ތަފާތު އެކި އޮޕަރޭޝަންތަކުގައި ފުލުހުން ބަލާ ފާސްކުރާ ގޭގޭގެ ތަކެއްޗަށް ގެއްލުންދޭ ކަމަށް ބުނެ ދައްކަމުންދާ ވާހަކަތަކަކީ ފުލުހުންގެ މަސައްކަތަށް ހުރަސް އެޅުމުގެ ގޮތުން ދައްކަމުން ގެންދާ ވާހަކަތަކެއް ކަމަށް ފުލުހުން ވިދާޅުވެއްޖެއެވެ.
ފުލުހުން ދިން ގެއްލުމެއް ކަމަށް ބުނެ ދައުރުކުރާ ވީޑިއޯއަކާއި ގުޅިގެން ފުލުހުން މިއަދު ކުރެއްވި ޓްވީޓެއްގައި ވިދާޅުވީ މިހާރު ދައުރުވަމުންދާ ވީޑިއޯ އަކީވެސް ފުލުހުން މަސްތުވާތަކެތި ހޯދުމަށް ކުރާ މަސައްކަތަށް ހުރަސްއެޅުމަށް ބަޔަކު ކޮށްފައިވާ ކަމެއް ކަމަށެވެ.
ރާއްޖެއިން މަސްތުވާތަކެތި ނައްތާލުމަށް އެ އިދާރާއިން ކެނޑިނޭޅި މަސައްކަތް ކުރަމުންދާކަމަށާއި އެ މަސައްކަތުގެ ދަށުން މަސްތުވާތަކެތި ފޮރުވާފައި ހުންނާނެކަމަށް ބެލެވޭ ތަންތަން ބަލާ ފާސްކުރުމުގެ މަސައްކަތް ބާރު ސްޕީޑްގައި ކުރިއަށްދާކަން ފުލުހުން ފާހަގަކުރެއްވިއެވެ.
ޤާނޫނާއި ގަވައިދުތަކުގެ ދަށުން މަސްތުވާތަކެތި ގެންގުޅޭކަމަށް ޝައްކުކުރެވޭ ގެތައް ބަލާ ފާސްކުރުމުގައި، މިހާތަނަށް ފާސްކުރި ދެގެއެއްގެ ދަނގަޑު ދޮރެއް ކީހާލައިގެން ވަދެ މަސްތުވާތަކެތި ހޯދާފައިވާކަމަށް ފުލުހުން ހާމަކުރެއްވިއެވެ. އެ އޮޕަރޭޝަންގައި ފުލުހުން ބަލާ ފާސްކޮށްފައި ވަނީ ގ.ޕެލިކަން އަދި ފ.މެމޮރީ ވިލާއެވެ. ފުލުހުން ވިދާޅުވީ އެއިން އެއްވެސް ގެއެއްގައި ހުރި ތަކެއްޗަށް ގެއްލުމެއް ދީފައިނުވާނެ ކަމަށެވެ.
މަސްތުވާތަކެތި ގެންގުޅޭކަން ޝައްކުކުރެވިގެން ގ. ޕެލިކަން އަދި ފ. މެމޮރީ ވިލާ ބަލާ ފާސްކޮށްފައިވާއިރު، އެ ދެގޭގައިވެސް ފުލުހުންގެ އޮޕަރޭޝަނަށް ހުރަސްއެޅުމަށް ދަގަނޑު ދޮރު ބޭނުންކޮށްގެން ބަންދުކޮށްފައިވާކަމަސް ފުލުހުން ވިދާޅުވެއެވެ.
މި މައްސަލައިގައި މިހާތަނަށް 37 މީހަކު ފުލުހުން ވަނީ ހައްޔަރުކޮށްފައެވެ. އެ ދެގެއިން މަސްތުވާތަކެތިކަމަށް ޝައްކުކުރެވޭ 81 ރަބަރު ޕެކެޓް ފެނިފައިވާކަމަށް ފުލުހުން ވިދާޅުވެއެވެ.
މިފަހަކަށް އައިސް ސެކިއުރިޓީ ވަރުގަދަކޮށްގެން، މަސްތުވާތަކެތީގެ ހުރިހާ ހިދުމަތެއް ލިބޭ ގޮތަށް ފުޅާ ދާއިރާއެއްގައި އެ ވިޔަފާރި ކުރާ ބައެއް ގެތައް މާލޭގައި އެބަހުރި ކަމަށް ފުލުހުން ވަނީ މީގެކުރިންވެސް ވިދާޅުވެފައެވެ. މި މަހުގެ 20ވަނަ ދުވަހު ބޭއްވި ނޫސްވެރިންގެ ބައްދަލުވުމެއްގައި ޑްރަގް އެންފޯސްމަންޓް ޑިޕާޓްމަންޓްގެ ހެޑް އަދި ސުޕްރިޓެންޑެންޓް އޮފް ޕޮލިސް އަހުމަދު ޝާކިރު ވިދާޅުވީ ފުލުހުން އެ ގެތަކަށް ވަނުމަށް ހުރަސް އެޅުމުގެ ގޮތުން ގޭގޭގެ ދޮރުގައި ބޮޑެތި ދަގަނޑު ފިލާ ހަރުކޮށް، ބަންދުކޮށްފައި ހުންނަ ކަމަށް ޝާކިރު ވިދާޅުވި އެވެ. އެކަމަކު، މަސްތުވާތަކެތީގެ އޮޕަރޭޝަންތަކުގައި އެފަދަ ތަންތަން ހަލާކުކޮށްލައިގެން ވަނުމަށް ފުލުހުން ފަސް ނުޖެހޭނެ ކަމަށް އޭނާ ވިދާޅުވި އެވެ.