ސޯޝަލް ހައުސިންގ ޔުނިޓްތަކުގެ ގޮތުގައި ދޫކުރާ ތަންތަނުގެ ފެންވަރު ދަށްކަމާއި، އެތަންތަނުގެ ސައިޒު ކުޑަކަމުގެ ޝަކުވާއަކީ އަބަދުހެން އާއްމު ރައްޔިތުން ކުރާ ޝަކުވާއެކެވެ. ރައްޔިތުންގެ މި ޝަކުވާތަކަށް ނިމުމެއްގެނެސް، ސޯޝަލް ހައުސިންގ ޔުނިޓްތަކުގެ ގޮތުގައި އިމާރާތްކުރާ ތަންތަނަކީވެސް ރައްޔިތުންނަށް އަނބުރުވެރި ދިރިއުޅުމެއް އުޅުމަށް މަގުފަހިކޮށްދޭނެ ތަންތަނަށް ހެދުމަކީ ސަރުކާރުގެ އަމާޒެކެވެ. އެގޮތުން އަލަށް ޑިޒައިންކުރާ ހައުސިންގ ޔުނިޓްތަކުގެ ތެރެއިން އެންމެ ކުދިތަންތަނުގައިވެސް 900 އަކަފޫޓު ހުންނާނެކަމަށް ސަރުކާރުން ވިދާޅުވެއެވެ.
ބޯހިޔާވަހިކަމުގެ މައްސަލައަކީ ރާއްޖޭގެ އާބާދީގެ ބޮޑު ބަޔަކަށް ކުރިމަތިވެފައިވާ އިޖްތިމާޢީ ބޮޑު މައްސަލައަކަށްވާއިރު، އެކަން ހައްލުކުރުމަށް އެކި ސަރުކާރުތަކުން ވަނީ އެކި ފެންވަރުގައި މަސައްކަތްތަކެއްކޮށްފައެވެ. ނަމަވެސް އެކަމަށް އެންމެ އެކަށީގެންވާ ވަރުގެ ހައްލެއް މިއަދާ ހަމައަށްވެސް ލިބިފައިނުވާއިރު، ސޯޝަލް ހައުންސިންގ ޔުނިޓްތަކުގެ ގޮތުގައި އިމާރާތްކުރާ ތަންތަން ފަހަރަކަށްވުރެ ފަހަރެއް ކުދިވަމުންދާކަމީ ގިނަ ބައެއްގެ ކަންބޮޑުވުން އެކަމަކަށް އަމާޒުވެފައިވާކަމެކެވެ. ގިނަ ބަޔަކު އެފަދަ ތަންތަން ސިފަކުރަނީވެސް "ކޮތަރު ކޮށި"ތަކެއްގެ ގޮތުގައެވެ.
ސޯޝަލް ހައުންސިންގ ޔުނިޓްތައް ތަރައްޤީކުރުމުގައި މިހާރުގެ ސަރުކާރުގެ ވިސްނުންހުރި ގޮތް ހިއްސާކުރައްވަމުން މިނިސްޓްރީ އޮފް ހައުސިންގ އެންޑް އަރބަން ޑިވެލޮޕްމަންޓުގެ ސްޓޭޓް މިނިސްޓަރ އަޙްމަދު ނަޝީދު ވިދާޅުވީ، ދުނިޔޭގެ އެންމެ ކުރިއަރާފައިވާ ޤައުމުތަކުގައި ސޯޝަލް ހައުސިންގ ޔުނިޓްތައް ތަރައްޤީކުރާ ކޮންސެޕްޓްތައް ބަލާ، ރާއްޖެއަށް އެންމެ އެކަށީގެންވާ މޮޑެލްތައް ދިރާސާކުރުމުގެ މަސައްކަތް ކުރަމުންދާކަމަށެވެ. އަދި އަލަށް ޑިޒައިންކުރާ ހައުންސިންގ ޔުނިޓްތަކުގެ ތެރެއިން އެންމެ ކުދި ތަންތަނުގައިވެސް 900 އަކަފޫޓުގެ ޖާގަ ހުންނާނެކަމަށް ނަޝީދު ވިދާޅުވިއެވެ.
