މި އަހަރު އަލަށް ފުރަތަމަ ޑިވިޝަނުގައި ވާދަކުރާ ދަ ގްރާންޑޭގެ ކޯޗަކަށް އިސްމާއީލް މަހުފޫޒް (އިންމަ) ހަމަޖައްސައިފިއެވެ.
އިންމަ މީގެ ކުރިން ފުރަތަމަ ޑީވިޝަންގައި އިރުޝާދުދީފައިވަނީ ހަމައެކަނި މާޒިޔާއަށެވެ.
ނަމަވެސް މި އަހަރު މާޒިޔާއިން އަދި ކޯޗަކު ހަމަޖައްސާފައިނުވާއިރު އެ ޓީމުން ފެނިގެންދާނީ ބިދޭސީ ކޯޗެއްކަމުގެ އަޑުތައް ވެސް ގަދަވެފައެވެ.
އިންމަ އަކި ގައުމީ ޓީމުގެ ވަގުތީ ކޯޗުކަން ވެސް ކޮށްފައިވާ އަދި ގައުމީ ޓީމަށް ކުރިން ކުޅެފައިވާ ކުރީގެ މޮޅު ކުޅުންތެރިއެކެވެ.
އާ ސީޒަނަށް އިންމަގެ އިރުޝާދުގެ ދަށުން ދަ ގްރާންޑޭ ތައްޔާރުވާއިރު އެ ޓީމުން ދަނީ ފުރަތަމަ ޑިވިޝަނުގެ ތަޖުރިބާކާރު ބައެއް ކުޅުންތެރިންގެ ސޮއި ހޯދަމުންނެވެ. އެގޮތުން ނިއުރޭޑިއަންޓަށް މިދިޔަ ސީޒަނުގައި ކުޅުނު މުހައްމަދު ރަޝީދުވެސް ވަނީ ދަ ގްރާންޑޭއާށް ކުޅެން ސޮއިކޮށްފައެވެ.
އަދި މިދިޔަ ސީޒަނުގައި މާޒިޔާއަށް ކުޅުނު ޔަސްފާދު ހަބީބު އާއި އަހުމަދު އިމާޒުވެސް މި ސީޒަނުގައި ފެނުން އެންމެ ގަތީ ދަ ގްރާންޑޭއިންކަމަށް މައުލޫމާތުލިބެއެވެ.