ދެމެހެއްޓެނިވި ގޮތަކަށް ރައްކާތެރިކުރެވޭނެގޮތުގެ މެނޭޖްމަންޓް ޕްލޭނެއްނެތި، އެކި ބޭނުންތަކަށް އާސާރީ ތަންތަން ނުކޮނުމަށް ސަގާފީ ތަރިކަ ރައްކާތެރިކުރާ ޤައުމީ މަރުކަޒުން އިލްތިމާސްކޮށްފިއެވެ.
އެ މަރުކަޒުން މިކަމަށް އިލްތިމާސްކޮށްފައިވަނީ ފަހަކަށް އައިސް ބައެއް ފަރާތްތަކުން، ދިވެހިރާއްޖޭގެ ސަޤާފީ ތަރިކައިގެ ޤާނޫނާ ޚިލާފަށް ސަގާފީ ތަރިކަތައް ހޯދުމަށާއި، އާންމުކުރުމަށާއި އެނޫންވެސް ބޭނުންތަކުގައި ތަންތަން ކޮނެހަދާކަން ފާހަގަކުރެވޭތީއެވެ.
ސަޤާފީ ތަރިކަ ރައްކާތެރިކުރާ ޤައުމީ މަރުކަޒުން ނެރެފައިވާ ބަޔާނެއްގައި ވިދާޅުވެފައިވަނީ ސަޤާފީ ތަރިކަ ކަމަށް ބެލެވިދާނެ، އެއް ތަނުން އަނެއް ތަނަށް ނުގެންދެވޭ ފަދަ އެއްޗެއް ނުވަތަ ތަނެއް ފެނިއްޖެނަމަ އަމަލުކުރަންވީގޮތް ދިވެހިރާއްޖޭގެ ސަގާފީ ތަރިކައިގެ ޤާނޫނުގައި ބަޔާންކޮށްފައިވާކަމަށެވެ. އެގޮތުން އެފަދަ އެއްޗެއް ނުވަތަ ތަނެއް ފެނިއްޖެނަމަ އެ ފެނުނު ކޮންމެ ފަރާތަކުން އެ އެއްޗެއް ނުވަތަ އެ ތަނެއް ފެނުނުތާ 48 ގަޑިއިރުގެ ތެރޭގައި އެކަން ރަށު ކައުންސިލްގެ އިދާރާއަށް އަންގަންވާނެކަމަށާއި، އެފަދަ އެއްޗެއް ނުވަތަ ތަނެއް ފެނުނު ސަރަޙައްދެއް އަލުން ހޯދޭފަދަ ގޮތަކަށް ފާހަގަކުރަންވާނެކަމަށް މި ޤާނޫނުގައި ބަޔާންކޮށްފައިވެއެވެ. އަދި އެ މަޢުލޫމާތު ރަށު ކައުންސިލްގެ އިދާރާއަށް ނުވަތަ އަތޮޅު ކައުންސިލްގެ އިދާރާއަށް ނުވަތަ ސިޓީ ކައުންސިލްގެ އިދާރާއަށް ލިބުމުން، ލަސްވެގެން 48 ގަޑިއިރުގެ ތެރޭގައި އެ އިދާރާތަކުން އެކަން މަރުކަޒަށް އަންގަންވާނެކަމަށްވެސް ބަޔާންކޮށްފައިވެއެވެ.
ސަޤާފީ ތަރިކަ ރައްކާތެރިކުރާ ޤައުމީ މަރުކަޒުން ވިދާޅުވީ، ރާއްޖޭގެ ސަރަޙައްދުގައި ހިމެނޭ އެއްވެސް ތަނެއް ކޮންނަނިކޮށް ދިވެހިރާއްޖޭގެ ސަޤާފީ ތަރިކަކަމަށް ބެލެވޭ އެއްޗެއް ނުވަތަ ތަނެއް ފެނިއްޖެނަމަ އެ ކުރަމުންދާ މަސައްކަތެއް ވަގުތުން ހުއްޓާލައި، އެކަމުގެ މަޢުލޫމާތު ލަސްނުކޮށް މަރުކަޒަށް އަންގަންވާނެކަމަށެވެ. އަދި އެ މަސައްކަތެއް އިތުރަށް ކުރިއަށް ގެންދަންވާނީ އެ މަރުކަޒުން އަންގާ ގޮތެއްގެ މަތިންކަމަށެވެ.
