ސަޤާފީ ފަތުރުވެރިކަން ކުރިއެރުވުމަށް ރިނބުދޫ ކައުންސިލުން އެރަށުގެ ފާރުތަކުގައި، ތާރީޚީ ޘަޤާފީ އަދި ފޯކްލޯރ ވާހަކަތަކުގެ މަންޒަރުތައް ކުރަހާފައި ވާއިރު، އޭގެ ތެރެއިން އެއް ކުރެހުމަކީ އެރަށުގެ ކުރީގެ ޕްރީސްކޫލުގެ ބިތުގައި ކުރަހާފައިވާ ރޮދުއައްޔުގެ ވާހަކައެވެ.
ރިނބުދޫ ކައުންސިލްގެ ރައީސް ހާތިމް އިބުރާހިމް ވިދާޅުވީ، ރިނބުދޫގެ ފާރުތަކުގައި ކުރަހަމުންދަނީ ހަމަ އާދައިގެ ކުރެހުންތަކެއް ނޫންކަމަށެވެ. އެއިން ރިނބުދޫގެ ހާދިސާތަކާއި ތާރީޚާއި މަސައްކަތްތެރިކަން ދައްކުވައި ދޭނެ ކަމަށެވެ.
ރާއްޖޭގެ އެހެން ސަރަހައްދުތަކުގައި ކިޔައިއުޅޭ މިވާހަކައަކީ، ރިނބުދޫ ރޮދުއައްޔުގެ ވާހަކަ ކަމަށާއި އެއީ ތާރީޚީ ފޯކްލޯރއެއް ކަމުގައި ރިނބުދޫ ކައުންސިލްގެ ރައީސް ހާތިމް އިބްރާހިމްވިދާޅުވިއެެވެ.
"އެއީ ރޮދުއައްޔުގެ ވާހަކަ. ކޮންމެ ފާރަކުން އެފެންނަ ކުރެހުމަކާއި އެކީގައި ވާހަކައެއް ވާނެ. ވާހަކަ ހަމައެކަނި ކުރަހާލާފައި އަޅުގަނޑުމެން ގެންނަނީއެއް ނޫން. އެއާއި އެކު އެފާރުގައި ހުންނާނެ އެވާހަކައެއްގެ ޚުލާސާ ލިޔުންކޮޅެއް ހަރުކުރެވިފައި." ހާތިމް ވިދާޅުވިއެވެ.
ހާތިމް ވިދާޅުވި ގޮތުގައި ރޮދުއައްޔައަކީ، ރިނބުދުއަށް އާއިލާ އާއި އެކު އައި މީހެކެވެ. އޭނާ އައީ ހުޅަނގު މޫސުމުގެ ދެވަނަ ނަކަތް ބުރުނުގައެވެ. ބުރުނަކީ ވިއްސާރަ ކޮޅިގަނޑުތައް ޖެހޭ ނަކަތެވެ. މިގޮތުން ހުކުރު ދުވަހަކު ރޮދުއައްޔަ ރިނބުދޫއިން ފުރަން އުޅުނު އިރު ވަރަށް ބޮޑަށް ވިއްސާރަހަދާފައި ހުރުމުން ފުރުން ރަނގަޅު ނޫންކަމަށް ރަށުގެ މީހުން ނަސޭހަތްތެރިވިއެވެ. އެހެން ނަމަވެސް ބުރުނު ވިލާގައި ދަތެއް ނުހުންނާނެކަމުގައި ބުނެ އޭނާ ފުރީއެވެ. އޭގެ ފަހުން އޭނާގެ ޚަބަރެއް ނުވެއެވެ.
މިހާދިސާ އާއި އެކު ގުޅުވައިގެން ރިނބުދޫ މީހުން ދައްކާ ވާހަކައެެއް އޮވެއެވެ. އެއީ އެރަށުގެ އެދިމާ ކަނޑުތެރެއިން އަލިގުޅަތަކެއް ފެންނަ ވާހަކައެވެ. އެފަދަ އަލިގުޅަތައް ދުށްމީހުން މިއަދުވެސް ރިނބުދޫގައި ދުނިޔޭގައި އެބަތިއްބެވެ.
"ބައެއް ފަހަރު އަޅުގަނޑުމެން އަތިރިމައްޗަށް ކުޅެން ނުކުމެ އުޅޭއިރު، ފެންނާނެ އަލިގުޅައެއް. ވަރަށް ބާރަށް ދެކޮޅު ދެކޮޅަށް ގޮސްފައި ގެއްލިދާނެ." ރޮދުއައްޔުގެ ހާދިސާ އާއި ގުޅުވައިގެން ދެކެވޭ އަލިގުޅަ ފެންނަ ވާހަކަ ކިޔައިދެމުން ރިނބުދޫގެ ރައްޔިތެއްކަމުގައިވާ އާދަމް ޝަރީފް ބުންޏެވެ.
ރިނބުދޫގެ ސަޤާފީ ފަތުރުވެރިކަމާއި ގުޅުވައިގެން ކުރަމުންދާ މައްސަކަތުގައި ރިނބުދޫ ކައުންސިލާއި އެކު ބައިވެރިވާ މޯލްޑިވުސް އާޓިސްޓްސް ކޮމިއުނިޓީގެ މެމްބަރު ހަސަން ރާއިފް ސިރާޖަކީ ރޮދުއައްޔުގެ ވާހަކަ ފާރުގައި ކުރަހައިދިން ކުރެހުންތެރިޔާއެވެ.
" މިކުރެހުމުން މިދައްކައި ދެނީ، ރިނބުދޫއަށް ޚާއްސަ ވާހަކައެއް. ފޯކްލޯއެއް. ދެން މީގައި (ކުރެހުމުގައި) މިބޭނުން ކުރަނީ އާދައިގެ ޓްރެޑިޝަލް، ފައިންއާރޓުގެ ބާވަތެއް ނޫން މީއެއް. މީތި މިިހަދާފައި މިވަނީ، ސްޓޯރީ ނުވަތަ ކޮމިކް ސްޓައިލަކަށް ކާޓޫނިސްޓިކްކޮށް. މިއަށް ކިޔާނީ ވެކްޓަރ ޑްރޯވިންގ. ކޮންމެވެސް ދެކުލައެއް ނުވަތަ ތިންކުލައެއް ބޭނުންކޮށްގެން ކުރަހާ ކުރެހުމެއް މީ. ރާއިފް ބުންޏެވެ.
ރިނބުދޫގައި ސަޤާފީ ފަތުރުވެރިކަން ފުޅާކުރުމުގެ މަސައްކަތެއްގެ ގޮތުން އެރަށުގެ ފާރުތަކުގައި ހަދަމުންދާ ވޯލްމިއުރަލްތަކަށް ވަނީ ބޮޑު ސަމާލުކަމެއް ލިބިފައެވެ. އަދި އެމިއުރަލްތައް ބަލާލުމަށާއި ފޮޓޯ ނެގުމަށް ގިނަ އަދަދެއްގެ ފަތުރުވެރިންނާއި އެހެންރަށްރަށުގެ މީހުންވެސް ރިނބުދޫއަށް މިހާރު އަންނަނީ ޒިޔާރްތަކުރަމުންނެވެ.