ކާރިސާތަކުގެ ވަގުތުގައި ޢާއްމުންގެ ފުރާނައާއި މުދާ ސަލާމަތްކުރުމުގައި ސަލާމާތީ ބާރުތަކުން ކުރާ ބުރަ މަސައްކަތަކީ ޝައްކެއްވެސްނެތްގޮތުގައި ތަޢުރީފު ހައްޤު މަސައްކަތްތަކެކެވެ. އެކަން ދާދިފަހުން މާލޭގައި ހިނގި ނުރައްކާތެރި އަލިފާނުގެ ޙާދިސާގައި ވަރަށް ފުރިހަމައަށް ފެނިގެންގޮސްފައިވެއެވެ. މި ޙާދިސާގެ ތެރެއިން ފާހަގަވި އެހެންކަމެއްވެސް އެބައޮތެވެ. އެއީ ޙާދިސާގައި ހާލުގައި ޖެހުނު ފަރާތްތަކަށް ދިވެހިންގެ ފަރާތުން ދެއްކި އޯގާތެރިކަމާއި ހިތްހެޔޮކަމުގެ ނަމޫނާއެވެ.
ހާލުގައި ޖެހުނު ފަރާތްތަކަށް އެހީތެރިވުމަށް ނެޝެނަލް ޑިޒާސްޓަރ މެނޭޖްމަންޓް އޮތޯރިޓީ، އެން.ޑީ.އެމް.އޭއިން ޤާއިމުކުރި ރިލީފް ޑިސްޓްރިބިއުޝަން ސެންޓަރ އެހީގެ ތަކެތިން ފުރިގެންދިޔައީ ކުޑަ ހިނދުކޮޅެއްގެ ތެރޭގައެވެ. މިތަކެތި އެހީ ބޭނުންވި ފަރާތްތަކާހަމައަށް ފޯރުކޮށްދިނުމުގައި އެން.ޑީ.އެމް.އޭއާއި ދިވެހި ރެޑް ކްރެސެންޓާއި ސްކައުޓުންނާއި ގާރލް ގައިޑުންގެ އިތުރުން ދަރުމަވެރިން ކުރަމުންދާ މަސައްކަތްތަކަކީވެސް ފާހަގަކޮށްލުން މުހިއްމު ޝުކުރު ހައްޤު މަސައްކަތްތަކެކެވެ.
އަލިފާނުގެ ޙާދިސާގައި ގެއްލުން ލިބުނު ފަރާތްތަކަށް އެހީތެރިވުމަށް ހުޅުވާލި ފުރުޞަތުގައި ދިވެހިންގެ ފަރާތުން ލިބިގެންދިޔައީ އާދަޔާ ޚިލާފު ތަރުޙީބެއްކަމަށް އެން.ޑީއެމް.އޭއިން ދަރުބާރުގޭގައި ޤާއިމުކުރި ރިލީފް ޑިސްޓްރިބިއުޝަން ސެންޓަރގެ އިންޗާރޖް އާމިނަތު އިޒްދިޙާ ރުޝްދީ ވަނީ ސިފަކޮށްފައެވެ. އެހީގެ ތަކެތީގެ ގޮތުގައި އެކި އުމުރު ފުރާގެ މީހުންނަށް ބޭނުންވާނެ އަންނައުނާއި ކެއުންބުއިމަށް ބޭނުންވާ ސާމާނާއި ރީތިވާ ސާމާނުގެ އިތުރުން ކުޑަކުދިންނަށް ބޭނުންވާނެ ތަފާތު ސާމާނު ގިނަ ޢަދަދަކަށް ލިބިފައިވެއެވެ. އަދި އެހީގެ ގޮތުގައި ތަކެތި ބަލައިގަތުން ހުއްޓާލަންޖެހުނީވެސް މެނޭޖްނުކުރެވޭވަރަށް ތަކެތި ލިބުމުންކަމަށް އިޒްތިޙާ ވިދާޅުވިއެވެ.
