި އަދި މިހާތަނަށް އިންޑިޔާއިން ރާއްޖެއަށް ގިނަގުނަ އެހީތަކެއް ވެދެއްވާފައިވާކަމުގައެވެ. އެގޮތުން މިޖެނުއަރީ މަހަކީ ބޮލީވުޑްގެ މަހެއްގެ ގޮތުގައި ނިންމައި އެކަން ފާހަގަކުރަމުންދާއިރު މީގެން ރާއްޖޭގެ ފަންނާނުންނަށްވެސް ތަޖުރިބާތަކެއް ލިބެގެންދާނެކަމަށް މިނިސްޓަރ ވިދާޅުވިއެވެ.މި ފިލްމް ފެސްޓިވަލް ފެއްޓުމުގެ ރަސްމިއްޔާތުގައި ވާހަކަފުޅުދައްކަވަމުން އިންޑިޔާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ރަޖީވް ސަހާރޭ ވިދާޅުވީ މި ފިލްމް ފެސްޓިވަލްގައި މުޅި ދުނިޔޭގައިވެސް އެންމެ ބޮޑު ކާމިޔާބީއެއް ހޯދި ހިންދީ ތިންފިލްމެއް ދެއްކުމަށް ހަމަޖެހިފައިވާއިރު މިހާތަނަށް ދިވެހި ރާއްޖެއިން އުފެއްދި އެންމެ ކޮލެޓީ ރަނގަޅު ދެ ފިލްމެއްވެސް ފެސްޓިވަލްގައި ފެނިގެންދާނެކަމަށެވެ.ރޭ ފެށި ފިލްމް ފެސްޓިވަލް މިމަހުގަ ބާވީސް ވަނަ ދުވަހާއި ހަމަޔަށް ކުރިއަށް ދާނެއެވެ.މި ފެސްޓިވަލްގައި ފެއްޓުމުގެ ގޮތުން ރޭ ދައްކާފައިވަނީ ހިންދީ ފިލްމް "ތްރީ އިޑިއެޓް" އެވެ.މިރޭ ދެއްކުމަށް ހަމަޖެހިފައިވަނީ ދިވެހި ފިލްމް "ހުޅުދާން" އާއި ހިންދީ ފިލްމް "ދިލްވާލޭ ދުލްހަނިޔާ ލޭޖާއެގޭ"އެވެ. އަދި ބާވީސް ވަނަ ދުވަހުގެ ރޭ ދެއްކުމަށް ހަމަޖެހިފައިވަނީ ދިވެހި ފިލްމް "އިގި" އަދި ހިންދީ ފިލްމް "ޝޯލޭ"އެވެ.އިންޑިޔާ އާއި ދިވެހިރާއްޖޭގެ ޚާރިޖީ ގުޅުމަށް ފަންސާސް އަހަރު ފުރުމުގެ މުނާސަބަތުގައި ބާއްވާ މި ހަރަކާތްތަކުގެ ތެރެއިން މި މަހުގެ ތޭވީސްވަނަ ދުވަހު އަލިމަސް ކާނިވަލްގައި 'ޓިކެޓް ޓު ބޮލީވުޑް'ގެ ނަމުގައި ހާއްސަ ޑާންސް ޝޯއެއް ބާއްވާ ގޮތަށް ވަނީ ހަމަޖެހިފައެވެ.