"ކަފިހި ހުރަސް" ނުވަތަ ޒިބްރާ ކްރޮސްއަކީ މަގުމަތީގައި ހިނގާ މީހުން ރައްކާތެރިކަމާއި ފަސޭހަކަމާއެކު މަގުގެ އެއްފަރާތުން އަނެއް ފަރާތަށް ހުރަސްކުރުމަށް ހަދާފައި ހުންނަ ފާހަގައެކެވެ. މާލޭގައިވެސް މިފަދަ އެތައް ކަފިހި ހުރަހެއް ހަދާފައި ހުރެއެވެ. ނަމަވެސް ކަފިހިހުރަސް ކައިރީގައި މީހަކު ނުވަތަ ބަޔަކު މަގު ހުރަސްކުރުމަށްޓަކައި މަޑުކޮށްލައިގެން ތިއްބަސް މަގު ހުރަސްކުރުމުގެ ފުރުޞަތު ނުދީ ދުއްވާ މައްސަލައަކީ އާކަމެއް ނޫނެނެވެ. ކޮންމެ ދުވަހަކު އެތައްފަހަރަކު މާލޭގެ މަގުތަކުން މިމަންޒަރު ފެންނަމުން ދެއެވެ.
މިކަން ޙައްލުކޮށް ޢާއްމުން ހޭލުންތެރިކުރުވުމަށް ޓްރެފިކް ފުލުހުން އަނެއްކާވެސް މިވަނީ މަގުތަކުގައި ހަރަކާތްތެރިވާން ފަށާފައެވެ. މާލޭގެ ބޮޑެތި މަގުތަކާއި ސްކޫލްތަކާއި ޢާއްމުކޮށް ޓްރެފިކް ބާރުބޮޑުވާ ސަރަޙައްދުތަކުގައި ޓްރެފިކް ފުލުހުން ދަނީ ކުރިއަށްވުރެ ބޮޑަށް ހަރަކާތްތެރިވާން ފަށާފައެވެ. ޙާއްސަކޮށް ކަފިހި ހުރަސްތައް ކައިރީ ޓްރެފިކް ފުލުހުން އަންނަނީ ޚާއްސަ އޮޕަރޭޝަނެއް ހިންގަމުންނެވެ. މިފަދަ އޮޕަރޭޝަން ދޭތެރެ ދޭތެރެއިން ފުލުހުން ހިންގައެވެ.
ޕީ.އެސް.އެމް ނިއުސްއަށް މަޢުލޫމާތުދެއްވަމުން ޕޮލިސް ސްޓާފް ސަރޖަންޓް ޙުސެއިން އަސްލަޙު ވިދާޅުވީ، ވެހިކަލް ދުއްވާ މީހުން ކަފިހި ހުރަހަސް ފަސްދީ ދިއުމުގެ ކުރިން މަގުހުރަސްކުރަން އެތަނުގައި މީހަކު ހުރިތޯ ނުވަތަ ނެތްތޯ ބަލައި މަގުހުރަސްކުރަން މީހަކުހުރިނަމަ އެމީހަކަށް ތަންދޭން ވާނެކަމަށް ޓްރެފިކް ޤަވާޢިދުގައި ބުނެފައިވީނަމަވެސް، ޤަވާއިދާ އެއްގޮތަށް މީހުން ޢަމަލުކުރާ މަންޒަރު ފެންނަލެއް މަދުކަމަށެވެ. އަދި މިފަދަ އޮޕަރޭޝަނެއް ފެށުމުގެ އެންމެ ބޮޑު ބޭނުމަކީ މަގު ހުރަސްކުރާ މީހުންނަށް ކަފިހިހުރަހުން ހުރަސްކުރުމުގެ ފުރުޞަތު ފަހިކޮށްދީ ކަފިހިހުރަސް ބޭނުންކުރުމަށް މިހާރަށްވުރެބޮޑަށް ބާރުއެޅުންކަމަށް އަސްލަޙު ވިދާޅުވިއެވެ.
"ޤާނޫނުގައި ބަޔާންކޮށްފައި އޮންނަނީ ޒިބްރާ ކްރޮސްއަކުން މީހަކު ނުވަތަ ބަޔަކު މަގު ހުރަސްކުރާނަމަ އެއްގަމު އުޅަނދު ދުއްވާމީހުން މަގު ހުރަސްކުރާ މީހުންނަށް ފުރުޞަތު ދޭންޖެހޭނެކަމަށް. އަޅުގަނޑުމެން މިހާރު ކުރިއަށް މިގެންދާ އޮޕަރޭޝަންގެ ބޭނުމަކީ މަގު ހުރަސްކުރާ ފަރާތްތަކަށް ރައްކާތެރިކަމާއެކު މަގު ހުރަސްކުރުމަށް ފުރުޞަތު ދިނުމާއި، ޒިބްރާކްރޮސްތައް ބޭނުންކުރުމަށް ބާރު އެޅުން." އަސްލަޙް ވިދާޅުވިއެވެ.
