ދިވެހި ބަސް ކުރިއެރުވުމުގައި ލިޔުންތެރިކަމާއި ކިޔުންތެރިކަން މުހިއްމު ދައުރެއް އަދާ ކުރާކަމަށާއި، ދިވެހި ބަސް ކުރިއެރުވޭނީ ޅައުމުރުގައި ކުދިން ބަހަށް ޝަޢުގުވެރިކުރުވައިގެންކަމަށް މިނިސްޓަރ އޮފް އާޓްސް، ކަލްޗަރ އެންޑް ހެރިޓޭޖް ޔުމްނާ މައުމޫން ވިދާޅުވެއްޖެއެވެ.
އެކަމަނާ މިހެން ވިދާޅުވީ، ވާހަކަ ޕަބްލިޝަރސްގެ ފަރާތުން ތުއްތު ކުދިންނަށް ޙާއްސަކޮށްގެން އުފައްދާފައިވާ "މަވެށި" ވާހަކަ ސިލްސިލާ ނެރެދެެއްވުމަށް ބޭއްވި ހަފްލާގައި ވާހަކަފުޅު ދައްކަވަމުންނެވެ.
ވާހަކަ ޕަބްލިޝަރސްގެ "މަވެށި" ވާހަކަ ސިލްސިލާގެ ދަށުން 5 ފޮތެއް ވަނީ ނެރެފައެވެ. މި 5 ފޮތްވެސް ލިޔެފައި ވަނީ ރައްޔިތުންގެ މަޖިލީހުގެ ހަނިމާދޫ ދާއިރާގެ ކުރީގެ މެމްބަރު އަދި ލިޔުންތެރިކަމުގެ ދާއިރާގައި ފާހަގަކޮށްލެވޭ ބޭފުޅެއް ކަމުގައިވާ ހުސެއިން ޝަހުދީއެވެ. މި ފޮތްބައި ރަސްމީކޮށް ނެރެދެއްވީ އެކަމަށްޓަކާ ދިވެހިރާއްޖޭގެ އަޑުގެ ސެނެކޯ މާލަމުގައި ބޭއްވި ޚާއްސަ ރަސްމިއްޔާތެއްގައި މިނިސްޓަރ އޮފް އާޓްސް، ކަލްޗަރ އެންޑް ހެރިޓޭޖް ޔުމްނާ މައުމޫނެވެ.
ފޮތްބައި ނެރެއްދެއްވުމަށްފަހު ވާހަކަފުޅުދައްކަވަމުން މިނިސްޓަރ ޔުމްނާ ވިދާޅުވީ، ދިވެހި ބަސް ކުރިއެރުވޭނީ ކުޑައިރުންސުރެއް ކުދިންގެ މެދުގައި ބަހަށް ޝައުގުވެރިކަން އުފެއްދިގެންކަމަށާއި، ކުޑަކުދިންނަށް ޚާއްސަ ވާހަކަފޮތްތަކަކީ އެކަމުގައި މުހިއްމު ދައުރެއް އަދާކުރާ ވަސީލަތެއްކަމަށެވެ.
އަދި ފޮތްކިޔުމުގެ އާދާ އެންމެ ކުޑައިރުންސުރެއް ކުދިންގެ ކިބައިގައި އަށަގަންނުވަންޖެހޭކަމަށާއި، ކުދިން ކިޔެވުމަށް އަޙުލުވެރިކުރެވޭނީވެސް ފޮތްކިޔާ ބަޔަކަށް ހެދިގެންކަމަށް މިނިސްޓަރ ޔުމްނާ ވިދާޅުވިއެވެ. ހަމައެހެންމެ ދިވެހިބަހަކީ ވެސް މަޢުނަވީ ތަރިކައެއްކަން ފާހަގަކުރައްވާ، ދިވެހިބަސް ރައްކާތެރިކުރުމަށްޓަކާ ކުޑަކުދިން ގަޔަވާ ޝަޢުގުވެރި ފޮތްތަކެއް ނެރެންޖެހޭކަން މިނިސްޓަރ ފާހަގަކުރެއްވިއެވެ.
