ޒުވާނުން މީޑިއާގައި އަދާކުރާ ދައުރު ފުޅާވެގެންދިއުމަކީ އަމާން ޖީލެއް ބިނާކޮށް އިސްލާމީ ދަންމަރު އުފުލާލުމަށް މުހިންމުކަމެއްކަމަށް މިނިސްޓަރ އޮފް ހޯމް އެފެއަރޒްސް އިމްރާން އަބްދުﷲ ވިދާޅުވެއްޖެއެވެ. މިނިސްޓަރ މިހެން ވިދާޅުވީ، "ޒުވާނުންނާއި މީޑިއާ"ގެ ނަމުގައި ހއ ހޯރަފުށީގައި ބާއްވާ މަސައްކަތު ބައްދަލުވުން ފައްޓަވައިދެއްވާ ވާހަކަފުޅުދައްކަވަމުންނެވެ.
ޔޫތް ލީޑަރސް ނެޓްވޯކުން އިންތިޒާމުކޮށްގެން ހއ. ހޯރަފުށީގައި ބާއްވާ "ޒުވާނުންނާއި މީޑިއާ" މަސައްކަތު ބައްދަލުވުން ފައްޓަވައިދެއްވުމުގެ ގޮތުން ވާހަކަފުޅުދައްކަވަމުން ހޯމް މިނިސްޓަރ އިމްރާން އަބްދުﷲ ވިދާޅުވީ، މީޑިއާއަކީ އެންމެ ވަރުގަދަ ހަތިޔާރުކަމުން މީޑިއާގެ ހެޔޮ ބޭނުން ހިފާ އިސްލާމީ ވަޙުދަތު ފެތުރުމުގައި ޒުވާނުންގެ ދައުރު އިތުރުކުރަންޖެހޭކަމަށެވެ. އިސްލާމީ ދަންމަރު އުފުލާލާއި އަމާން ޖީލެއް ބިނާކުރުމުގައި އިސްދައުރެއް ޒުވާުން އަދާކުރަންޖެހޭކަން ފާހަގަކުރައްވަމުން މިނިސްޓަރ އިމްރާން ވިދާޅުވީ އިސްލާމީ ތާރީހުންވެސް ނަގާދީފައިވަނީ އެ ފިލާވަޅުތައްކަމަށެވެ. އަދި ދީނުގައި ޒުވާނުން ވަރުގަދައަށް ހިފެހެއްޓި މިންވަރަކުން އިސްލާމީ ޖީލު ވަރުގަދަވެގެންދާނެކަމަށްވެސް މިނިސްޓަރ ވިދާޅުވިއެވެ.
"ޒުވާނުންނަކީ ޤައުމުގެ ރައުސުލްމާލު. ޒުވާން ޖީލު ބިނާކުރާއިރު، ޒުވާނުން މީޑިއާގެ ދައުރު ފުޅާކުރުން މުހިންމު. މިކަން އަޅުގަނޑުމެންގެ މާތް ނަބިއްޔާވެސް ވަނީ މިސާލު ދައްކުވާދެއްވާފައި. އެގޮތުން ހަނގުރާމަތަކުގައިވެސް އިސްކޮށް ޒުވާނުން ހަރަކާތްތެރިވޭ. ޒުވާނުން ވަރުގަދަ ވީވަރަކަށް އިސްލާމީ ޖީލު ވަރުގަދަ ވެގެންދާނެކަން ޔަޤީން. މި ސަބަށްޓަކައި މީޑިއާގެ ވަރުގަދަ ހަތިޔާރުގެ ބޭނުންހިފާ ޤައުމު ހެޔޮ މަގަށް ބައްޓަންކުރަން އިތުރު ފުރިހަމަ ފުރުސަތެއް ލިބިގެންދާނެ." މިނިސްޓަރ އިމްރާން ވިދާޅުވިއެވެ.
މި ރަސްމިއްޔާތުގައި ވާހަކަދައްކަވަމުން، ހއ ހޯރަފުށީ ކައުންސިލްގެ ރައީސް މުޙައްމަދު ވަހީދު ވިދާޅުވީ، މި މަސައްކަތު ބައްދަލުވުމުގެ ސަބަބުން ހޯރަފުއްޓަށް އަގުވަޒަން ނުކުރެވޭ ވަރުގެ ގާތް ގުޅުންތަކެއް އަވައްޓެރި ރަށްރަށާއިއެކު ޤާއިމުވެގެން ހިގައްޖެކަމަށެވެ. އަދި މިފަދަ ފޯރަމްތަށް ކުރިއަށް އޮތްތަނުގައިވެސް ހޯރަފުށިން އަބަދުވެސް މަރުހަބާކިޔާނެކަމަށް މުޙައްމަދު ވަހީދު ވިދާޅުވިއެވެ.
"އަޅުގަނޑުމެންގެ އުންމީދަކީ މި ފޯރަމްގެ ސަބަބުން ރަށަށް އަދި ވަކިން ޚާއްސަކޮށް ރަށުގެ ރައްޔިތުންނަށް ގިނަ ފައިދާތަކެއް ކުރުން. މި ފޯރަމްގެ ސަބަބުން އަޅުގަނޑުމެންގެ މި ރަށާއި، މި ފޯރަމްގައި ބައިވެރިވާ ބައިވެރިން ނިސްބަތްވާ ރަށްރަށާއިއެކު ވަރަށްވެސް ގާތް ގުޅުމެއް އުފެދިގެން ދާނެކަން ޔަޤީން." މުޙައްމަދު ވަހީދު ވިދާޅުވިއެވެ.
ޔޫތް ލީޑަރސް ނެޓްވޯކުން އިންތިޒާމުކޮށްގެން ކުރިޔަށް ގެންދާ މި މަސައްކަތު ބައްދަލުވުމުގައި ރާއްޖޭގެ އުތުރުގެ 7 ރަށަކުން ޖުމުލަ 83 ޒުވާނަކު ބައިވެރިވެއެވެ. މި މަސައްކަތު ބައްދަލުވުމުގެ ތެރެއިން ޒުވާނުންގެ މެދުގައި ދީނީ އަޤީދާއާއި، އެއްބައިވަންތަކަން ހަރުދަނާކުުރުމާއި، ދިވެހި ސަޤާފަތާއި އާދަކާދަ ނެތިގެންނުދާނޭ ގޮތް ހޯދުމުގެ ސެޝަންތަކުގެ އިތުރުން ޒުވާނުން އިސްވާރުންގެގޮތުގައި މަސައްކަތްކުރަން ހިތްވަރުދިނުމުގެ ސެޝަންތަށް ކުރިއަށް ގެންދިއުމަށް ވަނީ ހަމަޖެހިފައެވެ. އަދި ރާއްޖޭގައި ރަޖިސްޓްރީކޮށްގެން ހިންގާ މީޑިއާތަކަށް ހޭލުންތެރިކުރުވުމުގެ ސެޝަންއެއްވެސް ކުރިއަށްގެންދިއުމަށް ވަނީ ހަމަޖެހިފައެވެ.
ޔޫތް ލީޑަރސް ނެޓްވޯކްއަކީ މުޖުތަމަޢުގައި ޒުވާނުން ބާރުވެރިކޮށް ހަރުދަނާ ޒުވާން ޖީލެއް ބިނާކުރުމަށްޓަކައި މިނިސްޓްރީ އޮފް ހޯމް އެފެއަރޒްގެ މެންޑޭޓްގެ ދަށުން ހިންގާ ވިއުގައެކެވެ.