ނަމަވެސް ފަހަކަށް އައިސް ބައެއް ފަރާތްތަކުން، މި ޤާނޫނާ ޚިލާފަށް ސަޤާފީ ތަރިކަތައް ހޯދުމަށާއި އާންމުކުރުމަށާއި އެނޫން ވެސް ބޭނުންތަކުގައި ތަންތަން ކޮނެހަދާކަން ފާހަގަކުރެވެމުންދާކަމަށް އެ މަރުކަޒުން ވިދާޅުވެއެވެ. ޤާނޫނީ ގޮތުން ހުއްދަލިބިފައިވާ ފަރާތަކުންވެސް މިފަދަ ތަންތަން ކޮންނަންވާނީ، ކޮނުމަށާއި ކޮނުމަށްފަހު އަމަލުކުރާނޭގޮތުގެ ތަފުސީލުތައް ޕްލޭންކޮށް އެކަމަށް ނަގަންޖެހޭ ހުއްދަތައް ނަގައިގެން ޤާނޫނުގައި ބަޔާންވެގެންވާ ގޮތުގެމަތިން، ކަނޑައެޅޭ ސައިންޓިފިކް ހަމަތަކާއި، އެކަމަށް ޚާއްސަކުރެވިފައިވާ ތަކެތި ބޭނުންކޮށްގެންކަމަށް އެ މަރުކަޒުން ވިދާޅުވެފައިވެއެވެ.
އާސާރީ ތަންތަން ރައްކާތެރިކުރެވޭނެ ގޮތްތައް ނުހޯދައި، ބަލަހައްޓާނެގޮތުގެ ތަސައްވުރެއްނެތި އެފަދަ ތަންތަން ކޮނުމަކީ ދެވޭ ގެއްލުމެއްކަމަށާއި، އެފަދަ ތަންތަން ކޮނުމަށް ބޭނުންކުރާ އާލަތްތައް ބޭނުން ނުކޮށް ކޮނުމަކީ ކަނޑައެޅިގެން އާސާރީ އަދި ތާރީޚީ އެއްޗަކަށް ގެއްލުން ލިބިދާނެކަމެއްކަމަށްވެސް ސަޤާފީ ތަރިކަ ރައްކާތެރިކުރާ ޤައުމީ މަރުކަޒުން ވިދާޅުވެފައިވެއެވެ.
ޚާއްސަގޮތެއްގައި ކަމުގެ ތަޖުރިބާހުރި ދާއިރާގެ މީހުންގެ ބައިވެރިވުން ނެތި، ކަމާބެހޭ ފަރާތްތަކުގެ މަޝްވަރާއާއި ލަފާ ނުހޯދައި ތަންތަން ކޮނުމަކީ އެ ތަންތަނަށް އިއާދަނުކުރެވޭނެ ވަރުގެ ގެއްލުން ވެދާނެކަމެއްކަމަށާއި، ތަނުގެ އަސްލު ގެއްލިގެން ހިނގައިދާނެ ކަމެއްކަމަށްވެސް އެ މަޒުކަޒުން ވިދާޅުވެފައިވެއެވެ. އަދި ދެމެހެއްޓެނިވި ގޮތަކަށް ރައްކާތެރި ކުރެވޭނެގޮތުގެ މެނޭޖްމަންޓް ޕްލޭނެއް ތައްޔާރުކޮށްގެން މެނުވީ އެފަދަ ތަންތަން ކޮނުމަކަށް ޤާނޫނު ތަންނުދޭކަމަމަށާއި، ދިވެހިރާއްޖޭގެ ސަގާފީ ތަރިކައިގެ ޤާނޫނާ ޚިލާފަށް ނުކޮނުމަށާއި، އެތަންތަނަށް ގެއްލުންވެދާނޭ ފަދަ އެއްވެސް އަމަލެއް އެއްވެސް ފަރާތަކުން ނުކުރުމަށް އެންމެހައި ފަރާތްތަކަށް ސަގާފީ ތަރިކަ ރައްކާތެރިކުރާ ޤައުމީ މަރުކަޒުން ވަނީ އިލްތިމާސްކުރައްވާފައެވެ.