އޭޝިއަން ކަޕް ކޮލިފައިން 23 އަހަރުން ދަށުގެ މުބާރާތުގައި ލުބުނާނާ ދެކޮޅަށް ރާއްޖެ އަށް ނަތީޖާ ނެރެވޭނީ ވަރަށް ހިތްވަރުކޮށްގެން ކަމަށް ކޯޗު ޕީޓަރ ސެގަޓް ބުނެފިއެވެ.
މެޗުގެ ކުރިން ވާހަކަ ދައްކަމުން ކޯޗު ބުނީ ދެ ޓީމު ފުރަތަމަ މެޗުން ބަލިވެފައިވީ ނަމަވެސް ލުބުނާނު ޓީމަކީ ހުރިހާ ގޮތަކުން ވެސް ރާއްޖެ އަށްވުރެ މޮޅު ޓީމެއް ކަމަށެވެ. އަދި ރާއްޖެ އަށް އެންމެ އުނދަގޫވާނީ ލުބުނާނު ކުޅުންތެރިން ހަށިގަނޑުން ބިޔަވުންކަމަށެވެ.
ކޯޗު ޕީޓަރ ސެގަޓް ބުނީ ހުނަރުގެ ގޮތުން އެމީހުންނަށްވުރެ ރާއްޖެ މޮޅުކަމަށާއި، އެކަމަކު ރާއްޖޭގެ ޓީމުގެ ތަޖުރިބާއެއްނެތްކަމަށެވެ.
ޕީޓަރ ސެގަޓް ޔޫއޭއީއާ ދެކޮޅަށް ރާއްޖެ ކުޅުނީ ވަރަށް ރަނގަޅު މެޗެއް ކަމަށާއި ފަރުވާތެރިވެގެން ކުޅުންތެރިން ހިތްވަރުކޮށްފިނަމަ ނަތީޖާ ނެރެވިދާނެ ކަމަށެވެ.
ސަބަބަކީ ރާއްޖެ މޮޅުވާނެ ކަމަށް އެކަކު ވެސް ހީނުކުރާނެކަމަށާއި، ރާއްޖެއަށް މި މެޗުގައި ޕްރެޝަރެއް އަދި ގެއްލޭނެ އެއްޗެއްވެސްނެތް ކަމަށް ކޯޗު ބުންޏެވެ.