މެންޗެސްޓާ ޔުނައިޓެޑް ގަދަކޮށް ފެނިގެންދާނީ އަންނަ ސީޒަނުގައި ކަމަށް ކޯޗު އޮލޭ ގަނާ ސޯލްޝަޔާ ބުނެފި އެވެ.
އޭނާ ބުނީ 25 ޕޮއިންޓާއެކު ޓޭބަލުގެ އަށް ވަނާގައި އޮތުމަކީ މި ސީޒަނަށް ބަލާއިރު ދަށް މަގާމެއް ކަމަށެވެ. ނަމަވެސް މި ސީޒަނުގެ ބޭނުމަކީ އަންނަ ސީޒަނަށް ޓީމު ސެޓްކުރުން ކަމަށެވެ.
"އަހަރުމެން މި ސީޒަނުގެ ބޭނުން ހިފަނީ އަންނަ ސީޒަނަށް ތައްޔާރުވާން. ރަނގަޅު ކުޅުންތެރިން ދެނެގަނެ ޓީމު މިދަނީ ތައްޔާރުކުރަމުން. އަންނަ ސީޒަނަކީ އަހަރުމެން (ތައްޓަށް) ވާދަކުރާނެ ސީޒަން. އަހަރެން އުފާކުރަން ކުލަބުގެ މެނޭޖްމަންޓުން ކުލަބު އަލުން ބިނާކުރަން ވަގުތުދެމުންދާތީވެ. މިއީ އުނދަގޫ މަސައްކަތެއް،" ކޯޗު ބުންޏެވެ.
ސޯލްޝަޔާ ބުނީ ޔުނައިޓެޑުގައި މިހާރު ތިބި ގިނަ ކުޅުންތެރިންނަކީ ފެންވަރު މަތީ ކުޅުންތެރިން ކަމަށާއި އަންނަ ސީޒަނަށް ގެންނަން ޖެހޭނީ މިއަށްވުރެ ފެންވަރު މަތީ ކުޅުންތެރިން ކަމަށެވެ. އަދި ކުޅުންތެރިން ގެންނަންޖެހޭ މަގާމުތައް މިހާރުވެސް ފާހަގަ ކުރެވިފައިވާ ކަމަށާއި ނަމަވެސް ކުޅުންތެރިން ގެންނާނީ ވަރަށް ބޮޑަށް ވިސްނާފައި ކަމަށެވެ.
"މިހާރު ކުޅުންތެރިންގެ އަގު ވަރަށް ބޮޑު. އެކަމަކު އަހަރުމެން ވިސްނަނީ ފައިސާ ހޭދަކުރަން އެކަންޏެއްނޫން. ރަނގަޅު ކުޅުންތެރިން ގެނައުމަށް. އެކަން ކުރާނަން. އެކަމަކު ޓީމަށް ކުޅުންތެރިން އިތުރުކުރާނީ އަންނަ ސީޒަނަށް. ޖެނުއަރީ މަހު ކުޅުންތެރިން ގެނައުމުގެ ވިސްނުމެއްނެތް،" ސޯލްޝަޔާ ބުންޏެވެ.