ކުރިއަށް އޮތް ސީޒަނަށް ތައްޔާރުވާން ދެ ޓީމު ވެސް ކުޅުނު ފަހު މެޗުގައި އާސެނަލްގެ މައްޗަށް ބާސެލޯނާ 2-1އިން ކުރި ހޯދައިފި އެވެ.
އަމިއްލަ ދަނޑުގައި ބާސެލޯނާ ކުޅުނު މެޗުގައި އެ ޓީމުގެ ފުރަތަމަ ލަނޑަކީ ކުޅުންތެރިއެއްގެ އަތުން ބައިކޮޅަށް ވަން ގޯލެކެވެ. ޓީމު މޮޅުކޮށްދިނީ ލުއިސް ސުއަރޭޒް އެވެ. އާސެނަލްގެ ހަމައެކަނި ލަނޑު ޖެހީ ޕެޓްރިކް އައުބަމިޔަންގެވެ.
މި މެޗުގައި ކެޕްޓަން ލަޔޮނަލް މެސީ އިނީ ކުޅިބަލާށެވެ. ނަމަވެސް ބާސެލޯނާއާ އަލަށް ގުޅުނު ފޯވަޑް އެންޓޮއިން ގްރިއެޒްމަން މެޗުގެ ބޮޑުގައި ކުޅުނެވެ. އޭނާ ޖެހި ގޯލުވީ އޮފްސައިޑެވެ.
ބާސެލޯނާއިން މި ސީޒަނަށް ތައްޔާރުވާން ގިނަ ކުޅުންތެރިންތަކެއް ހޯދާފައިވާއިރު ކުލަބުގެ ރައީސް ޖޯސެފް މާރިއާ ބާޓޮމެއު ބުނެފައިވަނީ އަންނަ ހަފުތާގައި ފަށާ އާ ސީޒަނުގެ ކުރިން އަދިވެސް އިތުރު ކުޅުންތެރިން ފެނުން ގާތް ކަމަށެވެ. މިވަގުތު އެ ޓީމުން ހޯދުމަށް އެންމެ ބޮޑަށް މަސައްކަތް ކުރަމުން އަންނަނީ ފޯވަޑެކެވެ.