މޯލްޑިވިއަންގެ ކާގޯ ފްލައިޓުގައި ސްރީލަންކާއިން ރާއްޖެއަށް 11 ޓަނުގެ މުދާ ގެނެސްފިއެވެ.
މޯލްޑިވިއަންއިން ބުނީ ލަންކާއިން މިރޭ އައި ފްލައިޓްގައި 11.765 ޓަނުގެ މުދާ ގެނެސްފައިވާއިރު އޭގެތެރޭގައި ތަރުކާރީއާއި މޭވާގެ ބާވަތްތަކާއި ސިއްޙީ ސާމާނު ހިމެނޭ ކަމަށެވެ.
ކޯވިޑް-19 ފެތުރެން ފެށުމާއެކު ދުނިޔޭގެ އެއަރލައިންތައް ހުއްޓުމަކަށް އައުމާއި ގުޅިގެން ޤައުމަށް ގެންނަން ބޭނުންވާ ޒަރޫރީ މުދާ ގެނައުމުގެ މަސައްކަތުގެ ދަށުން މޯލްޑިވިއަންއިން ޗާޓަރ ދަތުރުތައް ފަށާފައިވަނީ މިދިޔަ މާޗުމަހުގެ 29 ވަނަ ދުވަހުއެވެ. މިގޮތުން މޯލްޑިވިއަނުން އަންނަނީ 5 މަންޒިލަކަށް ކާގޯ ފްލައިޓުތައް ބާއްވަމުންނެވެ.
އެ 5 މަންޒިލަކީ :
• ކޮލޮމްބޯ
• ޓްރިވެންޑްރަމް
• ޗެންނާއީ
• ބެންކޮކް
• ދުބާއީ
މޯލްޑިވިއަންއިން ބުނީ މިދިޔަ ދުވަސްތަކުގެ ތެރޭގައި 700 ޓަނަށްވުރެ ގިނަ ކާގޯ ރާއްޖެއަށް ގެނެސްފައިވާކަމަށެވެ.
ކޯވިޑާ ގުޅިގެން ރާއްޖެއަށް ބޭހާއި ސިއްހީ ސާމާނުތައް ގެނައުމަށް ޙާއްސަ ދަތުރުތަކެއްވެސް މޯލްޑިވިއަންއިން ވަނީ ބާއްވާފައެވެ. އެގޮތުން މޯލްޑިއަން ކާގޯއިން ޗައިނާއަށް 3 ދަތުރުކޮށްފައިވާ ކަމަށް އެއަރލައިނުން ކުރިން ވަނީ ހާމަކޮށްފައެވެ.
ރާއްޖެއަށް މުދާ ގެނައުމަށް ވިޔަފާރިވެރިންނަށް ފަސޭހަކޮށްދިނުމުގެ ގޮތުން މޯލްޑިވިއަނުން މި ބާއްވާ ޗާޓަރ ކާގޯ ދަތުރުތަކަށް އޮންނަ ޑިމާންޑަށް ބެލުމަށްފަހު އިތުރު މަންޒިލްތަކަށްވެސް ދަތުރުތައް ކުރުމަށް ނިންމާފައިވާކަމަށް މޯލްޑިވިއަނުން ބުނެއެވެ.