"އަޅުގަނޑުމެންގެ ތެރޭގައި ދެކެވޭ މިހާރުގެ ކުދިން ދިވެހިބަހާ ދުރުވެ، ދިވެހިބަހަށް ނުފަރިތަ ވާހަކަ. ކުޑަކުދިން ޝަޢުގުވެރިވާފަދަ މަންޒަރާ ކުލަތައް ބޭނުންކޮށްގެން ދިވެހި ފޮތްތައްވެސް ހުންނަންޖެހޭ. މިހާރު އިނގިރޭސިބަހުން ހުންނަ ވާހަކަތައްވެސް މި ހުންނަނީ ކުޑަކުދިންނަށް ކަމުދާނެހެން ތަފާތު މަންޒަރުތަކާ ކުލަތައް ބޭނުންކޮށްފައި. ދިވެހިބަސް ކުރިއެރުވުމަށް ތުއްތުކުދިން ގަޔާވާނެހެން ފޮތްތައް ތައްޔާރުކުރުން މުހިއްމު" ޔުމްނާ ވިދާޅުވިއެވެ.
"މަވެށި" ވާހަކަ ސިލްސިލާއާއި ގުޅޭގޮތުން ހުސެއިން ޝަހުދީ ވިދާޅުވީ، މި ސިލްސިލާގެ ދަށުން އޭނާ ލިޔުއްވާފައިވާ 5 ވާހަކަވެސް ޙާއްސަކޮށްފައި ވަނީ ތިމާވެއްޓާއި، އެއްގަމާއި ކަނޑުގެ ދިރުންތަކުގެ މައްޗަށްކަމަށެވެ. ދަރިންނަށް ނިންދެވުމަށް ކިޔައިދޭ ވާހަކަތަކެއް އަސްލަކަށް ބަލައިގެން ތައްޔާރުކޮށްފައިވާ މި ސިލްސިލާގެ ހުރިހާ ވާހަކަތަކެއްވެސް ގެނެސްދީފައި ވާނީ ފެންވަރު ރަނގަޅު ރީތި ކުރެހުންތަކެއް ބޭނުންކޮށްގެންކަމަށް އޭނާ ވިދާޅުވިއެވެ.
"އަޅުގަނޑުމެންގެ ޅަދަރިން ޅައުމުރުގައި ދިވެހި ބަހަށް ލޯބިޖައްސަންޖެހޭ. މިފަދަ ވާހަކަތަކަކުންވެސް އެކުދިންގެ މައުލޫމާތުގެ ޚަޒާނާއަށް ދުޅަހެޔޮކަން ލިބޭނެކަމަށް އުންމީދުކުރަން. އެކުދިންގެ ވެށީގެ ވަށައިގެންވާ ކަންކަމާއި، ތަކެއްޗަށް ވިސްނުން ހިންގާލުމަށް މިވާހަކައިން ބާރު ލިބޭނެ. އައު ނަންތައް ދަސްވެ، ބަހާމެދު އިތުރު ޝައުގުވެރިކަން އުފެދޭނެ" ޝަހުދީ ވިދާޅުވިއެވެ.
"މަވެށި" ވާހަކަ ސިލްސިލާގައި ހިމެނޭ 5 ފޮތަކީ، "އެކުވެރި ތިން މިޔަރު"، "ބުއްދިވެރި ފިނދަނަ"، "ނަސީބުދެރަ ކޮވެލި"، "ކިބުރުވެރި ބުޅާ" އަދި "ކޮކާލުގެ ހުވަފެން" މިވާހަކަ ތަކެވެ.
މިއިން ކޮންމެ ވާހަކައެއްވެސް އެކުލެވެނީ 18 ސޮފްޙާގެ މައްޗަށެވެ.
މި ސިލްސިލާގެ ވާހަކަފޮތްތައް މާލޭގެ ބުކްޝޮޕްތަކުން މިހާރު ލިބެން ހުންނާނެކަމަށް ވާހަކަ ޕަބްލިޝަރސްއިން ބުނެއެވެ. އަދި ވާހަކަ ޑޮޓްކޮމް މެދުވެރިކޮށް އޮންލައިންކޮށް މި ސިލްސިލާގެ ފޮތްތައް ގަންނަން ލިބޭނެކަމަށްވެސް ވާހަކަ ޕަބްލިޝަރސްއިން ބުނެއެވެ.