ޗެމްޕިއަންސް ލީގުގައި މިރޭ ޖަރުމަނުގެ ޗެމްޕިއަން ބަޔާން މިއުނިކާ ދެކޮޅަށް ނުކުންނައިރު ލިވަޕޫލަށް ޑިފެންސިވް މައްސަލަތަކެއް ކުރިމަތިވެއްޖެ އެވެ.
އެންމެ ފަހުގެ ފައިނަލް ކުޅުނު ޓީމުގެ އެންމެ މުހިންމު ޑިފެންޑަރު ވާޖިލް ވެންޑައިކް ވަނީ މި މެޗަށް ސަސްޕެންޑްވެފަ އެވެ. ޖޯ ގޮމޭޒް ހުރީ އިންޖަރީ އެވެ. އަދި ތަޖުރިބާކާރު ޑިފެންޑަރު ޑެޖާން ރޮވްރެން ވެސް މުޅިން ފިޓެއްނޫނެވެ. އޭނާ އަށް މެޗުގައި ކުޅެވޭނެކަން ޔަގީންވާނީ މިރޭގެ ވަގުތެއްގަ އެވެ.
މި ތިން ކުޅުންތެރިން ކުރެ ކުޅުންތެރިއަކަށް ނުކުޅެވިއްޖެނަމަ އެންމެ ފަހަތަށް ކުޅުވާނީ މިޑްފީލްޑަރު ފަބިއާނޯ ލައްވައިކަން ކޯޗު ޔާގެން ކްލޮޕް ވަނީ ޔަގީންކޮށްދީފަ އެވެ. މީގެ އިތުރުން މިޑްފީލްޑަރު ޖިއޯޖިއޯ ވައިނަލްޑަމް އާއި ފޯވަޑް ޒެންޑެން ޝަގީރީ އަށް ވެސް ފިޓްނަސްގެ މައްސަލަވަނީ ކުރިމަތިވެފަ އެވެ. އޭނާ ބުނީ ޑިފެންސިވް މައްސަލަތަކާއެކު ލިވަޕޫލަކީ މެޗުގެ ފެވަރިޓުން ނޫން ކަމަށެވެ.
"ބަޔާން އަކީ ޔޫރަޕުގައި ވަރުގަދަ ޓީމެއް. މޮޅު ކުޅުންތެރިން ގިނަ ޓީމެއް. އަހަރުމެން ވަރަށް ސަމާލުވާންޖެހޭނެ. ލިވަޕޫލަކީ ފެވަރިޓުން ކަމަށް ދެކުމަކީ ގޯހެއް،" ކްލޮޕް ބުންޏެވެ.
މި މެޗަށް ނުކުންނައިރު ބަޔާނަށް އޮތް އެންމެ ބޮޑު ނުތަނަވަސްކަމަކީ ޔޫރަޕުގެ މުބާރާތްތަކުގައި ލިވަޕޫލާ ވާދަކޮށް ކާމިޔާބު ހޯދަން އުނދަގޫވުމެވެ. މި ދެ ޓީމު އެންމެ ފަހުން ކުޅުނު ހަތް މެޗުގެ ތެރެއިން ބަޔާން މޮޅުވީ އެންމެ ފަހަރަކު އެވެ.