ޝައްކެއްވެސް ނެތްގޮތުގައި ދިވެހިންނަށް ބޮޑުކަމެއް ދިމާވާ ކޮންމެ ދަނޑިވަޅެއްގައި ޢާއްމު ފަރުދުންގެ ސަލާމަތާއި ރައްކާތެރިކަމަށްޓަކާ އަޅަންޖެހޭ ފިޔަވަޅުތައް އެޅުމުގައި އެންމެ ކުރީ ސަފުގައި ހަރަކާތްތެރިވާ އެއް ބަޔަކީ ފުލުހުންނާއި ސިފައިންނެވެ. ހަޤީޤަތުގައިވެސް ސަލާމަތީ ބާރުތަކުގެ މި މަސައްކަތަށް ތަޢުރީފާއި ޝުކުރު ހައްޤެވެ. ދުވާލެއް ރޭގަނޑެއް ބެލުމެއްނެތި އެބޭފުޅުން އެތިއްބަވަނީ ޤައުމީ ވާޖިބައިގެން ރައްޔިތުންގެ ޚިދުމަތުގައެވެ.
ކަފިހި ހުރަސް ކައިރީ ފުލުހުން ތިބޭ ތިބުން: އާއްމުންގެމެދުގައި ތަފާތު ޚިޔާލުތަކެއް!
ކަފިހި ހުރަސްތައް ކައިރީ ޓްރެފިކްފުލުހުން ތިބޭތިބުން އެކިމީހުން މާނަ ކުރަމުންދަނީ އެކި ގޮތްތަށެވެ. އެއްބަޔަކު މިކަމަށް ތާޢީދުކޮށް ވާހަކަދައްކާއިރު، އަނެއް ބައެއްގެ ޚިޔާލު މިކަމުގައި ތަފާތެވެ. ސޯޝަލް މީޑިއާގައި ބައެއް ފަރާތްތަކުން ބުނެފައިވަނީ ކޮންމެ ކަފިހި ހުރަހެއްކައިރީ ފުލުހެއް ބެހެއްޓުމުން އަންގައިދެނީ ދިވެހިންގެ ނާތަހުޒީބުކަމާއި ތަޞައްރަފު ނުފުދޭ މިންވަރު ކަމަށެވެ.
އަދި ކަފިހި ހުރަހެއްގެ ހަޤީޤީ މާނަ ބައެއް މީހުންނަށް ނޭނގޭކަމަށްވެސް ބައެއް ފަރާތްތަކުން ބުނެއެވެ. ހަމައެހެންމެ މިކަމުން ދައްކައިދެނީ މަގުމައްޗަކީ އެންމެންގެވެސް ތަނަކަށްވީހިނދު، މަގުމަތީގެ ސަލާމަތާއި ރައްކާތެރިކަމަށްޓަކައި ހަދާފައިވާ ޤާނޫނުތަކާއި ޤަވާއިދުތަކަށް ބައެއް ދިވެހިން އިޙްތިރާމްނުކުރާ މިންވަރު ކަމަށްވެސް ބައެއް ފަރާތްތަކުން ބުނެއެވެ.
އަނެއް ބަޔަކު ބުނަމުންދަނީ މަގުމަތީގެ ރައްކާތެރިކަން ކަށަވަރުކުރުމަށް ފުލުހުން އަބަދުހެން މަގުމަތީގައި ތިބެގެންނޫނީ މިކަން ހައްލުކުރެވެން ނެތްކަމަށެވެ. ނަމަވެސް ކޮންމެ ދިވެއްސެއްގެ ފަހަތުގައި ފުލުހަކު ބަހައްޓާހިސާބަށް މިޤައުމުގެ ކަންކަން ގޮސްފިތޯއެވެ؟ ސަލާމަތާއި ރައްކާތެރިކަން ކަށަވަރު ކުރުމަކީ ހަމައެކަނި ސަލާމަތީ ބާރުތަކުގެ ޒިންމާއެއް ކަމުގައި ބަލައިގެން ތިބުން މިއީ އެންމެ ރަނގަޅު ގޮތްތޯއެވެ؟
ޕޮލިސް ސްޓާފް ސަރޖަންޓް ޙުސެއިން އަސްލަޙު ފާހަގަކުރެއްވިގޮތުގައި ކަފިހި ހުރަސް ބޭނުންކުރާއިރު، ދުއްވާ މީހުންގެ އިތުރުން މަގު ހުރަސްކުރާ މީހުންގެވެސް ޒިންމާއެއް އޮންނާނެއެވެ. އެގޮތުން ހިތުހުރިތަނަކުން މަގު ހުރަސްކުރުމުގެ ބަދަލުގައި އެކަމަށް ކަނޑައެޅިފައި އޮންނަ ސަރަޙައްދަކުން މަގުހުރަސްކުރުމަށާއި، ހުރަސްކުރުމުގެ ކުރިން މަގުގެ ދެފަރާތް ރަނގަޅަ ބަލައި ޗެކްކުރުމަކީ ހިނގާމީހުންގެ ޒިންމާއެއްކަމަށް އޭނާ ވިދާޅުވިއެވެ.
