ޖެހިޖެހިގެން ދެ އަހަރު ޗެމްޕިއަންސް ލީގުގެ ސެމީ ފައިނަލަށް ދިއުމަކީ ވަރަށް ބޮޑު ކާމިޔާބީއެއް ކަމަށް ލިވަޕޫލުން ބުނެފި އެވެ.
ކޯޗު ޔާގެން ކްލޮޕް މިހެން ބުނީ ރޭ އަމިއްލަ ދަނޑުގައި ޕޯޓޯ 4-1އިން ބަލިކުރުމަށްފަހު އެވެ. ސާދިއޯ މާނޭ އާއި މުހައްމަދު ސަލާހް އަދި ރޮބާޓޯ ފިރްމީނޯ އާއި ޑިފެންޑަރު ވާޖިލް ވެންޑައިކްގެ ގޯލުން ލިވަޕޫލް މޮޅުވުމުން ކްލޮޕް ބުނީ ކުޅުންތެރިންނަށް ތައުރީފް ހައްގު ކަމަށެވެ.
"ޖެހިޖެހިގެން ދެ އަހަރު ސެމީ ފައިނަލަށް ދިއުމަކީ ކުޑަ މަސައްކަތެއްނޫން. މިއީ ވަރަށް ކާމިޔާބު މަސައްކަތެއް. އަހަރެން އުފާވޭ މި ކުލަބުގެ ކުޅުންތެރިންނާއި ޓީމުގެ އެންމެހާ މެމްބަރުންނާމެދު،" މިދިޔަ އަހަރުގެ މުބާރާތުގެ ފައިނަލް ކުޅުނު ޓީމުގެ ކޯޗު ބުންޏެވެ.
މުބާރާތުގެ ސެމީ ފައިނަލުގައި ލިވަޕޫލް ނުކުންނަން ޖެހޭނީ ސްޕޭނުގެ ޗެމްޕިއަން ބާސެލޯނާއާ ދެކޮޅަށެވެ. ކްލޮޕް ބުނީ ފަސް ފަހަރު ތަށި ހޯދާފައިވާ ލިވަޕޫލާއި ބާސެލޯނާގެ ފުޓްބޯޅަ މެޗެއް ކުޅެން ސެމީ ފައިނަލުން ފުރުސަތު ލިބުމަކީ ވަރަށް ބޮޑު ރަނގަޅެއް ކަމަށެވެ.
"މިއީ ވަރަށް ހާއްސަކަމެއް. ލިވަޕޫލް އާއި ބާސެލޯނާ ކުޅޭނަމަ އެތައް ބައެއްގެ ސަމާލުކަން މެޗަށް ހުއްޓޭނެ،" ކްލޮޕް ބުންޏެވެ.
މި މެޗު ވެގެންދާނީ ލިވަޕޫލް ދޫކޮށް ބާސެލޯނާ އަށް ބަދަލުވި އެ ޓީމުގެ ކުރީގެ ދެ ތަރިން ކަމަށްވާ ލުއިސް ސުއަރޭޒް އާއި ފިލިޕް ކުޓީޏިއޯ ލިވަޕޫލާ ދެކޮޅަށް ކުޅޭނެ ފުރަތަމަ މެޗަށެވެ.