އިންޑިޔާގެ މަޝްހޫރު ދެ ކްރިކެޓް ކުޅުންތެރިން ކަމަށްވާ މަހެންދްރާ ސިންގް ދޯނީ އާއި ކެޕްޓަން ވިރާތް ކޯލީގެ އޮޓޮގްރާފާއެކު ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްއަށް ކްރިކެޓް ބެޓެއް ހަދިޔާކުރައްވައިފިއެވެ.
މިއީ އިންޑިއަން ޕްރިމިއަރ ލީގުގައި ބެންގަލޫރާއި ޗެންނާއި ސުޕަ ކިންގްސް ބައްދަލުކުރި މެޗު ބައްލަވަން ރައީސުލްޖުމްހޫރިއްޔާ އިއްޔެ ވަޑައިގަތުމުން އެމަނިކުފާނުގެ ޝަރަފުގައި ހަދިޔާކުރި ބެޓެކެވެ. މީގެ އިތުރުން މި ދެ ކުޅުންތެރިން ވަނީ ދެ ޓީމުގެ ޖާޒީވެސް ރައީސަށް ހަދިޔާކުރައްވާފައެވެ.
ރާއްޖޭގެ ފޮރިން މިނިސްޓަރު އަބްދުﷲ ޝާހިދު ރޭ ދަނޑުގައި ހުންނަވައިގެން ވިދާޅުވީ މިއީ ދެ ގައުމުގެ ގުޅުން ރަނގަޅު ކުރުމަށާއި ކްރިކެޓްގެ ތަޖުރިބާ ހިއްސާ ކުރުމަށް ރައީސުލްޖުމްހޫރިއްޔާ އިންޑިޔާ އަށް ކުރެއްވި ޒިޔާރަތެއް ކަމަށެވެ.
އަދި އިންޑިޔާގެ އެހީގައި ރާއްޖޭގައި ކްރިކެޓް ސްޓޭޑިއަމެއް އަޅައި އެ ދަނޑުގައި އިންޑިޔާގެ ކުޅުންތެރިން ކުޅޭ މަންޒަރު ފެނުމަކީ ވަރަށް ބޮޑު އުއްމީދެއް ކަމަށް ޝާހިދު ވިދާޅުވިއެވެ.
މިދިޔަ ފެބްރުއަރީ މަހު އިންޑިޔާގެ އެއާ އިންޑިޔާ ކްރިކެޓް ޓީމު ވަނީ މާލެ އައިސް ރައީސުލްޖުމްހޫރިއްޔާގެ ޓީމަކާއެކު އެކުވެރިކަމުގެ މެޗެއް ކުޅެފައެވެ.