އަންނަ ސީޒަނުގައި މެންޗެސްޓާ ޔުނައިޓެޑް ވަރުގަދަ ކުރުމަށް ހަ ކުޅުންތެރިއަކު ގެންނަން ޖެހޭ ކަމަށް ކޯޗު އޮލޭގަނާ ސޮލިޝަޔާ ބުނެފި އެވެ.
އޭނާ މިހެން ބުނީ އެންމެ ފަހުން ކުޅުނު އަށް މެޗުގެ ތެރެއިން ހަ މެޗުން ބަލިވުމުންނެވެ. އަދި މިވަގުތު އަންނަ ސީޒަނުގެ ޗެމްޕިއަންސް ލީގުން ޖާގަ ލިބުން ޝައްކުވެފައިވަނިކޮށެވެ.
"އަހަރުމެން ބޭނުންވަނީ އަހަރުމެން ޗެމްޕިއަންސް ލީގަށް ކޮލިފައިކޮށްދޭނެ ކުޅުންތެރިން. އަހަރުމެން ގަދަ ހަތަރަކަށް ގެންގޮސްދޭނެ ކުޅުންތެރިން. އަހަރެންނަށް ކޯޗުކަން ދިންއިރު މަޝްވަރާކުރެވުނު އެންމެ މުހިންމު އެއް ކަމަކީ ޔުނައިޓެޑް ވަންތަ ކުޅުންތެރިން އުފެއްދުން. އަހަރުމެން ޔުނައިޓެޑަށް ކުޅުނުއިރު ކުޅެނީ ކުލަބަށް ކުޅޭހިތުން. ކޯޗު އަހަރުމެންނަށް އިތުބާރުކުރޭ. އަދި އަހަރުމެން ޒިންމާނަގަން އަހަރުމެންގެ އަމިއްލަ ކެރިއަރާމެދު. ކުރިއަށްދާން ބޭނުންވޭ،" ޔުނައިޓެޑަށް 11 އަހަރު ކުޅެދީ 1992ގެ ޗެމްޕިއަންސް ލީގު ކާމިޔާބުކޮށްދޭން ލަނޑު ޖެހި ފޯވަޑް ބުންޏެވެ.
އޭނާ ބުނީ ހަ ކުޅުންތެރިއަކު ގެނެސްގެންނޫނީ ޓީމު ބަދަލު ނުކުރެވޭނެ ކަމަށާއި ނަމަވެސް އެއީ ކުރަން ފަސޭހަ ކަމެއްނޫން ކަމަށެވެ.
"ދެތިން ޓްރާންސްފާ މާކެޓުން ނޫނީ މުޅި ޓީމު ބަދަލެއްނުކުރެވޭނެ. އެއްވެސް ކޯޗަކަށް ފަސޭހަކަމެއްނޫން ހަ ކުޅުންތެރިން އެއްފަހަރާ ބަދަލުކޮށްލުން އެއީ. ސަބަބަކީ މިހާރުގެ ޓްރާންސްފާ މާކެޓް އޮތްގޮތުން. ކުޅުންތެރިންގެ އަގުތައް ބޮޑު" ސޮލިޝަޔާ ބުންޏެވެ.