އެޕަލްގެ އެޕް ސްޓޯގެ ހިދުމަތްތަށް ލިބޭ ޤައުމުތަކުގެ ލިސްޓަށް ރާއްޖެ ހިމެނޭހެން އިތުރު 20 ޤައުމެއް އިތުރުކުރާނެ ކަމަށް އެޕަލްއިން އިއުލާންކޮށްފިއެވެ.
މީގެ ކުރިން ރާއްޖެ އާއި އެޕަލްގެ އެޕް ސްޓޯގެ ލިސްޓުގައި ރަސްމީކޮށް ނުހިމެނޭ ޤައުމުތަކުން އެޕް ސްޓޯ ހިދުމަތްތައް ހޯދަން ޖެހޭނީ އެހެން ޤައުމެއް ސެލެކްޓްކޮށްގެނެވެ.
އެޕަލް ފޯނަށް އެކި އެޕްލިކޭޝަންތަށް އެޅުމަށް ބޭނުންކުރާ އެޕް ސްޓޯގެ ލިސްޓަށް ރާއްޖެއާއި އެކު އިތުރު 20 ޤައުމަކަށް ހިމަނާނެ ކަމުގައި އެޕަލްއިން އިއުލާންކޮށްފައިވަނީ އެޕް ސްޓޯއަށް އެޕްލިކޭޝަން ޑިވެލޮޕް ކުރާ ފަރަތްތަކަށް ހާއްސަ ޑިވެލޮޕާޒް ޕޯޓަލްގައެވެ.
އަލަށް އެޕް ސްޓޯ ހިދުމަތް ފޯރުކޮށްދޭ ޤައުމުތަކަށް މި ހިދުމަތް ދޭން ފަށާނެ ތާރީހެއް އެޕަލްއިން ހާމަކޮށްފައެއް ނުވެއެވެ. ނަމަވެސް އެޕަލްއިން ވަނީ އެޕް ސްޓޯއަށް އެޕްލިކޭޝަންތަށް ތަރައްޤީކުރާ ޑިވަލަޕަރުންގެ ކިބައިން އޮންލައިންކޮށް ލައިސަންސް އެގްރީމަންޓު އޭޕްރިލް 10 ގެ ކުރިން އަޕްޑޭޓް ކުރުމަށް އެދިފައެވެ.
ރާއްޖޭގެ އިތުރުން އެޕް ސްޓޯގެ ހިދުމަތް އަލަށް ފަށާ ޤައުމުތަކުގެ ތެރޭގައި އަފްޤާނިސްތާން، ގެބޮން، ކޯ ޑީވޯ، ޖޯޖިއާ، ސާރބިއާ، ބޮސްނިއާ، އިރާޤް، މޮރޯކޯ، ލީބިޔާ، ކެމެރޫން، ކޮސޯވޯ، މޮޒަންބީކް، މިއަންމާ، ނައުރޫ، ރުވާންޑާ، ޓޮންގާ، ޒެންބިއާ، ވަނުއާޓޫ އަދި މޮންޓަނީގްރޯ ހިމެނެއެވެ. އެޕް ސްޓޯގެ ހިދުމަތް އެޕަލްއިން ދަނީ 155 ޤައުމަކަށް މިހާރުވެސް ދެމުންނެވެ.