ބާސެލޯނާގެ ސަޕޯޓަރުން އެކުލަބުގެ މިޑްފީލްޑަރު ކުޓީނިއޯ އަށް މަލާމާތްކުރާތީވެ އޭނާގެ ދިފާއުގައި ކެޕްޓަން ލަޔޮނަލް މެސީ ނުކުމެއްޖެއެވެ.
ޗެމްޕިއަންސް ލީގުގައި ކުޓީނިއޯގެ ކުރީގެ ޓީމު ކަމަށް ލިވަޕޫލް އަތުން 3-0އިން ބާސެލޯނާ މޮޅުވި މެޗުގައި ސަޕޯޓަރުން ވަނީ ކުޓީނިއޯއާ ދިމާކޮށް ހަޅޭއްލަވާފައެވެ. މިއީ އަމިއްލަ ސަޕޯޓަރުން ކުޓީނިއޯއާ ދިމާކުރި ދެ ވަނަ ފަހަރެވެ.
ކުޓީނިއޯއާ ބާސެލޯނާގެ ސަޕޯޓަރުން ދިމާކުރާ މައިގަނޑު ސަބަބަކީ އެމީހުން ބޭނުންވާ ފެންވަރަށް އޭނާ އަށް ނުކުޅެވޭތީއެވެ. އޭނާ އަކީ ކުލަބުގެ ތާރީހުގައި ގެނައި އެންމެ އަގުބޮޑު ކުޅުންތެރިޔާއެވެ.
ނަމަވެސް މެޗަށް ފަހު މެސީ ބުނީ އަމިއްލަ ސަޕޯޓަރުން ޓީމުގެ ކުޅުންތެރިންނާ ދިމާކުރުމަކީ ހިތާމަކުރާ ކަމެއް ކަމަށެވެ. އަދި އެންމެ ގުޅިގެން ކުރިއަށް ދިއުމަށް އޭނާ ވަނީ ގޮވާލައިފައެވެ. ލިވަޕޫލް އަތުން މޮޅުވި މެޗުގެ ފުރަތަމަ 11ގައި ކުޅެން ނުކުތަސް ކުޓީނިއޯ ވަނީ 60 މިނިޓަށް ފަހު ބާލައިފައެވެ. އެއީ ފަހުހާފުގައި އޭނާ އަށް އެދެވޭ ކުޅުމެއް ނުދެއްކުމުންނެވެ.