މާލެއާއި ހުޅުލެއާއި ދެމެދު އަޅާ ބްރިޖް އެޅުމުގެ ކުރިން ހަދާ ފައިނަލް ދިރާސާތައް ތިންމަސް ދުވަހުގެ ތެރޭގައި ނިންމާ، ދެމަސް ދުވަހުގެ ތެރޭގައި ޓެންޑަރ ކުރުމަށް ޗައިނާ ސަރުކާރުން ހުޅުވާލާނެކަމަށް ހައުސިންގ މިނިސްޓަރ ޑރ. މުހައްމަދު މުއިއްޒު ވިދާޅުވެއްޖެއެވެ.ހުޅުލެއާ މާލެ ގުޅިވައިދޭ ބްރަޖަކީ ސަރުކާރުން މިހާރު އެންމެ އިސްކަމެއް ދީގެން ކުރިޔަށްގެންދާ މަޝްރޫއެވެ. މިހާރު ކުރިޔަށްދަނީ ބްރިޖްގެ އަމަލީ މަސައްކަތްތައް ފެށުމަށް ކުރަންޖެހޭ ސާވޭގެ މަސައްކަތްތަކެވެ.ސާވޭގެ މަސައްކަތުގެ ތެރޭގައި ބްރިޖްއަޅާ ސަރަހައްދުގެ ކަނޑުގެ އޮއިވަރުބެލުމާއި، މިނޫންވެސް ވަރަށް ގިނަ ޓެކްނިކަލް މައުލޫމާތު އެއްކުރުމުގެ މަސައްކަތް ހިމެނެއެވެ.ޓެކްނިކަލް ސާވޭގެ މަސައްކަތްތައް ކުރިޔަށްއޮތް ދެމަހާ ބައި ދުވަސްވަންދެން ކުރިޔަށްދާނެކަމަށް ސަރުކާރުން ލަފާކުރެއެވެ. މިސާވޭތަކަށް ޗައިނާގެ ފަންސާހެއްހާ ފަންނީ ބޭފުޅުން ރާއްޖޭއައިސް މަސައްކަތްކް ކުރިއަށްގެންދާނެއެވެ.ބްރިޖް އެޅުމުގެ ކުރިން ކުރިއަށްގެންދާ ދިރާސާތަކާއި ގުޅޭގޮތުން ހައުސިންގ މިނިސްޓަރ ޑރ. މުހައްމަދު މުއިއްޒު ވިދާޅުވީ، އޮއިވަރު ބަލަން ބޭނުންވާ ޓައިޑް ގޭޖް ހުޅުމާލޭގައި މިހާރު ހަރުކޮށްފައިވާކަމަށެވެ.މާލެއާއި ފުނަ ދޫއާއި ދޭތެރެ އަދި ފުނަދޫއާއި ހުޅުލެއާއި ދޭތެރޭގެ އިތުރުން މާލެއާއި ހުޅުލެއާއި ދޭތެރޭ ދޯންޏާއި ލޯންޗްފަހަރު ބޭނުންކޮށްގެން ތިރީސް ހަ ގަޑިއިރު ވަންދެން އޮއިވަރުގެ ޑޭޓާ އެއްކުރެވިފައިވާކަމަށް މިނިސްޓަރ ވިދާޅުވިއެވެ.މިނިސްޓަރ ވިދާޅުވީ، މިމަހުގެ ހަތްވަނަ ދުވަހު އެސަރަހައްދުގެ އޮޔާއި ރާޅު ހުރި ގޮތްބެލުމަށް ވޭވް ގޭޖް ހަރުކޮށްފައިވާކަމަށެވެ. އަދި އެތަކެތި ހަރުކުރުމުގެ ކުރިން އެސަރަހައްދުގެ ކަނޑުގެ އަޑި ހުރި ގޮތްބެލުމަށް އެސަރަހައްދަށް ފީނާ އެސަރަހައްދު ބަލާފައިވާކަމަށާއި، އެއަށްފަހު އެންމެ ރަނގަޅު ސަރަހައްދުތަކުގައި އެތަކެތި ހަރުކޮށްފައިވާކަމަށެވެ.