"އަންނަ ގޮތަށް އައިސް މަގުހުރަސް ކުރަން އުޅެގެން މީގައި ވަރަށް ނުރައްކާތެރި ކަންތައްތަކެއް އެބަހިނގާ. އަޅުގަނޑުމެން ޤަބޫލުކުރަންޖެހޭނެ ވެހިކަލްތައް ދުއްވާފައި މިއަންނަނީ ފުދޭވަރެއްގެ ސްޕީޑެއްގައިކަން. ކުއްލިއަކަށް ކޮންޓްރޯލް ކުރަންވެއްޖެނަމަ ކޮންމެ މީހަކަށްވެސް އުނދަގޫވާނެ. މަގު ހުރަސްކުރަން ބޭނުންވާ ބޭފުޅުންވެސް އަމަލުކުރަންޖެހޭ ގޮތަކީ އެބޭފުޅަކު އެހުރަސްކުރަން ބޭނުންވާ ކަފިހި ހުރަހެއް ކައިރިއަށްގޮސް މަގު ހުރަސްކުރުމުގެ ކުރިން މަގުގެ ދެ ފަރާތްވެސް ރަނގަޅަށް ބަލާ ޗެކްކުރުން."
ޤަވާއިދަށް ހުރުމަތްތެރިކޮށް ނުހިތުމަކީ މޮޅުކަމެއް ނޫން!
މަގު ހުރަސްކުރުމަށް މަގު ހިނގާ މީހުންނަށް ކަނޑައެޅިފައިވާ ފުރުޞަތު ނުލިބުމުން، ކޮންމެ ގޮތަކުންވެސް މަގުހުރަސްކުރަން ޖެހުމާއި އެކަމަށް ފުރުޞަތު ނުދޭން ވެހިކަލް ދުއްވާ މީހުން މަސައްކަތްކުރާ ކަމަށް ބަލަންޖެހޭ ފަދަ ޙާލަތުވެސް ބައެއް ފަހަރު ފެނެއެވެ. އަދި ތިމާ އެހެން މީހަކަށް ފުރުޞަތުދިނުމަކީ، ތިމާގެ ބަލިކަށިކަންކަމަށް ބަލާހެން ހީވާ ފަހަރާއި، އަނެކާއަށް ޖެއްސުންކޮށް ނުވަތަ ތިމާގެ ގަދަކަން ދެއްކުމަށް މަސައްކަތްކުރާ މަންޒަރުވެސް މަގުމަތިން ފެނެއެވެ.
މީގެ އިތުރުން އެއްވެސް ވަރަކަށް ބެލުމެއްނެތި ހަމަކޮންމެ ދިމާއަކުން މީހުން މަގު ހުރަސް ކުރާތަން ފެންނަނީވެސް މަދެއްކޮށެއް ނޫނެވެ. މިފަދަ ތަފާތު ނުރަނގަޅު ކަންކަމުން ދޭހަވަނީ ނާތަހުޒީބުކަމާއި އިޙްތިރާމް ކުޑަކުރުމުގެ ސިފަތަކެވެ. މިއީ މޮޅުކަމެއްކަމަށް ދެކޭނީ މޮޅުމީހުންތޯ ނުވަތަ އެންމެ ދަށުދަރަޖައިގެ މީހުންތޯ ސުވާލުކޮށްލަންޖެހެއެވެ.
އެންމެންގެ ސަލާމަތަށް ހެދިފައި ހުންނަ މިފަދަ ޤަވާއިދުތަކަށް ބޯނުލެބުމުގެ ސަބަބުން ހިތާމަވެރި އެތައްހާދިސާތަކެއް މިހާރުވެސް އަންނަނީ ހިނގަމުންނެވެ.
ފުލުހުން މި ކުރާމަސައްކަތާ އެއްވަރަށް ޢާއްމުންގެ ވިސްނުންވެސް މިކަމުގައި ބޭނުންކުރަން އެބަޖެހެއެވެ. މިފަދަ ޤަވައިދުތަކަށް އަހުލުވެރިވެގެން މެނުވީ މުޖުތަމައުގައި ހުންނަ މިފަދަ ކަންތައްތަކެއް ނުހުއްޓުވޭނެއެވެ. މިފަދަ ޤަވައިދުތަކަކީ އެންމެންގެ ލާބަޔާއި މަންފާޔަށް ހެދިފައިވާ ޤަވައިދުތަކެއްކަން, މިއީ މިހާރު ދިވެހިން ޤަބޫލުކުރަން ވެއްޖެ ހަޤީޤަތެކެވެ. އެހެންކަމުން މަގު ހުރަސްކުރަން ބޭނުންނަމަ، ކަފިހި ހުރަހުން ހުރަސްކުރަމާތޯއެވެ؟ އަދި ކަފިހި ހުރަހުން ހުރަސް ކުރާ ފަރާތްތަކަށް އެފުރުޞަތު ދެމާތޯއެވެ؟