މާލޭ ހުކުރު މިސްކިތުގެ ދެކުނު ކޮޓަރިކޮޅު މަރާމާތުކުރުމުގެ މަސައްކަތް މިނިސްޓްރީ އޮފް އާރޓްސް، ކަލްޗަރ އެންޑް ހެރިޓޭޖުން ފަށައިފިއެވެ.
ރާއްޖޭގައި ހިރިގަލުން އިމާރާތްކޮށްފައިވާ މަދު މިސްކިތްތަކުގެ ތެރޭގައި ހިމެނޭ ހުކުރު މިސްކިތް ދުނިޔޭގެ ތަރިކައިގެ ލިސްޓުގައި ހިމެނުމަށް ސަރުކާރުން ގިނަ މަސައްކަތްތަކެއް ކުރަމުންދާއިރު، އެތަނަށް ލިބިފައިވާ ގެއްލުންތައް މަރާމާތު ކުރުމުގެ މަސައްކަތް ޔުނެސްކޯއާއި އިންޑިއާ ސަރުކާރާއި ގުޅިގެން ދަނީ ކުރަމުންނެވެ.
މާލޭ ހުކުރު މިސްކިތަކީ ދިވެހީންގެ އިސްލާމީ ވަޙުދަތާއި، ދިވެހީންގެ ހުނަރުވެރިކަމާއި ފަންނުވެރިކަން ދައްކުވައިދޭ އެންމެ ދުވަސްވީ އެއް ބިނާއެވެ. އައްސުލްޠާން އިބްރާހީމް އިސްކަންދަރު 1 ގެ އަމުރުފުޅަކަށް މީލާދީން 1656 ގައި ބިނާކުރެވުނު މި މިސްކިތަކީ ދުނިޔޭގެ އެހެން އެއްވެސް ޤައުމަކުން ނުފެންނަ ފަދަ ހިރިގަލުގެ ފުރިހަމަ މަސައްކަތް ފެނިގެންދާ ބިނާއެކެވެ. މި މިސްކިތް ދުނިޔޭގެ ތަރިކައިގެ ލިސްޓުގައި ހިމެނުމަށްޓަކާ ކުރަމުންދާ މަސައްކަތުގެ ދަށުން މިސްކިތަށް ލިބިފައިވާ ގެއްލުންތައް ބެލުމުގެ މަސައްކަތް ޔުނެސްކޯއާއި އިންޑިއާ ސަރުކާރުގެ އެހީގައި ހެރިޓޭޖް މިނިސްޓްރީން މިހާރު ވަނީ ފަށާފައެވެ.
މި މަސައްކަތުގެ ދަށުން ހުކުރު މިސްކިތުގެ ދެކުނު ކޮޓަރިކޮޅުގެ މަތީގައި އަޅާފައިވާ ބެރި މަރާމާތުކުރުމުގެ މަސައްކަތް އެ މިނިސްޓްރީން ދަނީ ކުރަމުންނެވެ. ދެކުނު ކޮޓަރިކޮޅަކީ ހުކުރު މިސްކިތުގެ މިޙުރާބުގޭގެ ދެ ފަރާތުގައި ހަދާފައިވާ ކޮޓަރިކޮޅުތަކުގެ ތެރެއިން ރަދުން ޙާއްޞަ ލަޤަބެއް ދެއްވާފައިވާ ޖަހާ ހަނގުބޭކަލުންނަށް ޙާއްސަކޮށްގެން ތައްޔާރުކޮށްފައިވާ ކޮޓަރިކޮޅެކެވެ. ހެރިޓޭޖް މިނިސްޓްރީގެ ކަލްޗަރަލް މެނޭޖަރ އަޙްމަދު ހާޝިމް ވިދާޅުވީ، ދެކުނު ކޮޓަރިކޮޅުގެ މަތިން އަޅާފައިވާ ބެރި ހުންނަންވާ ވަރަށްވުރެ 4 ސެންޓި މީޓަރު ތިރިއަށްޖެހިފައިވާކަމަށެވެ. އަދި މިކަމުގެ ސަބަބުން މިސްކިތުގެ ސްޓްރަކްޗަރއަށް އިއާދަނުކުރެވޭ ފަދަ ގެއްލުމެއް ލިބިދާނެކަމުގެ ބިރު އޮތުމުން، އެ ބެރި މަރާމާތުކުރުމަށް ކުރަންޖެހޭ މަސައްކަތް މިހާރު ފަށާފައިވާކަމަށް ހާޝިމް ވިދާޅުވިއެވެ.