މީގެ އިތުރުން ހުޅުލޭގެ ޓޮޕޮގްރަފީ ސާވޭގެ މަސައްކަތްތަށް އިއްޔެ ފަށާފައިވާކަމަށާއި، އެގޮތުން ހުޅުލޭގެ ދެކުނު ސަރަހައްދާއި އެސަރަހައްދުގެ ރަންވޭ މެޕްކުރެވިފައިވާކަމަށްވެސް މިނިސްޓަރ ވިދާޅުވިއެވެ. އަދި ކުރިއަށް އޮތް ހަތަރު ދުވަހުގެ ތެރޭގައި އެމަސައްކަތްތައް ނިންމާލެވޭނެކަމަށް ލަފާކުރވޭ ކަމަށްވެސް މިނިސްޓްރީން ބުނެއެވެ.މިނިސްޓަރ މުއިއްޒު ވިދާޅުވީ އެސަރަހައްދުން މައުލޫމާތުތައް އެއްކުރުމަށް އެއްރޕޯޓްގެ ފްލައިޓް ލޭންޑިންގައާއި، ޓޭކް އޮފް ޓައިމްއާއި ކޮންޓްރޯލް ޓަވަރއާއި ކޯޑިނޭޓް ކުރެވިފައިވާކަމަށެވެ. އަދި ބެޓިމެޓްރީ ނުވަތަ އަޑީ ހުންނަގޮތް ބެލުމުގެ މަސައްކަތް ކުރުމަށްޓަކައި މާލެއާއި ހުޅުލެ އާއި ދެމެދުވާ ކަނޑުއޮޅިންފަށައިގެން ފުނަދޫއާއި ދެމެދުވާ ސަރަހައްދުގެ ކަނޑުއަޑީގެ ފުންމިން ދެނެގަތުމުގެ މަސައްކަތް ދިހަ ވަރަކަށް ދުވަހަށް ކުރިއަށްދާނެކަމަށްވެސް ވިދާޅުވިއެވެ.އެމަސައްކަތްކުރުމަށްޓަކައި ހުޅުލޭ ދެކުނު ފަރާތު ކަނޑު އަޑީގައި ސަރަހައްދުގައި ވޭވް ގޭޖް ތައް ދުއިސައްތަ މީޓަރުގެ ސަރަހައްދެއްގައި ހަރުކޮށް އެސަރަހައްދު މިހާރު ބަންދުކުރެވިފައިވާކަމަށް މިނިސްޓަރ ވިދާޅުވިއެވެ. އަދި އެސަރަހައްދު އާންމުނަށް އެނގޭނެގޮތަށް ޑައިވަރުންނާއި ކަނޑުގައި ދުއްވާ އުޅަނދުތަކަށް ނުވަދެވޭނެހެން އެފަރާތްތަކަށް އެސަރަހައްދު އެނގޭނެގޮތަށް ފާހަގަކޮށްފައިވާކަމަށްވެސް ވިދާޅުވިއެވެ.މިނިސްޓަރ މުއިއްޒު ވިދާޅުވީ، އާންމުކޮށް އެފަދަ މަސައްކަތަށް ކުރިއަށްގެންދާ މިންވަރަށް ވުރެ ބާރު ދުވެއްޔެއްގައި ކުރިއަށްދާކަމަށާއި، ދެމަހާއި ބައި ގެ ތެރޭގައި ޑިޒައިންނާއި ބްރިޖާއި ބެހޭ ހުރިހާ މަސައްކަތްތަކެއް ނިންމާލެވޭނެކަމަށެވެ.މާލެއާ ހުޅުލެ ގުޅުވާލާ ބްރިޖް އެޅުމަށް ހަމަޖެހިފައިވަނީ މާލޭގެ އިރު އުތުރު ބޮޑުތަކުރުފާނުމަގު އަމީނީމަގުކޮޅާ ދިމާއިން އިބްރާހިމް ނާޞިރު އިންޓަރނޭޝަނަލް އެއާރޕޯޓްގެ މިހާރު ބޭނުންކުރާ ރަންވޭއާ ދިމާއަށްވާގޮތަށެވެ.ބްރިޖްގެ އަމަލީމަސައްކަތް މިއަހަރުގެ ޑިސެންބަރުމަސްތެރޭގައި ފަށާ، ދެއަހަރެއްހާ ދުވަހުގެ ތެރޭގައި ބްރިޖްގެ މަސައްކަތް މުޅިންނިމި ހުޅުވޭވަރުވާނެކަމަށް ސަރުކާރުން ލަފާކުރެއެވެ.