"އެނދަކާއި، ޑްރެސިންގ ޓޭބަލަކާއި، ދެ އަލަމާރި ބަހައްޓާފައި ނަމާދުކޮށްލާނެ ތަންކޮޅެއް ނެތިއްޔާ އެއީ ރާއްޖޭގައި ރައްޔިތުން މިހާރު ބަލައިގަންނަ މިންގަނޑެއްނޫން. ނަމަވެސް ރައީސް ޞާލިޙުގެ ސަރުކާރުން ނިންމަވާފައިވަނީ މި ސަރުކާރުން ދޫކުރާ އެންމެ ކުޑަ ހައުސިންގ ޔުނިޓްތަކުގައިވެސް 3 ކޮޓަރި 900 އަކަފޫޓް ހުންނާނެ. ބައެއް ތަންތާނގައި 1000 އަކަފޫޓަށް ފެތޭގޮތަށްވެސް ޑިޒައިންކޮށްފައިވާނެ" އަޙްމަދު ނަޝީދު ވިދާޅުވިއެވެ.
ސްޓޭޓް މިނިސްޓަރ ނަޝީދު ވިދާޅުވީ، ބުރިބުރިއަށް އުސް އިމާރާތްތަކެއްގެ ގޮތުގައި ފްލެޓްތަކެއް އެޅުމުގެ ބަދަލުގައި، އަތޮޅުތަކުގައި ބޮޑަށް ޑިމާންޑުއޮތީ އާއްމުކޮށްވެސް ރަށްރަށުގައި ގެ ހުންނަ ގޮތަށް ސިންގަލް ސްޓޯރީ ހައުންސިން ޔުނިޓްތަކެއް އެޅުމަށްކަމަށެވެ. އަދި ބިމުގެ ޖާގަ އޮތް ވަރަކުން އަތޮޅުތަކުގައި ތަރައްޤީކުރާނީވެސް އެކަހަލަ ޔުނިޓްތަކެއްކަމަށް ސްޓޭޓް މިނިސްޓަރ ވިދާޅުވިއެވެ.
"ބިން މަދު ރަށްރަށުގައި އެނޫން އޮޕްޝަނަކަށް ދާންޖެހިދާނެ. މިސާލަކަށް ދެބުރި ތިންބުރީގެ ފްލެޓްތަކެއްގޮތަށް. ބިން ދަތިވީމަ ނީންނާނެ އިތުރު ގޮތެއް. އެ ނޫނިއްޔާ އަތޮޅުތަކުގައި ހުންނާނީ 3 ކޮޓަރީގެ ސިންގަލް ސްޓޯރީ ހައުސިންގ ޔުނިޓްތައް. ބޭނުންކުރެވޭ ސްޕޭސް 900 އަކަފޫޓު، އަދި ކޮމަން އޭރިއާއާއެކު 1000 ފޫޓާއި 1100 ފޫޓާ ދެމެދުގެ ޔުނިޓްތަކެއް. ނަމަވެސް މާލޭ ސަރަޙައްދަށް އަންނާނީ ހަމަ މަލްޓި-ސްޓޯރީ ހައުސިންގ" ސްޓޭޓް މިނިސްޓަރ އަޙްމަދު ނަޝީދު ވިދާޅުވިއެވެ.
ދިވެހި ރައްޔިތުންނަށް ކުރިމަތިވެފައިވާ ބޯހިޔާވަހިކަމުގެ މައްސަލައަށް ހައްލެއްގެނެސް، އަތްފޯރާފަށުގައި ބޯހިޔާވަހިކަން ފޯރުވައިދިނުމަކީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ސަރުކާރުގެ އެންމެ މުހިއްމު އެއް ވަޢުދެވެ. އެގޮތުން މި ދައުރުގެ ތެރޭގައި ރާއްޖޭގެ އެކި ސަރަޙައްދުތަކުގައި ޖުމްލަ 20،000 ހައުސިންގ ޔުނިޓް އިމާރާތްކުރުމަކީ ސަރުކާރުގެ އަމާޒެކެވެ. އެގޮތުން މިއަހަރުގެ ތެރޭގައި މީގެ ތެރެއިން ބައެއް ހައުންސިންގ ޔުނިޓްތައް އެޅުމަށްޓަކާ ސަރުކާރުން މިހާރު ދަނީ ތައްޔާރުވަމުންނެވެ.