ވެރިކަމުގައި ހޭދަވި މަދު ދުވަސްކޮޅުގެ ތެރޭގައި އެންމެ އިސް ކަމެއް ދެއްވީ، ގާދޫކޮލުން ނިކުންނަށް ދިޔަ ދިވެހިންގެ އާދަކާދައާއި ސަގާފަތް ހިފަހައްޓާ، ދިވެހިންގެ ދިވެހި ވަންތަކަން ދެމެހެއްޓުމަށް ކަމަށް ރައީސުލްޖުމްހޫރިއްޔާ އަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ.އެމަނިކުފާނު މިހެން ވިދާޅުވީ އުމުރުން ދުވަސްވީ ފަރާތްތަކާއި ބައްދަލްކޮށްލެއްވުމަށް، "އިސް ރައްވެހިންގެ މާހެފުން، ރައީސް ޔާމީނާއެކު" މި ނަމުގައި ރޭ ކަނިވާ ސަރަހައްދުގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.އެ މަނިކުފާނު ވެރިކަމާ ހަވާލުވެ ވަޑައިގެންނެވިއިރު ދިވެހި ސާގާފަތާއި އާދަކާދަތައް ދިވެހިންނާ ބީރަށްޓެހިވެފައިވާ ކަމަށާއި، ދިވެހިންގެ ދިވެހިވަންތަކަން މިސްރާބު ޖަހާފައި ހުރީ "ގާދޫކޮލުން ބޭރަށް" ކަމަށް ރައީސް ޔާމީން ވިދާޅުވިއެވެ. ނަމަވެސް ވެރިކަމުގައި ވޭތުވި މަދު ދުވަސްކޮޅުގެ ތެރޭގައި އެމަނިކުފާނު އިސްކަންދެއްވީ ދިވެހިންގެ ދިވެހި ވަންތަކަން ދެމެހެއްޓުމަށް ކަމަށް ރައީސުލްޖުމްހޫރިއްޔާ ވިދާޅުވިއެވެ.ދިވެހިވަންތަ ކަމުން ރާއްޖޭގެ މިނިވަންކަމާއި ރީތި އާދަކާދަތަކާއި އުފާވެރި ސަގާފަތް ފެނިގެންދާ ކަމަށާއި، އެ އުފާވެރިކަން އެގޮތުގައި ފެނިގެންދަނީ އިސް ރައްވެހިންގެ ގުރުބާނީ އާއި، ބުރަ މަސައްކަތުން ކަމަށް ރައީސް ޔާމީން ވިދާޅުވިއެވެ. އަދި މިފަދަ އުފާވެރިކަމެއް ދޫކޮށްލުމަށްފަހު އެހެން ދިވެހި ރާއްޖެއަކަށް ދިއުމަށް ދިވެހިން ބޭނުން ނުވާކަމަށް ރައީސް ޔާމީން ވިދާޅުވިއެވެ. އެހެންކަމުން ރާއްޖޭގެ އިސް ރައްވެހިން ބޭނުންވަނީ ސުލްހަވެރި ކަމާއެކު އުޅެވޭނެ ގޮތްތަކެއް ކަމަށް އެނގިގެންދާ ކަމަށާއި، އެ ފަރާތްތަކުން ބޭނުންވާ މަގު ސަރުކާރުން ފަހިކޮށްދެއްވާނެ ކަމަށް ރައީސުލް ޖުމްހޫރިއްޔާ ވިދާޅުވިއެވެ.ދުވަސްވީ ކޮންމެ މީހަކީ ގައުމީ ޚިދުމަތްތެރިއެއް ކަމަށާއި، އެ ފަރާތްތަކުން އެންމެ ބޮޑަށް ބޭނުންވަނީ ސިއްހީ ރައްކާތެރިކަން ކަމަށް ރައީސް ޔާމީން ވިދާޅުވިއެވެ. އެގޮތުން އެކި އެކި ބަލިތައް ޖެހިފައިވާ ފަރާތްތަކަށް ހިލޭ ބޭސްފަރުވާ ކުރެވޭނެ ފަސޭހަ އިންތިޒާމްތަކެއް ހަމަޖައްސަވަމުންދާ ކަމަށް އެމަނިކުފާނު ވިދާޅުވިއެވެ.ދެހާސް ސާދަވަނަ އަހަރުވެސް، ފަސްދޮޅަސް ފަސް އަހަރުން މަތީގެ ދެހާސް މީހުން ކިޑްނީ އާއި، ކެންސަރުފަދަ ބަލިތަކުގައި ފަރުވާ ހޯދާފައިވާ ކަމަށް އެމަނިކުފާނު ވިދާޅުވިއެވެ. އަދި މިހާރު ކުރިއަށް ގެންދަވާ ސުޕަރ ސްޕެޝަލިސްޓުންގެ ޕްރޮގްރާމްގެ ފައިދާ އެންމެ ބޮޑަށް ލިބޭނެ ބަޔަކީވެސް އިސް ރައްވެހިން ކަމަށް ރައީސުލް ޖުމްހޫރިއްޔާ ވިދާޅުވިއެވެ.ރައީސް ޔާމީން ވަނީ އިސް ރައްވެހިންނަށް އުފާ ފާގަތިކަން ލިބޭ އެތައް ކަމެއް ކުރިއަށް އޮތް ތަނުގައި ވެސް ސަރުކާރުން ކުރިއަށް ގެންދަވާނެ ކަމަށް ވިދާޅުވެފައެވެ. މާހެފުމުގެ މި ރަސްމިއްޔާތުގައި ރައީސުލްޖުމްހޫރިއްޔާ އާއި، ސީދާ ބައްދަލްކޮށް، އިސް ރައްވެހިންގެ ޝުއޫރުތަކާއި ވާހަކަތައް ސީދާ އެމަނިކުފާނާ ހިއްސާ ކުރުމުގެ ފުރުސަތު ލިބިގެންދިޔައެވެ.ރައީސުލް ޖުމްހޫރިއްޔާ ގެންދަވަނީ މުޖުތަމައުގެ އެކި އުމުރުފުރާގެ ފަރާތްތަކާއި ސިލްސިލާކޮށް ބައްދަލްކުރައްވަމުންނެވެ. އެގޮތުން މީގެ ކުރިން އެމަނިކުފާނު ވަނީ ކުޑަކުދިންނާއި، އަދި ޒުވާނުންނާވެސް ބައްދަލްކުރައްވަމުންނެވެ.