"މި ޙާދިސާ އެންމެ ފުރަތަމަ ހިނގި ހިސާބުން ދިވެހި ރައްޔިތުންގެ ފަރާތުން އަޅުގަނޑުމެންނަށް ބުނެދޭން ނޭންގޭ ވަރަށް ތަކެތި ލިބިގެންދިޔަ. އަންނައުނާއި ބެޑްޝީޓާއި ބާލީސް ޓޮއިލެޓްރީޒް، ކުޑަކުދިންނަށް ބޭނުންވާ ކާތަކެއްޗާއި ނެޕީއާއި ލުއިކާނާވެސް ލިބިގެންދިޔަ. ވަކި ހިސާބަކުން އެހީގެ ގޮތުގައި ތަކެތި ބަލައިގަތުން ހުއްޓާލަންޖެހުނީވެސް އަޅުގަނޑުމެންނަށް މެނޭޖްކުރަން އުނދަގޫވާވަރަށް ތަކެތި ލިބުމުން." އިޒްދިޙާ ރުޝްދީ ވިދާޅުވިއެވެ.
މި ޙާދިސާއާ ގުޅިގެން 700އަށްވުރެ ގިނަ މީހުންނަށް އެކި ގޮތްގޮތުން އެން.ޑީ.އެމް.އޭއިން އެހީތެރިކަން ފޯރުކޮށްދީފައިވާއިރު އެކަމުގައި 100އަށްވުރެ ގިނަ ދަރުމަވެރިން ޙަރަކާތްތެރިވެފައިވާކަން އިޒްތިޙާ ފާހަގަކުރެއްވިއެވެ. އެފަރާތްތަކުންވަނީ ޑިސްޓްރިބިއުޝަން ސެންޓަރަށް ތަކެތި ބަލައި އަންނަ ޢާއިލާތަކަށް އެތަކެތި ފަސޭހައިން ގެންދެވޭނެ އިންތިޒާމް ހަމަޖައްސައިދިނުމުގެ އިތުރުން އެ ފަރާތްތަކުގެ ގޭގެއަށް އެތަކެތި ޑެލިވަރީކޮށްދިނުމުގައިވެސް އެންމެ އަވަދިނެތި ހަރަކާތްތެރިވެފައިވަނީ ދަރުމަވެރިންނެވެ.
"އޭރުންސުރެއް އަޅުގަނޑުމެން މިތަނުގައި ވަގުތީ ސެޓަޕެއް ހަދައިގެން 100 އަށްވުރެ ގިނަ ވޮލެންޓިއަރުންނާއި އެއްކޮށް އެކި ގަޑިތަކަށް ބަހާލައިގެން އައިސް، ތަކެތި ވަކިކޮށް، ސޯޓްއައުޓްކޮށްގެން ފެމެލީތަކުން އަންނަވަރަކުން ދޫކުރަމުން ދިޔައީ. ހެނދުނު ނުވައަކުން ފެށިގެން ރޭގަނޑު އެގާރާ ބާރަ ޖަހަންދެން އެ މަސައްކަތުގައި މި އުޅެނީ.." އިޒްދިޙާ ރުޝްދީ ވިދާޅުވިއެވެ.
ދަރުމަވެރިންނަކީ އިޖްތިމާޢީ ބަދަހިކަން ވަރުގަދަކުރުމުގައި މުހިންމު ދައުރެއް އަދާކުރާ ބައެކެވެ. ދިމާވާ އެކި ކާރިސާތަކާއި، ހޭލުންތެރިކަން އިތުރުކުރުމާއި، އާންމު އިޖްތިމާއީ ހަރަކާތްތަކުގައި ވަރަށް ފުޅާދާއިރާއެއްގައި ދަރުމަވެރިން ހަރަކާތްތެރިވެއެވެ. ދަރުމަވެރިންގެ ބޭނުންތެރިކަމާއި، އެމީހުންގެ ސަބަބުން މުޖުތަމަޢުއަށްކުރާ ފައިދާ ގިނަ ފަރަހަށް ވަޒަންކުރެވެނީވެސް ކާރިސާގެ މިފަދަ ދަނޑިވަޅުތަކުގައެވެ.
އަމިއްލަކަންކަމަށް ހޭދަކުރާ ވަގުތު ޤުރުބާންކުރުމަށްފަހު، އެމީހުންގެ ހުރިހާ ވަގުތެއް ހުސްކޮށްލަނީ ޢާއްމު ޚިދުމަތަށެވެ. ހަމަ އިންސާނިއްޔަތުކަމަށް އޮންނަ ލޯތްބެއްގެ ބޮޑުކަމުންނެވެ. އަލިފާނުގެ ޙާދިސާގައި ގެއްލުންވި ފަރާތްތަކަށް އެހީތެރިކަން ފޯރުކޮށްދިނުމުގައި ދަރުމަވެރިންގެ ފަރާތުން ފެނުނު މަސައްކަތަށް އައްސަރިބަހާއި ސާބަސް ދޭވަރުވެއެވެ.