"މިހާރުން މިހާރަށް މި މަސައްކަތް ނުކޮށްފިއްޔާ އިއާދަނުކުރެވޭފަދަ ގެއްލުންތަކެއް ލިބިދާނެކަމަށް ޔުނެސްކޯގެ ޓީމާއި އަދިވެސް ކަމުގެ ތަޖުރިބާކާރުން ވަނީ ލަފާދިފައި.. އެ ބެރި ވަނީ މެދަށްވާގޮތަށް ގާތްގަނޑަކަށް 4 މީޓަރަށް ތިރިވެފައި އަސްލު ހުންނަންވާ ވަރަށްވުރެ.. މަތީގައި ހުރި މަޅުތަކާއި އެއްޗެއްސަށްވެސް ގެއްލުންވެފައިވަނީ.. އަޅުގަނޑުމެން މިހާރު މިދަނީ އެ ސާފުކޮށް، އިތުރަށް ގެއްލުމެއްނުވާނެހެން ބަބުލްސް ޖަހާފައި ކިރިޔާ ބެރީގައި ޖެހޭ ނުޖެހޭ ވަރަށް.." ހެރިޓޭޖް މިނިސްޓްރީގެ ކަލްޗަރަލް މެނޭޖަރ އަޙްމަދު ހާޝިމް ވިދާޅުވިއެވެ.
ހާޝިމް ވިދާޅުވީ، މިފަދަ ތަންތަން މަރާމާތުކުރުމުގައި ހަލާކުވެފައިވާ ލަކުޑިކޮޅެއްވިޔަސް އެއްލާލުމަކީ ކުރެވޭނެ ކަމަކަށްނުވާތީ، މިކަމަށް ވަގުތު ހޭދަވާނެކަމަށެވެ. އެހެންކަމުން ލިބިފައިވާ ގެއްލުމުގެ ކުޑަބޮޑުމިން ބަލާ ޙާއްސަ ރިޕޯޓެއް އެކުލަވާލާނެކަމަށާއި، ބެރި މަރާމާތުކޮށް ނިންމުމަށް މަދުވެގެން އެއް މަސްވަރު ހޭދަވޭނަކަމަށް އޭނާ ވިދާޅުވިއެވެ.
"މި މަސައްކަތް އަޅުގަނޑުމެން ރަނގަޅުގޮތުގައި ކުރަންޏާ މިއީ މަހެއްހާ ދުވަހުގެ މަސައްކަތް.. އާދައިގެ ލަކުޑިކޮޅެއް މަރާމާތުކޮށްލާނަމަ ދެތިން ދުވަސްވެސް ނުނަގާނެ.. ނަމަވެސް މިއީ އެގޮތަށް ކުރެވޭނެ މަސައްކަތެއް ނޫން.. މީގެން އެންމެ ލަކުޑިކޮޅެއްވެސް އެއްލައެއް ނުލެވޭނެ.. އެ އެތި މަރާމާތުކޮށްގެން ބައިންދަން މިޖެހެނީ.. މިއީ އާބާތުރަ ފިލުވުމެއްނޫން.. އާބާތުރަ ފިލުވުމަކީ އައު އެއްޗެއް ބޭނުންކުރުން.. އަޅުގަނޑުމެން މި ކުރަނީ މަރާމާތު.. އެހެންވީމަ މިކަމަށް ދުވަސް ނަގާނެ.." ހެރިޓޭޖް މިނިސްޓްރީގެ ކަލްޗަރަލް މެނޭޖަރ އަޙްމަދު ހާޝިމް ވިދާޅުވިއެވެ.
މާލޭ ހުކުރު މިސްކިތަކީ 199 އަކަފޫޓުގެ ޖާގައިގެ މިސްކިތެކެވެ. އަދި މި މިސްކިތް މައިގަނޑުގޮތެއްގައި ބެހިފައިވަނީ ތިން ބަޔަކަށެވެ. އެއީ މިޙުރާބުގެ، މެދު މިސްކިތް އަދި ފަހު މިސްކިތެވެ. މިސްކިތުގެ އިރު، އުތުރު އަދި ދެކުނު ފަރާތުން މިސްކިތަށް ވަންނަން ޙާއްސަކުރެވިފައިވާ ދާލަ ހުރެއެވެ. އަދި މިސްކިތުގައި ކަނޑާފައިވާ ލިޔުންތައް ހުންނަނީ ޢަރަބިބަހުންނާއި ދިވެހިބަހުންނެވެ. ދިވެހިންގެ މުއްސަނދި ތާރީޚާ ގުޅިފައިވާ މި މުހިއްމު ބިނާ އެންމެ އެކަށީގެންވާގޮތެއްގައި މީގެ ކުރިން ބެލެހެއްޓިފައިނެތުމުގެ ސަބަބުން އެކިވަރުގެ ގެއްލުން ވެފައިވާކަން ހެރިޓޭޖް މިނިސްޓްރީން ވަނީ ފާހަގަކޮށްފައެވެ. އެހެންކަމުން މިސްކިތުގެ އަސްލު ނުގެއްލޭނޭހެން، މަރާމާތު ކުރުމުގެ ކަންކަން ކުރިއަށްގެންދިއުމަށް ޙާއްސަ ސަމާލުކަމެއް ދެއްވާނެކަމަށް އެ މިނިސްޓްރީން ވިދާޅުވެއެވެ.