ގެވެށިއަނިޔާގެ މައްސަލަތަކާއި ޖިސްމާނީގޮތުންނާއި ނަފްސާނީގޮތުން އަންހެނުންނަށް ކުރާ އަނިޔާގެ ވާހަކަތަކަކީ ދުނިޔޭގެ އެކި ކަންކޮޅުތަކުން އަބަދުވެސް ދައްކަމުންދާ ވާހަކަތަކެކެވެ. މިކަމާމެދު ޢާއްމުން ހޭލުންތެރިކޮށް، މިފަދަ މައްސަލަތައް މަދުކުރުމަށްޓަކާ ދުނިޔޭގެ ފެންވަރުގައި ގިނަ މަސައްކަތްތަކެއް ކުރަމުންދާއިރު، ރާއްޖޭގައިވެސް މިފަދަ ކަންކަމަށް ޢާއްމުން ހޭލުންތެރިކުރުވުމަށް ފަހަކަށްއައިސް އަންނަނީ ތަފާތު މަސައްކަތްތަކެއް ކުރަމުންނެވެ.
އދ.ގެ ތަފާސްހިސާބުތައް ދައްކާގޮތުން ޢުމުރުން 15 އަހަރާއި 49 އަހަރާއި ދެމެދުގެ ކޮންމެ ތިން އަންހެނަކުން އެކަކަކީ ކޮންމެވެސް ބާވަތަކެއްގެ އަނިޔާއެއްގެ ޝިކާރައަކަށްވެފައިވާ މީހުންނެވެ. އަދި ދުނިޔޭގެ ނިސްބަތުން ހިއުމަން ޓްރެފިކިންގ ނުވަތަ އިންސާނީ ވަގުފާރީގެ ޝިކާރައަކަށްވާ މީހުންގެ %71އަކީ އަންހެނުންކަމަށްވާއިރު، އޭގެތެރެއިން ކޮންމެ 4 އަންހެނަކުން 3 އަންހެނުންނަކަށް ޖިންސީގޯނާކުރާކަން ވަނީ ފާހަގަކުރެވިފައެވެ.
ރާއްޖޭގެ ޙާލަތަށް ބަލާއިރު، ޖެންޑަރ މިނިސްޓްރީއަށް ކޮންމެމަހަކު ހުށަހެޅޭ މައްސަލަތަކުގެ ތަފާސްހިސާބުތައް ދައްކާގޮތުންވެސް ކުޑަކުދިންނަށް ކުރާ އެކި ބާވަތުގެ އަނިޔާތަކާއި، ގެވެށި އަނިޔާގެ މައްސަލަތައް ނުވަތަ ވަކި ޖިންސަކަށްވީތީ ކުރާ އަނިޔާގެ މައްސަލަތަކުގައިވެސް އަނިޔާގެ ޝިކާރައަކަށްވާ އަންހެނުންގެ ނިސްބަތް ފިރިހެނުންނަށްވުރެ ގިނަކަން ފާހަގަކޮށްލެވެއެވެ. ފުލުހުންގެ ތަފާސްހިސާބުތަކަށްބަލާއިރު މިއަހަރުގެ އޮކްޓޯބަރުމަހުގެ ނިޔަލަށް އަންހެނުންނަށް ކުރާ އެކި ބާވަތުގެ އަނިޔާއާއި ގުޅުންހުރި ތަފާތު 99 މައްސަލައެއް ހުށަހަޅާފައިވެއެވެ. މީގެ ތެރޭގައި ގެވެށި އަނިޔާގެ 60 މައްސަލައަކާއި، ރޭޕްގެ 4 މައްސަލައެއް ހިމެނެއެވެ.
އަންހެނުންނަށް ކުރާ އެކިބާވަތުގެ އަނިޔާ ހުއްޓުވައި، އަންހެނުންނަށްވެސް ހަމަހަމަ ފުރުޞަތުތައް ހޯދައިދީ، އަންހެނުން ބާރުވެރިކުރުވުމަށް ކުރަމުންދާ މަސައްކަތްތަކުގައި ރާއްޖެއިންވެސް ކުރިއެރުންތަކެއް ހޯދަމުންދިޔަނަމަވެސް، އަދިވެސް މިދާއިރާއިން ގޮންޖެހުންތަކެއް ހުރިކަން ކަމާބެހޭ ފަރާތްތަކުން ފާހަގަކުރެއެވެ. އެގޮތުން އެންމެ ބޮޑު ކަންބޮޑުވުމެއްގެ ގޮތުގައި އަދިވެސް ގިނަ ފަރާތްތަކުން ފާހަގަކުރަނީ އަނިޔާގެ ޝިކާރައަކަށްވާ އަންހެނުން އެކަންކަން ކަމާބެހޭ ފަރާތްތަކަށް ރިޕޯޓްކުރުމުގެ ބަދަލުގައި ސިއްރުކުރާކުރުމެވެ.
ވަކިން ޙާއްސަކޮށް ގެވެށި އަނިޔާއާއި ޖިންސީ ގޯނާކުރުމުގެ މައްސަލަތަކުގައި ޢާއިލީ މަސްލަޙަތަށްބަލައި އެފަދަ ކަންކަން ރިޕޯޓްކުރަން އަދިވެސް އަންހެނުން ފަސްޖެހޭކަން ކަމާބެހޭ ފަރާތްތަކުން ފާހަގަކުރެއެވެ. މިފަދަ ކަންކަން ސިއްރުކުރުމަކީ ކުށަށް އަރައިގަންނަ ފަރާތަށް އެކަން ތަކުރާރުކުރުމަށް ހިތްވަރު ލިބޭ، އަދި އެފަރާތަކާމެދު ޤާނޫނީގޮތުން އަޅަންޖެހޭ ފިޔަވަޅު އެޅުމަށް ހުރަސްއެޅިގެންދާކަމެއްކަން މިއީ މިފަދަ އަނިޔާތަކުގެ ޝިކާރައަކަށްވާ ފަރާތްތަކުން ވިސްނާލުން މުހިއްމުކަމެކެވެ. ހަނުހުރުމަކީ އިންސާފު ލިބޭނެގޮތެއްނޫންކަން އެއީ މިއަދު އެފަރާތްތަކުން ޤަބޫލުކުރަންޖެހޭ ހަޤީޤަތެކެވެ.
ކޮންމެ އަހަރެއްގެވެސް ޑިސެމްބަރުމަހުގެ 25 ވަނަ ދުވަސް ފާހަގަކުރަނީ އަންހެނުންނަށާއި، އަންހެންކުދިންނަށް ކުރާ އަނިޔާއާއި ދެކޮޅަށް މަސައްކަތްކުރާ ދުވަހުގެ ގޮތުގައެވެ. އަދި މި ދުވަހާ ގުޅުވައިގެން "އޮރެންޖް ދަ ވޯލްޑް" މި ތީމުގެ ދަށުން އަންހެނުންނަށާއި އަންހެންކުދިންނަށް ކުރާ އެކި ބާވަތުގެ އަނިޔާއާ ދެކޮޅަށް އަޑުއުފުލުމުގެގޮތުން، 16 ދުވަހުގެ ޙާއްސަ ކެމްޕޭނެއް ކުރިއަށްގެންދެއެވެ. މިއަހަރުގެ ކެމްޕޭންގެ ޝިއާރެއްގެގޮތުގައި ކަނޑައަޅާފައިވަނީ ޖީލުގެ ހަމަހަމަކަން ޤާއިމުކުރުމުގެ ތެރެއިން ރޭޕްކުރުމާއި ދެކޮޅަށް މަސައްކަތްކުރުމެވެ.